म. टा. प्रतिनिधी, नाशिक शहरात आज आदिवासींचा कुभमेळा भरला असून, जास्तीत जास्त नाशिककरांनी कलेचा अस्वाद घ्यावा. सध्या कलेमध्ये शुध्दता राहिलेली नाही. आदिवासींचीच एकमेव कला शुध्द आहे. हा आपल्या संस्कृतीचा ठेवा आहे. या आदिवासींना मूळ प्रवाहात आणणे प्रत्येकाचे कर्तव्य असल्याचे प्रतिपादन नॅशनल स्कूल ऑफ ड्रामाचे संचालक वामन केंद्रे यांनी केले. दिल्लीतील नॅशनल स्कूल ऑफ ड्रामा आणि नाशिक महापालिका यांच्यातर्फे आयोजित भारतीय आदिवासी लोककलेवर आधारित 'आदिरंग'महोत्सवाला शुक्रवारी संध्याकाळी मान्यवरांच्या उपस्थितीत शुभारंभ झाला. त्यावेळी ते बोलत होते. भाभानगरमधील दादासाहेब गायकवाड सभागृहात हा महोत्सव सुरू झाला आहे. यावेळी महापौर अशोक मुर्तडक, उपमहापौर, गुरुमीत बग्गा, एनएसडीचे व्हाइस चेअरमन अर्जुनदेव चरण, ज्येष्ठ अभिनेत्री हिमानी शिवपुरी, जनसंपर्क अधिकारी ए. के. बरुआ उपस्थित होते. यावेळी केंद्रे पुढे म्हणाले की, नाशिकने मला खूप काही दिले आहे. याच मातीतून अनेक कलावंत जन्माला आले आहेत. याचा आम्हाला अभिमान आहे. कोणतेही राष्ट्र त्याच्याकडे असलेल्या शस्त्रसाठ्यानुसार ते बलाढ्य आहे असे समजले जात नाही, तर तेथील संस्कृती किती चांगली आहे यावर त्याचे मोठेपण अवलंबून असते. येथे आदिवासींच्या कलेची शुध्दता उधळायला आलो आहोत. २०१४ पासून आदिरंग महोत्सवाला सुरुवात झाली असून हा नववा कार्यक्रम आहे. महापौर अशोक मुर्तडक म्हणाले की, एनएसडीसारख्या संस्थेने आम्हाला कधीही हाक मारावी. आम्ही त्यांच्यासाठी तत्पर आहोत. यावेळी उपमहापौर गुरुमित बग्गा, हिमानी शिवपुरी, अर्जूनदेव चरण यांनीही आपले विचार मांडले. महोत्सवात २२ राज्यांतील पाचशेपेक्षा अधिक आदिवासी कलाकार सहभागी झाले असून, यात नृत्य, नाट्य, संगीत, हस्तकलांचा समावेश आहे. भारतीय आदिवासी सांस्कृतिक वारसा दर्शवणारे प्रदर्शनही या महोत्सवाचा भाग आहे. या प्रदर्शनाच्या माध्यमातून आदिवासी कला, पारंपरिक आदिवासी वाद्ये दागिने, पोशाख, चित्रे आणि देशाच्या विभिन्न भागातील घरगुती वस्तू यांचा वारसा दाखविण्यात आला आहे. ईशान्येकडील राज्यांमधील काही जमाती त्यांच्या परंपरा, संस्कृती, श्रध्दा त्यांच्या मान्यता त्यांचे विधी मुख्य प्रवाहापासून अजूनही दूर आहेत. आदिरंगच्या माध्यमातून हा अनमोल वारसा या महोत्सवात मांडण्यात आला आहे. सुत्रसंचलन लईक हुसेन तर ए. के. बरुआ यांनी आभार मानले.
कार्यशाळा घेणार नॅशनल स्कूल ऑफ ड्रामा व कुसुमाग्रज प्रतिष्ठान यांच्या संयुक्त विद्यामाने एक महिन्याच्या कार्यशाळेचे आयोजन करणार असल्याची घोषणा केंद्रे यांनी केली. सादर झालेली नृत्ये थापेत्ता गुल्लू नृत्य, काबली नृत्य, ढाल थुंगरी, पैका नृत्य, चदैय्या नृत्य, सोंगी मुखवटे, गुदूम बाजा, सिला कर्मा, सहारिया स्वांग, चक्री नृत्य, राठवा नृत्य, भारलादू नृत्य, गौड मारिया नृत्य, धनगरी गाजा नृत्य, छापेली-घासियारी, सैगरी नृत्य, संथाली नृत्य, बंजारा नृत्य, तमंग-लिंबू, स्वग्रई मोग, बेडा रास, पूंग चोलम ही नृत्ये सादर करण्यात आली.
मोबाइल अॅप डाउनलोड करा आणि राहा अपडेट