gautam.sancheti@timesgroup.com
Tweet @sanchetigMT
नाशिक ः स्थलांतरित, नववसाहत, झोपडपट्टी, जुने नाशिक असा संमिश्र भाग असलेल्या पंचवटी विभागात महापालिका निवडणुकीत भाजपने २४ पैकी १९ जागा जिंकत निर्विवाद वर्चस्व मिळविले आहे. भाजपचे आमदार तथा शहराध्यक्ष बाळासाहेब सानप यांच्यासाठी होम ग्राउंडवरची ही निवडणूक प्रतिष्ठेची होती. त्यांनी विरोधी पक्षांबरोबरच स्वपक्षीयांशी संघर्ष करून त्यात यश मिळविले. सानप यांच्यामुळे हा विभाग सर्वांच्याच रडारवर होता. या वर्चस्वाच्या लढाईत सानप अपयशी ठरले असते, तर त्यांना मोठा फटका बसला असता. त्यामुळे त्यांनी ही निवडणूक प्रतिष्ठेची करून आपले वर्चस्व सिद्ध केले आहे. विशेष म्हणजे या निवडणुकीत त्यांनी मित्रपक्षासह विरोधी पक्षांना जोरदार धक्का दिला आहे. याच विभागातून रंजना भानसींच्या रुपाने महानगराला नवा महापौर मिळण्याची शक्यता आहे.
या विभागात गेल्या निवडणुकीपेक्षा तब्बल १२ जास्त जागा जिंकत भाजपने ७ वरून १९ वर मुसंडी मारली. या विभागात राष्ट्रवादी व काँग्रेसला भोपळाही फोडता आला नाही, तर मनसेची ७ जागांवरून दोन जागांवर घसरण झाली आहे. शिवसेनेची एक, तर अपक्षांच्या गेल्या वेळेच्या दोन जागा मात्र कायम राहिल्या आहेत. २०१२ च्या निवडणुकीत मनसे व भाजपने वर्चस्व राखत प्रत्येकी सात जागा मिळविल्या होत्या. त्या खालोखाल राष्ट्रवादी काँग्रेसने पाच, तर शिवसेनेला अवघ्या एक जागेवर समाधान मानावे लागले होते. या विभागात काँग्रेस दोन जागांवर स्थिरावली, तर दोन अपक्षांनीसुद्धा बाजी मारली होती. पण, या वेळी सर्वच चित्र बदलले व भाजपने सहाही प्रभागांत कमी-अधिक प्रमाणात कमळ फुलवले.
प्रभाग एक
किशोर सूर्यवंशी मार्ग, बोरगड, चामरलेणी, म्हसोबावाडी, म्हसरूळ गावठाण व शेतीशिवार असा भाग असलेल्या या प्रभागाने निकालाचे ओपनिंग केले. या प्रभागात भाजपच्या पूनम धनगर, रंजना भानसी, गणेश गिते व अरुण पवार यांनी यश मिळवून चारही जागा जिंकल्या. या प्रभागात सलग चार वेळा निवडणूक जिंकणाऱ्या रंजना भानसी पुन्हा निवडून आल्या. त्यांना शिवसेनेच्या जयश्री चव्हाण यांनी कडवे आव्हान उभे केले होते, तर दोन वेळा नगरसेविका झालेल्या शालिनी पवार यांच्याऐवजी त्यांचे पती अरुण पवार रिंगणात होते, त्यांनाही यश मिळाले. या भागातून आता शहराला महापौर मिळणार असल्यामुळे येथे विकासकामे प्रचंड होतील, अशी मतदारांची अपेक्षा आहे.
प्रभाग दोन
आडगाव मळे परिसर, एमईटी कॉलेज, दुर्गानगर, नांदूर-मानूर गाव व शेती शिवाराचा हा प्रभाग आहे. या प्रभागातदेखील भाजपचे चारही उमेदवार निवडून आले. त्यात पूनम सोनवणे, सुरेश खेताडे, उद्धव निमसे, शीतल माळोदे यांचा समावेश आहे. दोन वेळा नगरसेवक झालेले काँग्रेसचे उद्धव निमसे यांनी भाजपत प्रवेश केल्यामुळे त्यांना त्याचा फायदा झाला. त्यांच्या विरोधात तीन वेळा नगरसेवक राहिलेले ‘शेकाप’चे अॅड. जे. टी. शिंदे हे शिवसनेच्या तिकिटावर रिंगणात उतरले होते. पण, त्यांचाही पराभव झाला. या प्रभागात सर्वाधिक मतदान झाले होते. त्यामुळे येथे धक्कादायक निकालाची शक्यता वर्तवली जात होती. पण, मतमोजणीनंतर चारही जागांवर कमळच फुलले. शिवसेनेने झुंज दिली असली, तरी मतांचा फरक चारही ठिकाणी मोठा आहे.
