शहराच्या अन्य पाच भागांत भाजप व शिवसेनेचे वर्चस्व दिसून आले असताना पश्चिम विभागात मात्र काँग्रेस आणि राष्ट्रवादीचा वरचष्मा असल्याचे स्पष्ट झाले आहे. उच्चभ्रू आणि मध्यमवर्गीयांची लक्षणीय संख्या असलेल्या या प्रभागात भाजपने सर्वाधिक पाच जागा मिळविल्या आहेत. काँग्रेस आणि राष्ट्रवादीला प्रत्येकी चार, तर मनसे आणि शिवसेनेला प्रत्येकी एक जागा मिळाली आहे. एका जागेवर अपक्षाला संधी मिळाली आहे.
गेल्या निवडणुकीत पश्चिम प्रभागामध्ये १३, १४, १५, २२, २३ आणि २४ असे एकूण ७ प्रभाग होते. आताच्या प्रभागरचनेत प्रभाग क्रमांक ७, १२, १३ आणि १४ यांचा समावेश प्रभागात झाला आहे. प्रभागरचनेमुळे यंदा व्यापक झालेल्या पश्चिम प्रभागात जोरदार रस्सीखेच होती. गंगापूररोड, महात्मानगर, कॉलेज रोडसारखा उच्चभ्रू परिसर, व्यापारी बाजारपेठ आणि जुन्या नाशिकचा काही भाग, पाच ते सहा झोपडपट्ट्या यामुळे या प्रभागाकडे सगळ्यांचेच लक्ष होते. गेल्या निवडणुकीत मनसेचे पाच, भाजप आणि काँग्रेसचे प्रत्येकी ३, शिवसेनेचे दोन आणि राष्ट्रवादीचा एक जण विजयी झाला होता. यंदा राष्ट्रवादीला सर्वाधिक फायदा झाला आहे, तर मनसेला सर्वाधिक तोटा.
प्रभाग ७ मध्ये भाजपच्या विद्यमान तिन्ही आमदारांची प्रतिष्ठा पणाला लागली होती. या ठिकाणी तीन जागा मिळवत आमदारांनी प्रतिष्ठा राखली असली तरी एका जागी मात्र शिवसेनेचा उमेदवार विजयी झाला आहे. भाजपच्या आमदार सीमा हिरे, देवयानी फरांदे आणि डॉ. राहुल आहेर या तिघांच्या दृष्टीने प्रभाग ७ मधील चारही लढती अतिशय महत्त्वाच्या होत्या. कारण डॉ. आहेर यांच्या चुलतभगिनी हिमगौरी आहेर-आडके या ‘ब’ गटातून उमेदवारी करीत होत्या. हिरे यांचे दीर योगेश हिरे ‘ड’ गटातून नशीब आजमावत होते, तर ‘क’ गटात स्वाती भामरे या खान्देशवासीय उमेदवार फरांदे यांच्या समर्थक होत्या. त्यामुळे या तिन्ही उमेदवारांना निवडून आणणे आमदारत्रयींना आवश्यकच होते. संपूर्ण महापालिका निवडणुकीत तिन्ही आमदारांनी प्रभाग ७ वगळता शहराच्या अन्य भागांत तुरळकच प्रचार केल्याचे बोलले जात होते. या तिघांनी महात्मानगरपासून रविवार कारंजापर्यंत सारा परिसर पिंजून काढला. घराघरांत जाऊन त्यांनी प्रत्यक्ष गाठीभेटी घेतल्या. दांडगा संपर्क, चारही पॅनलच्या उमेदवारांच्या साथीने प्रचार या जोरावर या ठिकाणी भाजपला तीन ठिकाणी विजय प्राप्त झाला आहे. खान्देशातील मतदारांना आकर्षित करण्यासाठीच भामरे यांची उमेदवारी देण्यात आली. हिरे यांच्या समर्थनाला स्वामी समर्थ भक्त परिवार, तसेच कळवण, सटाणा आणि मालेगाव या कसमा पट्ट्यातील मतदार मदतीला आले. याच पट्ट्यातील मतदारांना आकर्षित करताना डॉ. आहेर यांनी आपल्या चुलतबहिणीला विजयाच्या जवळ नेऊन ठेवले. तिन्ही आमदारांचे संपूर्ण कुटुंबीय, तसेच