टीम मटा सोमवारी रात्रीपासून सुरू असलेला पाऊस मंगळवारी दिवसभर सुरू असल्याने जिल्ह्यातील बहुतांश धरणे, तलाव, बंधारे पूर्णपणे भरली. अनेक ठिकाणी पूल खचले, तर काही गावांचा संपर्क तुटला. निफाड तालुक्यातील सायखेडा, चांदोरीला गोदावरीच्या पाण्याने वेढा दिल्याने अनेकांना सुरक्ष‌तिस्थळी हलविण्यात आले.
कळवण तालुक्यात गावांचा संपर्क तुटला शहर व तालुक्यात जोरदार पावसामुळे जनजीवन विस्कळीत झाले. दळणवळणाचा मुख्य आधार असलेले अनेक रस्ते मोठ्या प्रमाणात पाण्याखाली गेले. अनेक पूल पाण्याखाली गावांचा संपर्क तुटला.कळवणच्या पश्चिम पट्ट्यातील शेवटचे टोक असणाऱ्या व पुनद धरणाच्या पाठीमागील बाजूचा जुना पूल संरक्षक भिंती नसल्यामुळे गेल्यावर्षीप्रमाणे यंदाही तुटल्याने वाहतूक ठप्प झाली. यामुळे उंबरदे, तिळगव्हाण या गावांसह काही पाड्यांचा सर्वार्थाने संपर्क तुटला आहे. एकलहरे रस्त्यावर गिरणा नदीवरील पूल पाण्याखाली बुडाल्याने एकलहरे, हिंगळवाडी, हिंगवे, गोपाळखडी ढेकाळे व बालापूर या गावांचा संपर्क तुटला आहे. सप्तशृंग गडावर काही प्रमाणात दरडी कोसळल्या आहेत. चणकापूर धरणातून सकाळी १८ हजार क्युसेक पाणी सोडण्यात आले असून, पुनद धरणातून १० हजार क्यूसेकचा विसर्ग करण्यात आला. नदी काठच्या गावांना सतर्कतेचा इशारा देण्यात आल्याची माहिती तहसीलदार कैलास चावडे यांनी दिली. तालुक्यातील नवी बेज, जुनी बेज, विसापूर, पिळकोस, भादवण, चाचेर, गांगवन, बिजोरे आदी परिसरातील शेतांमध्ये पाणी घुसले असून बेजहून भादवणकडे जाणाऱ्या पुलाखाली पाण्याच्या क्षमतेतही मोठ्या प्रमाणात वाढ झाली आहे. ओतूर धरण भरण्याच्या मार्गावर असून सांडवा सोडण्यात आला आहे.
मोसम खोऱ्यात मुसळधार; चणकापूरच्या साठ्यात वाढ शहर व तालुक्यात सोमवारी रात्रीपासून सुरू झालेल्या संततधार पाऊस मंगळवार सायंकाळपर्यंत सुरुच होता. गिरणा मोसम नदी क्षेत्रात व हरणबारी- चणकापूर धरणक्षेत्रातही मुसळधार पाऊस झाल्याने नदीपात्रात पाणी सोडण्यात आले आहे. मालेगाव शहरात गेल्या २४ तासात २० मि.मी. इतका पाऊस झाला आहे. गिरणा नदीवरील चणकापूर धरणसाठ्यात मोठी वाढ झाल्याने ६४.२८ टक्के भरले असून नदीपात्रात १६ हजार ६६९ क्युसेक पाणी सोडण्यात आले आहे. तर हरणबारी धरण शंभर टक्के भरले आहे. येथून मोसम नदीपात्रात ५ हजार ६४० क्युसेक पाणी सोडण्यात आले आहे. यामुळे नदीकाठाच्या गावांना सतर्कतेचा इशारा देण्यात आला आहे. जून महिन्यात दमदार पावसाची प्रतीक्षा करावी लागल्यानंतर जुलै महिन्यात पावसाचे जोरदार आगमन झाले होते. ऑगस्टच्या सुरुवातीलाच शहर व तालुक्यात सर्वत्र पावसाने जोर धरला.
