चावडी अन् कट्या-कट्ट्यावर चर्चांचे फड रंगू लागले होते... देशात वा राज्यात काय होणार यापेक्षा आपापल्या प्रभागाचंच प्रत्येकाला पडलं होतं... वर्कर अन् सामान्यांच्याही नसानसात पॉलिटिक्स भिनलेलं असल्यानं दारोदारी अन् घरोघरी त्याची चर्चा होणंही तसं साहजिकच होतं... चावडीवर तर सगळ्यांचीच मापं काढली जात होती...
ग्रामस्थ-१ : आपण उभ्या आयुष्यात लई इलेक्शन पाह्यलं, काही खेळलो बी... पण यंदासारखं किचकट अन् अवघड इलेक्शन नाही पाह्यलं राव... एका माणसाला चार मतं टाकायची आहेत...
ग्रामस्थ-२ : अरं, खेळातसुद्धा पहिले तीनच विनर काढले जातात, इथं तर चौघे काढायचे आहेत... अडाणी माणसाचं कामच राह्यलं नाही मंडळी...
ग्रामस्थ-१ : अरं, यंदा ताई-माई-आक्कावर नेमका कशावर मारू शिक्का, असं म्हणण्याची वेळ आली आहे राव... विचारसुद्धा पक्का व्हायला वेळ लागतोय...
ग्रामस्थ-३ : ह्ये क्लिस्ट इलेक्शन आसलं तरी ते समजून तर घ्यायाला पाहिजेच राव... त्ये डेमो सुरू केलंत ना म्हणे... तिथं बघायचं... नाहीतर नातवाकडून मोबाइलवर शोधायचं कसं व्होटिंग करायचं ते... व्होटिंग तर करावेच लागणार ना भाऊ!
ग्रामस्थ-१ : निवडून येतील चार अन् कामाच्या वेळेला एक नाही हाजिर व्हायचा... वरून ह्या भागातून मतं मिळाली नाही म्हणून काम नाही करणार... तिथं माझे वर्करच नाही, अशी कारणं सांगून चौकडी काम नाही करायची राव!
ग्रामस्थ-३ : सरकार तर म्हणतंय की मोठ्या पॅनेलमुळे प्रभागाचा विकास सोपा होईल…?
ग्रामस्थ-१ : विकासबिकास काही नाही...पण, मोठ्या पार्टीवाल्यांचा विजय नक्कीच सोपा होईल अशी शाळा आहे ही...
ग्रामस्थ-२ : पण यंदा एक लई बरं झालं... पॅनल मोठं झाल्यानं खूप लोकांना चान्स मिळतोय इलेक्शनचा... त्यो आपला बाळ्या आत्ता कुठं पंचविशीत असंल, मिळालं नव्हं त्याला तिकीट... उद्या नगरसेवकसुद्धा होईल...
ग्रामस्थ-३ : व्हय व्हय... यंदा तरणी पोरं लई आहेत इलेक्शनमंधी.. लोकशाहीसाठी ही चांगली गोष्ट आहे... नवीन लोकांना चान्स मिळायलाच हवा...
ग्रामस्थ-१ ः अरं, सगळी पोरं नाही निवडून येत... काही बरबादसुद्धा होतात यातून... इलेक्शन लई वाईट गोष्ट आहे... त्याची नशा चढली की काही खरं नाही... पंचविशीतली जेवढी पोरं इलेक्शनमंधी उभी आहेत, त्यापेक्षा जास्त पोरं आता बीअर बारच्या बाहेर उभी दिसतात... (सीनिअर मंडळींना हा मुद्दा पक्का पटला होता... नव्या पिढीचं काय होणार हा विचार करीत चार सदस्यीय पॅनल क्लिष्टच आहे, यावर त्यांचं एकमत झालं होतं.)
मोबाइल अॅप डाउनलोड करा आणि राहा अपडेट
