उच्च शिक्षण संचालनालयाकडून २०१६-१७ या शैक्षणिक वर्षाच्या लॉ अभ्यासक्रमासाठी यंदा प्रथमच सीईटी परीक्षा घेण्यात येणार आहे. लॉच्या तीन वर्षीय व पाच वर्षीय या दोन्ही अभ्यासक्रमांसाठी ही परीक्षा घेतली जाणार आहे. येत्या २२ मेला राज्यभरात ही १५० मार्कांची परीक्षा घेतली जाणार आहे.
लॉ अभ्यासक्रमाला सर्वच शाखांचे विद्यार्थी प्रवेश घेऊ शकत असल्याने अनेकदा या महत्त्वाच्या अभ्यासक्रमाकडे तितकेसे गांभीर्याने न पाहता दुय्यम भावनेने पाहिले जाते. एखादा कोर्स करता करता कायद्याची जाण मिळविण्यासाठी म्हणून विद्यार्थी या अभ्यासक्रमाला प्रवेश घेतात. या परिस्थितीमुळे लॉ अभ्यासक्रमाचा दर्जा ढासळत असल्याचे मध्यंतरी या क्षेत्रातील नामवंतांच्या निदर्शनास आले होते. यामुळे या अभ्यासक्रमाचा दर्जा राखण्यासाठी प्रयत्न केले जात आहे. त्यातील एक भाग म्हणून या परीक्षेचे नियोजन करण्यात आले आहे. लिगल अॅप्टिट्युड, लॉजिकल अॅण्ड अॅनालिट, जनरल नॉलेज, इंग्रजी, बेसिक मॅथ्स या विषयांचा समावेश यामध्ये असणार आहे. दोन तासांची कालावधी या परीक्षेसाठी दिला जाणार असून नकारात्मक गुणांकन पद्धतीचा अवलंब परीक्षेत होणार नाही.
लॉ बरोबरच इंजिनीअरिंग, एमसीए, एमबीए, बीएड, बीपीएड आदी परीक्षांच्या सीईटीच्या तारखाही जाहिर करण्यात आल्या आहेत. लॉ अभ्यासक्रमाची सीईटी २२ मे ला होणार आहे. याचदिवशी हॉटेल मॅनेजमेंट अॅण्ड केटरिंग टेक्नॉलॉजी या अभ्यासक्रमाचीही परीक्षा होणार असल्याने ज्या विद्यार्थ्यांना कायद्याचा अभ्यास करायचा आहे, तेच सीईटी देतील, अशी आशा व्यक्त केली जात आहे.
मोबाइल अॅप डाउनलोड करा आणि राहा अपडेट