गिरणा, मोसम नद्यांना पूर गिरणा व मोसम नदीक्षेत्रात मुसळधार पाऊस झाल्याने नद्यांना पूर आला आहे. गिरणा नदीवरील चणकापूर धरण क्षेत्रात १०० मिमी इतका पाऊस झाला. त्यामुळे धरणातून नदीला १६ हजार क्युसेक वेगाने पाणी सोडण्यात आल्याने नदी दुथडी भरून वाहते आहे. दुपारपर्यंत मालेगाव तालुक्यात हे पाणी पोहचल्याने नदी काठाच्या गावांना सतर्कतेचे आदेश प्रशासनाकडून देण्यात आले आहे. हरणबारी धरण भरले असून मोसमातील पहिलेच पूरपाणी नदीला सोडण्यात आले आहे. हरणबारी धरण क्षेत्रात देखील ५० मि.मी. इतका पाऊस झाला असल्याने ५ हजार ५४८ क्युसेक पाणी सोडण्यात आले आहे . उंबरदेसह परिसरातील नऊ ते दहा गावांमध्ये पावसाचे पाणी घुसल्याने तेथील गावांचा संपर्क तुटून वाहतूक व्यवस्थाही कोलमडली आहे. साकोरे गावातील सिमेंट बंधारा खचल्यामुळे गावाचा संपर्क तुटला होता.
सिन्नरला बंधारे भरले सिन्नर ः शहर व तालुक्यात सोमवार रात्रीपासून सुरू असलेल्या पावसामुळे तालुक्यातील मोठ्या धरणासह लहान मोठेही बंधारे ओव्हर फ्लो झाले असून नद्या नाले दुथडी भरून वाहत आहेत. पास्ते येथील नदीला पूर आल्याने एक तीस वर्षीय व्यक्ती पुरात वाहून गेली आहे. तालुक्यातील अनेक गावांचा संपर्क तुटल्याने आपत्ती व्यवस्थापन जागरूक झाले आहे. शिवनदीला पूर आल्याने डुबेरे, ठाणगाव गावांचा संपर्क तुटला आहे. भोजापूर व सरदवाडी धरण ओव्हर फ्लो झाले. चांदोरी, सायखेड्यात शिरले पाणी निफाड - सोमवारी रात्रभर झालेल्या पावसाने निफाड तालुक्याच्या अनेक भागात पुतपरिस्थिती निर्माण झाली. गोदावरी आणि कादवा आणि ओझर परिसरातून वाहणाऱ्या बाणगंगा या नद्यांना पूर आल्याने नदीकाठावर राहणाऱ्या राहिवाशांना हलवावे लागले. सायखेडा आणि चांदोरीत पुराची परिस्थिती गंभीर असून गोदावरीला पाणी सोडल्याने आणि रात्रभर पाऊस चालू असल्याने दोन्ही गावामध्ये पुराचे पाणी शिरले. शंभर ते दीडशे कुटुंबाना प्रशासनाने सुरक्षितस्थळी हलवले आहे. रस्त्यावर पाणी असल्याने सायखेडा-सिन्नर मार्ग वाहतुकीसाठी बंद करण्यात आला. करंजगाव येथील जिजाबाईची गढीला पाण्याने वेढा दिला असून पुराच्या पाण्याचा वेग इतका होता की कादवा आणि गोदावरी नदी काठावर असणाऱ्या वीट भट्ट्यांना मोठा फटका बसला. सायखेड्याकडून सिन्नरकडे जाणाऱ्या रस्त्यावर तीन ठिकाणचे ओहोळ ओव्हरफ्लो झाल्यामुळे मंगळवारी सकाळपासूनच या दोन्ही बाजारपेठेच्या शहरांचा संपर्क तुटला होता. ओझर, निफाड, चांदवडकडून सिन्नरला जाण्याचा हा जवळचा मार्ग आहे. या मार्गावरील चाटोरीच्या पुढचा ओहोळ तसेच नायगावच्या अलिकडच्या खोल्या ओहोळावर असलेल्या पुलांवरून सहा ते सात फुट इतके पाणी वाहत होते. निफाड येथील कादवा नदीला पुराचे पाणी थेट वैनतेय विद्यालयाखालील झोपडपट्टी परिसरात शिरल्याने येथील नागरिकांना निफाड नगर पंचायतीने वैनतेय विद्यालयाच्या सभागृहात आणि ग्रामसंस्कार केंद्रात आश्रयाला पाठवले. श्री संगमेश्वेर मंदिर परिसराला पुराच्या पाण्याने वेढले. नांदूरमध्यमेशवेर धरणातून पाण्याचा विसर्ग करण्यात आला. रौळास पिंपरी व निफाड कारखाना हा रस्ताही कादवा नदीला पूर आले होते.
