म. टा. खास प्रतिनिधी, नाशिक
महापालिकेसाठी वादावादीच्या किरकोळ घटना वगळता मतदान शांततेत पार पडले. मागील पंचवार्षिकपेक्षा यंदा मतांचा टक्का वाढला आहे. सरासरी ६१ टक्के मतदानाची नोंद झाली असून, १२२ जागांसाठी ८२१ उमेदवारांचे भवितव्य आता बॅलट मशिनमध्ये बंद झाले आहे. वाढलेल्या मतदान टक्केवारीचा फायदा कोणाला होणार याकडे लक्ष लागून आहे.
पहिल्यांदाच झालेल्या बहुसदस्यीय प्रभागरचनेत अनेक ठिकाणी मतदारांची एकगठ्ठा नावे गायब झाली, तर काही ठिकाणी मतदारांची नावे इतर प्रभागांत वर्ग झाल्याने मतदारांना मनस्ताप सहन करावा लागला. मतदान प्रक्रिया सुरू होताच चार बूथवर बॅलेट मशिन बंद पडले, तर पाच ठिकाणी एरर आल्याने मशिन बदलण्यात आले. हा गोंधळ मिटवला तरी मतदार यादीतल्या घोळाने यंत्रणेसह मतदारांची तारांबळ झाली.
प्रथमच बहुसदस्यीय प्रभागरचनेचा फटका मतदारांना बसला होता. उमेदवारांची वाढलेली संख्या, बॅलट मशिनची वाढलेल्या संख्येमुळे मतदार गोंधळात सापडले. त्यामुळे मतदारांचे प्रबोधन करतांना यंत्रणा जेरीस आली होती. सकाळी अकरा वाजेपर्यंत अवघे १८.५० टक्के मतदान झाले होते. साडेतीन वाजेपर्यंत हा आकडा ४३.३३ टक्क्यांपर्यंत पोहोचला होता. साडेतीन वाजेनंतर मतांचा टक्का चांगलाच वाढला होता. लक्ष्मीदर्शन झाल्यानंतर मोठ्या प्रमाणावर काही भागांमध्ये मतदार मतदान करण्यासाठी बाहेर पडल्याचे चित्र होते. त्यामुळे रात्री उशिरापर्यंत शहरात ५० बुथवर मतदान सुरू होते.
गोंधळाने हक्क हिरावला
नेहमीप्रमाणे मतदार यादीतल्या गोंधळाने यंत्रणेसह मतदारांची चांगलीच तारांबळ उडाली होती. सर्वच प्रभागांमधल्या मतदार यादीतल्या गोंधळामुळे जवळपास पाच ते सात टक्के नागरिकांना आपल्या मतदानाच्या हक्कापासून वंचित रहावे लागले. अनेक मतदारांचे थेट प्रभाग बदलण्यात आले होते. एकाच कुटुंबातील व्यक्तींचे बूथ बदलण्यात आले. मतदार यादीतील गोंधळामुळे अनेक मतदान केंद्रावर वादावादीच्या घटना घडल्याने तणावही निर्माण झाला.
उत्साह अन् निरुत्साह
मतदानात मोठ्या प्रमाणावर मतदारांमध्ये उत्साह दिसून आला असला, तरी काही ठिकाणी यादीतून नावे गायब झाल्याने तसेच स्थलांतरीत झाल्याने मतदारांमध्ये निरुत्साह दिसून आला. सकाळच्या सत्रात मतदानाचा वेग अतिशय थंड होता. काही ठिकाणी बोगस मतदान करण्याचाही प्रयत्न झाला. चार मतदान केंद्रामध्ये उमेदवारच आमने-सामने आल्याने त्यांच्यात वादावादी झाली. परंतु, पोलिसांनी हस्तक्षेप करून हा वाद मिटवल्याने मतदान प्रक्रिया शांततेत पार पडली. काही ठिकाणी सायंकाळी उशिरापर्यंत मतदारांच्या रांगा लागलेल्या होत्या. यामुळे यंत्रणेला चांगलीच कसरत करावी लागली.
महापालिका मतदान टक्केवारी
१९९२ : ६७ , १९९७ : ६५, २००२ : ५५.३९, २००७ : ६०, २०१२ : ५७.१८
मोबाइल अॅप डाउनलोड करा आणि राहा अपडेट