प्रभाग तीन
प्रभाग तीनमध्ये रासबिहारी शाळेमागील परिसर, गोपाळनगर, ओमनगर, क्षीरसागर कॉलनी, बाप्पा सीताराम परिसर, कृष्णनगर, टकलेनगर, एसटी डेपोमागील परिसर, स्वातंत्र्यवीर सावरकर परिसर आहे. यात भाजपचे शहराध्यक्ष व आमदार बाळासाहेब सानप सलग चार वेळा निवडून आले आहेत. याच भागाने त्यांना उपमहापौर, महापौर आणि आमदारपदापर्यंत नेले. यंदा त्यांनी मुलगा मच्छिंद्रला रिंगणात उतरवत यश मिळविले. या प्रभागात मच्छिंद्र यांच्या बरोबर प्रियांका माने व रुची कुंभारकर निवडून आले आहेत. पण, एका जागेवर भाजपच्या कुसुम शिंदे यांचा पराभव करून शिवसेनेच्या पूनम मोगरे यांनी यश मिळविले आहे. या प्रभागात मच्छिंद्र यांच्याविरोधात सानप यांचेच समर्थक विलास आव्हाड यांनी शिवसेनेकडून उमेदवारी घेतली होती. पण, त्यांना तिसऱ्या क्रमांकाची मते पडली, तर राष्ट्रवादीचे विद्यमान नगरसेवक समाधान जाधव यांना दुसऱ्या क्रमांकाची मते पडली.
प्रभाग चार
नामको कॅन्सर हॉस्पिटलमागील परिसर, कृषी उत्पन्न बाजार समिती, सीडीओ-मेरी, निमाणी बस स्टॅण्ड, आर. पी. विद्यालय, सूर्या आर्केड, सुविधा हॉटेल परिसराचा या प्रभागात समावेश आहे. या प्रभागात झोपडपट्टीचा मोठा भाग असून, येथे भाजपने चारही जागांवर विजय मिळविला. शांता हिरे, सरिता सोनवणे, जगदीश पाटील, हेमंत शेट्टी यांना यश मिळाले आहे. या प्रभागात विद्यमान नगरसेवक डॉ. विलास घोलप यांच्या मातोश्री प्रतिभा घोलप, सर्वसाधारण गटातून माजी नगरसेवक भगवान भोगे, राष्ट्रवादीच्या कविता कर्डक यांनाही पराभव पत्करावा लागला. याच प्रभागात शिवसेनेच्या एबी फाॅर्मचा गोंधळ झाला. त्यामुळे हा फाॅर्म फाडण्याचा विषयसुद्धा बराच चर्चेत आला. त्यानंतर शिवसेनेने येथे आपले चारही उमेदवार पुरस्कृत केले. पण, अखेरच्या टप्प्यात फक्त तीन उमेदवार रिंगणात राहिले. पक्षाचे चिन्ह नसल्यामुळे येथे गोंधळ कायम होता, त्याचा फटका सर्वच उमेदवारांना बसला.
प्रभाग पाच
प्रभाग पाचमध्ये कुमावतनगर, मालेगाव स्टॅण्ड, रामकुंड परिसर, शनी चौक, सरदार चौक, काळाराम मंदिर, सीतागुंफा परिसर, ढिकलेनगर, नाग चौक हा परिसर आहे. येथे उपमहापौर गुरुमित बग्गा यांनी दोन जागांवर अपक्ष, तर दोन जागांवर मनसेचे उमेदवार दिले होते. त्यात या आघाडीला तीन जागांवर यश मिळाले. येथे बग्गांबरोबरच विमल पाटील व मनसेच्या नंदिनी बोडके विजयी झाल्या, तर भाजपचे कमलेश बोडके यांनी उल्हास धनवटे यांचा पराभव केला. या ठिकाणी बग्गा व माजी खासदार माधवराव पाटील यांचे चिरंजीव संजय पाटील यांची लढत चुरशीची होईल, असा अंदाज होता.पण, बग्गांनी या प्रवर्गात ६ हजार २८० ची आघाडी घेत विजय मिळविला. भाजपला एकाच जागेवर येथे समाधान मानावे लागले. महापालिकेत पक्षाच्या वर्चस्वामुळे अशी आघाडी करणे तसे धोकादायक होते. पण, बग्गा यांच्या अभ्यासूवृत्तीमुळे त्यांना येथे यश मिळाले. या प्रभागात मनसेचे शहराध्यक्ष व विद्यमान नगरसेवक अॅड. राहुल ढिगले यांनी निवडणूक न लढवता उल्हास धनवटे यांना उमेदवारी दिली होती. पण, त्यांचा या प्रभागातून पराभव झाला. मनसेला येथे एकाच जागेवर समाधान मानावे लागले.
प्रभाग सहा
मखमलाबाद गावठाण, कोशिरे मळा, उदयनगर, तळेनगर, आदर्शनगर, कौशल्यानगर, रामवाडी असा भाग या प्रभागात आहे. येथे भाजपने तीन जागा राखल्या असून, एका जागेवर विद्यमान महापौर अशोक मुर्तडक यांनी मनसेकडून विजय मिळविला. या प्रभागात भाजपचे पुंडलिक खोडे, सुनीता पिंगळे व भिकूबाई बागुल यांनी विजय मिळविला आहे. भाजपवासी झालेले दामोदर मानकर यांना येथे पराभव पत्कारावा लागला. या प्रभागात महापौरांमुळे मनसेला सर्वच जागांवर यश मिळेल, असा सर्वांचा अंदाज होता. पण, जातीय समीकरणाने व प्रभागाच्या बदलामुळे येथे भाजपसोडून सर्वांनाच धक्का बसला. भाजपने तीन जागांवर यश मिळविल्यामुळे शिवसेना, राष्ट्रवादी असा प्रवास करून भाजपवासी झालेले सुनील बागुल यांचे वर्चस्व वाढणार आहे. महापौरांना शिवसेनेचे दीपक पिंगळे यांनी कडवे आव्हान निर्माण केले होते. पण, महापौरांनी येथे मोठ्या फरकाने बाजी मारली.
मोबाइल अॅप डाउनलोड करा आणि राहा अपडेट
