नाट्यगृहे दुरुस्त झालीच पाहिजेत!
‘महाराष्ट्र टाइम्स’च्या वतीने सुरू असलेल्या ‘मटा कॅम्पेन’मध्ये शहरातील नाट्यगृहांची सद्यःस्थिती असा विषय घेऊन रोजच एका नाट्यगृहाच्या स्थितीवर प्रकाशझोत टाकण्यात आला. महाकवी कालिदास कलामंदिराची दुरवस्था याद्वारे उघड झाल्यानंतर लगेचच त्याच्या कामाचे टेंडरही निघाले. त्याचप्रमाणे रावसाहेब थोरात सभागृह दुरुस्तीच्या मार्गावर आहे, इतरही सभागृहे लवकरच दुरुस्त केली जाणार असल्याचे महापालिकेच्या वतीने सांगण्यात आले आहे. त्यासाठी एका समितीची नियुक्तीदेखील करण्यात आली आहे. या कॅम्पेनविषयी सामान्य नागरिकाला काय वाटते, याविषयी काही प्रातिनिधिक प्रतिक्रिया...!
दुरुस्तीचा केला जावा ठराव
नाट्यगृहे हा विषय शहराच्या जिव्हाळ्याचा आहे, त्यांची दुरुस्ती झालीच पाहिजे. महापालिकेने तसा ठरावा मंजूर करावा. कारण, शहरातील नागरिकांचे मनोरंजनाचे प्रमुख ठिकाण म्हणजे नाट्यगृह असते. त्याची देखभाल व्यवस्थित झाली पाहिजे.
-दिगंबर देवढे
नाट्यगृहे म्हणजे जणू आत्माच
नाट्यगृहे हा शहरातील कला-संस्कृतीचा जणू आत्माच असतो. नाटक किंवा एखादा सांस्कृतिक कार्यक्रम बघणे ही लोकांची गरज असते, त्याशिवाय मनोरंजन होईलच कसे? त्यामुळे त्यांची दुरुस्ती तत्काळ केली पाहिजे. ‘मटा’ने हा विषय हाती घेतल्याबद्दल धन्यवाद.
-प्रदीप साळुंके
‘मटा कॅम्पेन’ सडेतोड
‘महाराष्ट्र टाइम्स’मार्फत नेहमीच नागरिकांच्या विषयाला हात घातला जातो. जेथे समस्या किंवा काही अडचण येते, तेथे बातमीच्या माध्यमातून ‘मटा’ उभा ठाकतो, हा नेहमीचा अनुभव आहे. आताही नाट्यगृहांची मालिका मी पाहतोय. हे कॅम्पेन सडेतोड झाले असून, नाट्यगृहे दुरुस्त करावीच लागतील.
-सागर पाटील
अपूर्णता मनाला खटकते
महाकवी कालिदास कलामंदिर हा आमच्या जवळचा विषय आहे. कारण, काही ना काही सादरीकरणाच्या निमित्ताने आम्ही नेहमी तेथे येत असतो. परंतु, येथील अपूर्णता मनाला खटकते. मात्र, आता ‘मटा कॅम्पेन’मुळे बदल होईल, असे वाटते.
-कैलास सलादे
‘त्यांच्या’ डोळ्यात घातले अंजन
नाशिक शहरातील नाट्यगृहे हा तसा संवेदनशील विषय आहे. कारण, सांस्कृतिक क्षेत्राकडे महापालिकेचे नेहमीच दुर्लक्ष होत असते. कलाकारांना काही सुविधा हव्या असल्यास अनेकांच्या कपाळावर आठ्या पडतात. परंतु, ‘मटा’ने त्यांच्या डोळ्यात चांगलेच अंजन घातले आहे.
-आकाश बर्वे
मिनी थिएटर्सचा मुद्दा उचलावा
‘मटा’ने हे ‘कॅम्पेन’ हाती घेतले हे स्वागतार्ह आहे. मात्र, आता शहरात काही मिनी थिएटर्सची गरज आहे. त्यासाठी नव्याने आंदोलन करण्याची गरज आहे. प्रत्येक विभागात एक मिनी थिएटर असेल, तर त्या विभागातील रसिकांची भूक भागू शकेल.
-अमोल महाजन
आता परिस्थिती बदलेल
नाशिक शहरातील नाट्यगृहांचा प्रॉब्लेम मोठा होता. कारण, आम्ही जेव्हाही नाटक पाहण्यासाठी तेथे गेलो, तेव्हा केवळ दुरवस्थाच नजरेस पडली. कालिदास कलामंदिरही खराब स्थितीत आहे. मात्र, नाट्यगृहांची दुरवस्था या ‘मटा कॅम्पेन’मुळे आता परिस्थिती बदलेल.
-सचिन नवघिरे
शहरात नाट्यगृहे गरजेचीच
नाट्यगृहे ही शहराची गरज असते. कारण, शहरात कलाकार राहतात, मनोरंजनासाठी रसिकही राहतात. त्यामुळे शहरात नाट्यगृहे हवीच असतात. आपल्या शहरातील नाट्यगृहांची अवस्था सध्या फारशी चांगली नाही. परंतु, हा मुद्दा ‘मटा’ने उचलल्यामुळे यात बदल नक्कीच घडेल.
-उमेश नवघिरे
‘कॅम्पेन’मुळे दुरवस्था प्रकाशात
पं. पलुस्कर नाट्यगृहाची अवस्था अत्यंत खराब आहे. विशेष म्हणजे येथे शेजारीच शौचालय उभारण्यात आले आहे. अनेक मद्यपी येथे अंगणात पहुडलेले असतात. त्यांचा काही बंदोबस्त करायला हवा. ‘मटा कॅम्पेन’मुळे या नाट्यगृहाच्या विविध समस्या प्रकाशात आल्या आहेत.
-विजय कदम
बदल आहेत अपेक्षित
मुंबई-पुण्याच्या तुलनेत नाशिकची नाट्यगृहे आहेत कुठे? तिकडे बटणांवर सगळा खेळ आहे, आपल्याकडे अजूनही दोऱ्यांवरच पडदे उघडझाप करतात. किमान ‘मटा’मुळे ही अवस्था समोर तरी आली आहे. आता त्यात तातडीने महत्त्वाचे बदल होणे अपेक्षित आहे.
-प्रशांत हाडोळे
मोबाइल अॅप डाउनलोड करा आणि राहा अपडेट
