अल्पावधीतच नाशिककरांच्या मनात आपले स्थान बळकट करणाऱ्या 'महाराष्ट्र टाइम्स'चा बुधवारी, ८ जून रोजी वर्धापनदिन होणार आहे. यानिमित्त सोमवार, सहा जूनपासून विविध सांस्कृतिक कार्यक्रमांसह 'मटा' आपल्या भेटीला येत आहे. त्याचबरोबर बुधवारी वेगवेगळ्या क्षेत्रांतील सहा दिग्गजांशी संवादाचा अनोखा कार्यक्रम नाशिककरांच्या भेटीसाठी आणला आहे. मूळचे नाशिककर नसलेल्या, परंतु तरीही नाशिकच्या शिरपेचात मानाचा तुरा खोवणाऱ्या कला, संगीत, क्रीडा, शिक्षण आणि उद्योग क्षेत्रातील मान्यवरांचा खडतर प्रवास श्रवण करण्याची संधी 'मटा'ने उपलब्ध करून दिली आहे. बुधवारी गंगापूर रोडवरील कुर्तकोटी सभागृह, शंकराचार्य संकुलात सायंकाळी पाचला हा 'मटा संवाद' रंगणार आहे.
निष्पक्ष आणि निर्भीड वृत्तपत्र अशी वाचकांच्या पसंतीची पावती मिळविणारा 'मटा' नाशिकमध्ये आठ जून रोजी सहाव्या वर्षात पदार्पण करीत आहे. अल्पावधीतच 'मटा'ने नाशिककरांचा विश्वास संपादन करीत त्यांच्या मनात अढळ स्थान निर्माण केले. पौराणिक आणि ऐतिहासिक वारसा जोपासणाऱ्या अन् विकासाकडे झेपावणाऱ्या नाशिकनगरीची स्पंदने अलवार टिपली. आक्रमकपणा तसूभरही कमी होऊ न देता गैरप्रकारांवर कोरडे ओढले. चांगल्याचे कौतुक केले अन् यशाला गवसणी घालणाऱ्यांच्या पाठीवर अभिमानाने कौतुकाची थापही दिली. वर्धापन दिनानिमित्त विविध उपक्रमांची आणि कार्यक्रमांची मेजवानी नाशिककरांना मिळणार आहे. मंत्रभूमी ते यंत्रभूमी असा प्रवास करणाऱ्या अन् सांस्कृतिक ठेवा जपतानाच स्मार्ट बनू पाहणाऱ्या या नगरीने अनेक कलारत्नांना मानसन्मान दिला. या रत्नांनीदेखील नाशिकचा बहुमान वाढविला. मूळचे नाशिकचे नसलेले, परंतु आता पक्के नाशिककर म्हणून ओळखले जाणारे ज्येष्ठ क्रीडा मानसशास्त्रज्ञ डॉ. भीष्मराज बाम, जयपूर घराण्याच्या नामवंत गायिका मंजिरी असनारे केळकर, ज्येष्ठ गायिका रागिनी कामतीकर, सपकाळ नॉलेज हबचे रवींद्र सपकाळ, पंडित भीमसेन जोशी यांचे शिष्य गायक अविराज तायडे, उद्योजक देवेंद्र बापट या सर्वांनीच आपापल्या क्षेत्रात चमकदार कामगिरी करून नाशिकचा लौकीक वाढविला. या मान्यवरांना ऐकण्याची संधी 'मटा'ने नाशिककरांना उपलब्ध करून दिली आहे. यापूर्वी 'मटा' संवादमध्ये हत्तींशी संवाद साधणारे आनंद शिंदे या अवलियाचा परिचय वाचकांना झाला. पशू-पक्ष्यांची भाषा जाणणारे आणि त्यांचा हुबेहूब आवाज काढणारे अकोले तालुक्यातील ठकाबाबा गांगड यांच्याशी 'मटा'ने साधलेला संवाददेखील वाचकांना अनोखा अनुभव देऊन गेला. बुधवारी रंगणाऱ्या 'मटा संवाद'चा अवश्य आस्वाद घ्यावा, असे आवाहन करण्यात येत आहे.
मोबाइल अॅप डाउनलोड करा आणि राहा अपडेट