उमेदवारांचे कुटुंबीय आणि नातेवाईक या साऱ्यांनीच प्रभाग पिंजून काढला होता. त्यामुळेच मतदार भाजपच्या पाठीशी राहिल्याचे दिसून येत आहे. शिवसेनेचे महानगरप्रमुख अजय बोरस्ते ‘अ’ गटातून विजयी झाले आहेत. काही वर्षांपासून त्यांचा या प्रभागात दबदबा निर्माण झाला आहे. उपमहापौर म्हणूनही त्यांनी कारभार पाहिला आहे. सुशिक्षित मतदारांमध्ये त्यांची चांगली ओळख आहे. याचा फायदा बोरस्ते यांना झाला आहे. त्यांच्या रूपाने प्रभागात केवळ एकमेव यश सेनेला मिळाले आहे. मात्र, महानगप्रमुख असून केवळ स्वतःचा विजय वगळता संपूर्ण चार उमेदवार निवडून आणण्यात बोरस्ते यांना अपयश आले आहे. राष्ट्रवादी काँग्रेसच्या उमेदवारीवर नगरसेवकपद भूषविलेले गोकुळ पिंगळे यांनी निवडणुकीच्या तोंडावर अचानक शिवसेनेत प्रवेश केला. मात्र, त्यांचे बंधू तथा राष्ट्रवादीचे माजी खासदार देविदास पिंगळे नाशिक बाजार समितीतील कारभारामुळे सध्या जेलमध्ये आहेत. याचाही फटका गोकुळ यांना बसला. त्यामुळेच ‘ड’ गटात योगेश हिरे यांच्या विजयाचा मार्गही मोकळा झाला.
प्रभाग १२ मध्ये भाजपचे निष्ठावंत आणि सामान्य कार्यकर्ते किशोर घाटे यांची कन्या प्रियंका हिच्या गळ्यात विजयाची माळ पडली आहे. या प्रभागातही भाजपची लाट होती. मात्र, भाजपला दोनच ठिकाणी विजय मिळाला. ‘ब’ गटात भाजपला बंडखोरी भोवली. या ठिकाणी सुरेश पाटील हे अधिकृत उमेदवार हेमंत धात्रक यांची अडचण ठरले. त्याचा फायदा काँग्रेसचे युवा कार्यकर्ते समीर कांबळे यांना झाला. काँग्रेसचे निष्ठावंत, तसेच ज्येष्ठ नगरसेवक उत्तम कांबळे यांचा या भागातील दबदबा त्यांचे पुत्र समीर यांना कामी आला. ‘क’ गटात काँग्रेसच्या प्रवक्त्या डॉ. हेमलता पाटील विजयी झाल्या. त्यांना भाजपच्या प्रेरणा बेळे यांनी कडवी झुंज दिली. बेळे प्रथमच निवडणूक लढवत असल्या तरी भाजपच्या लाटेमुळे त्यांना चांगली मते मिळाली. उद्योगापासून अन्य भागातील मतदारांनीही बेळे यांना साथ दिली; पण ती कमी पडली. अत्यल्प मतांनी डॉ. पाटील विजयी झाल्या. अटीतटीच्या लढाईत यश मिळविणाऱ्या डॉ. पाटील यांना विजयोत्सव साजरा करण्याचे भाग्य लाभले नाही. कारण त्यांच्या मातोश्रींचे निधन झाल्याने त्या माहेरी गेल्या होत्या. ‘ड’ गटात काँग्रेसचे निष्ठावंत राहिलेले आणि पक्षांतरानंतर भाजपकडून उमेदवारी करणारे ज्येष्ठ नगरसेवक शिवाजी गांगुर्डे विजयी झाले. त्यांचा सामना काँग्रेसचे माजी शहराध्यक्ष आणि वारसा लाभलेले शैलेश कुटे यांच्याशी होता. मात्र, गांगुर्डे यांनी एकहाती दबदबा कायम राखला. पहिल्या फेरीपासूनच मताधिक्य मिळवत गांगुर्डे यांनी विजय मिळवला. त्यामुळे या प्रभागातील त्यांचा वरचष्मा पुन्हा एकदा सिद्ध झाला. या प्रभागात भाजप आणि काँग्रेसला प्रत्येकी दोन जागा मिळाल्या आहेत.