भाम व भावलीला पूर घोटीः इगतपुरी तालुक्यात गेल्या तीन दिवसापासून पाऊस अधिक आक्रमक झाल्याने जनजीवन पूर्णतः विस्कटले आहे. पावसाने गेल्या अनेक वर्षाची आकडेवारी मोडीत काढत २४ तासात चक्क २१३ मिलीमीटर पावसाची विक्रमी नोंद झाली. दरम्यान, या अतिवृष्टीमुळे दारणा, भाम व भावली नदीला दुसऱ्यांदा पूर आला असून, दारणा, भाम व भावली या नद्यांच्या पुरामुळे घोटी गावालगत दौंडतला जाणारा रस्ता पाण्याखाली गेला.
मनमाडकरांना दिलासा
मनमाड ः पाणीटंचाईने ऐन पावसाळ्यात हवालदिल झालेल्या मनमाडकरांना मुसळधार पावसाने मंगळवारी दिवसभर अव्याहतपणे हजेरी लावून दिलासा दिला. यंदाच्या मोसमातील सर्वाधिक पाऊस मंगळवारी पडल्याने शहरातील नदीला पहिल्यांदाच पाणी आले. शहराला पाणी पुरवठा करणाऱ्या वागदर्डी धरण परिसरात ही चांगला पाऊस झाल्याने धरणात देखील पाणीसाठा वाढला आहे. नांदगाव शहर व परिसरात संततधार पावसाने हजेरी लावली. चांदवड शहर व परिसरात मंगळवारी सकाळी पावसाचे आगमन झाले. मात्र जोरदार पावसाची अपेक्षा असताना रिमझिम पाऊस सुरू असल्याने नागरिकांची निराशा झाली
हरणबारी धरण 'ओव्हरफ्लो' सटाणा ः बागलाण तालुक्यासह सटाणा शहरात सोमवार रात्रीपासून मंगळवार दुपारपर्यंत मुसळधार पावसाने जनजीवन पुर्णत: विस्कळीत झाले. या पावसाने तालुक्यातील हरणबारी धरण ओव्हरफ्लो होऊन पाणी वाहते आहे. केळझर धरण ८८ टक्के भरले आहे. निताणे येथे लोकसहभागातून बांधलेला बंधारा फुटल्याने परिसरात पाणीच पाणी झाले. जोरण येथील हत्ती नदीत किकवारी गावाजवळ एक व्यक्ती वाहून गेल्याने त्यांचा मृतदेह काढण्यात पोलिसप्रशासनाला यश आले आहे. वीरगांव केरसाने रस्त्यावरील पुल फरशी वाहून गेल्याने संपर्क तुटला असून सार्वजनिक पाणीपुरवठा करणाऱ्या विहिरचे नुकसान झाले आहे. करंजाड येथे केटीवेअर बंधारा फुटल्याने स्मशानभूमीसह पत्र्याचे शेड पुरात वाहून गेले आहे. बिजोटे निताणे बांध फुटल्याने पाणीच पाणी झाले. शहरातील आरम नदीला पूर आला असून, शहरवासियांनी पूर बघण्यसाठी एकच गर्दी केली. शहराला पाणीपुरवठा करणाऱ्या ठेंगोंडा येथील गिरणा नदीचे पात्र दुथडी भरून वाहू लागले असून, चणकापूर धरणातून १८ हजार ५२४ क्युसेक पाणी सोडल्याने नदीकाठावरील गावांना सर्तकतेचा इशारा देण्यात आला आहे.
मोबाइल अॅप डाउनलोड करा आणि राहा अपडेट
