म. टा. प्रतिनिधी, नाशिक
शहर पोलिसांनी महापालिका निवडणुकीत उभ्या असलेल्या उमेदवारांची कुंडली सादर केली. कोणावर किती आणि कोणते गुन्हे दाखल आहेत, याची माहितीही मतदान केंद्राबाहेर लावण्यात येणार आहे. महापालिकेत प्रवेश करू इच्छिणाऱ्या सर्वच पक्षांनी गुन्हे असलेल्या उमेदवारांना पसंती दिली आहे. यात शिवसेना आघाडीवर असून, त्याखालोखाल काँग्रेस- राष्ट्रवादी आघाडीचा क्रमांक दिसतो.
गुन्हेगारीमुक्त राजकीय व्यवस्था उभी करण्याच्या वल्गना सर्वच पक्ष करतात. सध्या तर कोणत्या पक्षात किती गुंड याच्यावरच नेते भाषण करतात. महापालिकेचे काम पायाभूत सुविधा देण्याचे आहे. त्याबाबत जाणीवपूर्वक सर्वच पक्षांनी मौन स्वीकारले आहे. शहरातील गोदाप्रदूषण असो, की एसटीपीचा प्रश्न, सार्वजनिक वाहतूकव्यवस्था, पार्किंग, पूर्ण दाबाने पाणीपुरवठा, पावसाळ्यात ओसंडून वाहणारी पावसाळी गटार योजना याबाबत सध्या तरी राजकीय व्यासपीठावर मौन आहे. दरम्यान, गुन्हेगारीच्या मुद्द्यावर बाजार गरम असून, सर्व राजकीय पक्ष व अपक्ष असे मिळून तब्बल ८९ संशयित आरोपी निवडणुकीच्या आखाड्यात उतरले दिसतात. काहींवर किरकोळ, तर काहींवर थेट खंडणी, खून, खुनाचा प्रयत्न असे गुन्हे दाखल आहेत. दुर्दैवाने सर्वच पक्षांनी यात आघाडी घेतली आहे. शिवसेनेने अशा २२ उमेदवारांना महापालिकेत पाठवण्याचा विडा उचलला आहे. भाजपकडे ११ उमेदवार आहेत. १२२ उमेदवारांची वानवा असलेल्या मनसेच्या गटात १०, तर रिपब्लिकन पक्ष, बसप व इतर छोट्या पक्षांच्या सहा उमेदवारांवर कोणते तरी गुन्हे दाखल आहे. पक्षांकडून डावलण्यात आलेले बंडखोर पक्षाला धडा शिकवण्याच्या तयारीत आहेत. अशा २२ बंडोबांवर विविध पोलिस स्टेशनमध्ये गुन्हे दाखल आहेत.
पक्षनिहाय गुन्हे दाखल असलेले उमेदवार
शिवसेना : अशोक सातभाई, संतोष साळवे, अंबादास ताजनपुरे, सत्यभामा गाडेकर, कैलास चुंबळे, प्रवीण तिदमे, सुधाकर बडगुजर, दिलीप दातीर, दीपक दातीर, प्रशांत दिवे, शैलेश ढगे, गिरीश मुदलियार, सुमन सोनवणे, सूर्यकांत लवटे, केशव पोरजे, सुदाम डेमसे, अजय बोरस्ते, भगवान भोगे (शिवसेना पुरस्कृत), संजय चव्हाण (शिवसेना पुरस्कृत), सचिन मराठे, विशाल कदम, सिद्धेश्वर अंडे
भाजप : विशाल संगमनेरे, संभाजी मोरुस्कर, भगवान दोंदे, सुदाम कोंबडे, नरेंद्र पवार, हेमंत शेट्टी, दिनकर पाटील, शिवाजी गांगुर्डे, दामोदर मानकर, उद्धव निमसे, मुकेश शहाणे
मनसे : अतुल सानप, गणेश मोरे, अस्लम मणियार, पद्मिनी वारे, योगेश शेवरे, सत्यम खंडाळे, अशोक मुर्तडक, विशाल ऊर्फ बंटी कोळी, संदीप भवर, अनंत सूर्यवंशी
काँग्रेस-राष्ट्रवादी आघाडी : संदीप काकळीज, विकी खेलुस्कर, राजेंद्र महाले, संगीता आव्हाड, लक्ष्मण जायभावे, राहुल दिवे, शशिकांत उन्हवणे, चंद्रकांत साडे, विनोद सोळंकी, समीर कांबळे, हेमलता पाटील, शैलेश कुटे, वत्सला खैरे, गजानन शेलार, कविता कर्डक, गौरव गोवर्धने, सुफियान जीन, सचिन मंडलिक.
अपक्ष : संतोष कांबळे, पवन पवार, हरिश भडांगे, माधुरी भोळे, कुंदा सहाणे, रविकिरण घोलप, महेश आव्हाड, मधुकर हिंगमिरे, राकेश साळुंके, चांगदेव गुंजाळ, ईश्वर कदम, नासीर पठाण, मृणाल राजे घोडके, गंगूबाई गुडेकर, अरुण पाटील, अमर काळे, आकाश पवार, संतोष गायकवाड, पद्मा वाघ, सुरेश पाटील, ज्वाला शिंदे, गणेश धोत्रे.
अन्य पक्ष : सुनील कांबळे, बापू सोनवणे, संजय भालेराव, प्रकाश लोंढे, सीताराम ठोंबरे, दीपक डोके.
मोबाइल अॅप डाउनलोड करा आणि राहा अपडेट