प्रभाग १३ कडे संपूर्ण शहराचे लक्ष लागून होते. कारण सर्व प्रभागांत पक्षाच्या अधिकृत उमेदवाराचे पॅनल प्रचार करीत होते. या ठिकाणी काँग्रेस, राष्ट्रवादी आणि मनसे या तीन पक्षांच्या चारही उमेदवारांनी जोरदार प्रचार केला. आघाडीला मनसेचे इंजिन लागल्याने सगळ्यांच्याच भुवया उंचावल्या होत्या. प्रत्यक्ष गाठीभेटी आणि प्रभागातील नातीगोती, तसेच जनसंपर्क या जोरावर या पॅनलला भाजप लाटेचा कुठलाही फटका बसला नाही. या ठिकाणी मनसेचे पहिले महापौर अशी राज्यात ओळख निर्माण झालेले यतीन वाघ यांनी पक्षांतरानंतर हाती शिवबंधन बांधले. त्यांच्यासह अन्य तीन शिवसेना, चारही भाजप व अन्य उमेदवार या साऱ्यांना धोबीपछाड देत काँग्रेसचे शाहू खैरे आणि वत्सला खैरे, वाघ यांना पराभूत करणारे राष्ट्रवादी काँग्रेसचे माजी शहराध्यक्ष गजानन शेलार आणि मनसेच्या सुरेखा भोसले यांनी या ठिकाणी विजय प्राप्त केला. ‘प्रभागाचा विकास करणार कोण, घड्याळ, इंजिन, पंजे दोन’ या टॅगलाइनखाली पॅनलचा प्रचार चांगलाच रंगला. त्यामुळे तेली समाजाच्या मतांसह अल्पसंख्याक मतदारांनीही भाजप व शिवसेनेला नाकारले. या भागातील बाजारपेठही महत्त्वाची होती. व्यापाऱ्यांनी शिवसेना- भाजपच्या विरोधात मतदान केल्याचे दिसून येते.
प्रभाग १४ हा जुन्या नाशिकचा भाग आहे. या ठिकाणी मुस्लिम मते निर्णायक होती. कारण या ठिकाणी असलेल्या मुस्लिम मतदारांची संख्या. या भागात मातब्बर उमेदवार देण्यापासून शिवसेना, भाजपची पंचाईतच होती. त्यांनी उमेदवार दिले असले तरी ते विजय खेचून आणतील असे नव्हते. भाजपच्या एका अधिकृत उमेदवाराने माघार घेऊन चक्क शिवसेनेला अनपेक्षितरीत्या पाठिंबा दिला. त्यामुळे येथे शिवसेनेला अपेक्षा होती. मात्र, या ठिकाणी तीन मुस्लिम उमेदवार विजयी झाले आहेत. त्यात राष्ट्रवादीचे विद्यमान नगरसेवक सुफी जीन, समिना मेमन यांचा समावेश आहे, तर गेल्या वेळी शहर विकास आघाडी आणि यंदा अपक्ष उमेदवारी करणारे सय्यद मुशीर यांनी यश मिळविले आहे. मुशीर यांनी काँग्रेसचे नासीरखान पठाण यांचा पराभव केला, तर ‘अ’ गटात राष्ट्रवादी काँग्रेसच्या शोभा साबळे यांना संधी मिळाली आहे. त्या राष्ट्रवादीचे नगरसेवक संजय साबळे यांच्या पत्नी आहेत. दुबई वॉर्ड अशी ओळख असलेल्या या भागात झोपडपट्टीतील मतदार आणि मुस्लिम मते निर्णायक आहेत. नाशिकचा समावेश स्मार्ट सिटीमध्ये झाला आहे. याच अंतर्गत जुने नाशिक भाग विकासासाठी घेण्यात आला आहे. त्यामुळे या भागातील मतदारांना त्याची उत्सुकता आहेच; पण याच मतदारांनी सत्ताधाऱ्यांच्या विरोधात कौल दिल्याने ही बाब महत्त्वाची आहे. एकंदरीतच प्रभागामध्ये मनसेचे मोठे नुकसान झाले आहे. त्यांचे संख्याबळ पाचवरून एकवर आले आहे. राष्ट्रवादीच्या जागा एकवरून चार झाल्या आहेत, तर भाजपच्या तीनवरून पाचवर गेल्या आहेत. शिवसेनेची एक जागा कमी झाली आहे.
मोबाइल अॅप डाउनलोड करा आणि राहा अपडेट
