नेत्यांच्या पक्षांतर चर्चेमुळे ढवळले राजकीय वातावरण
म. टा. प्रतिनिधी, नाशिक
महापालिका निवडणुकीच्या पार्श्वभूमीवर राजकीय रंग भरण्यास सुरुवात झाली आहे. भाजप प्रदेशाध्यक्ष रावसाहेब दानवे यांच्या उपस्थितीत विविध पक्षांचे शेकडो कार्यकर्ते, पदाधिकारी पक्षांतर करणार असून त्याचे पडसाद उमटू लागले आहेत.
लोकसभा, विधानसभेत मुसंडी मारणाऱ्या भाजपने आता महापालिकेची सत्ता ताब्यात घेण्यासाठी व्यूहरचना केली आहे. भाजपची पक्षांतर नाट्याची धुरा माजी आमदार वसंत गिते, सचिन ठाकरे यांच्याकडे सोपवण्यात आली आहे. गिते यांनी भाजप प्रवेश करताना मनसेला खिंडार पाडण्याची तयारी केली. प्रत्यक्षात मात्र तसे झाले नाही. आता, फेब्रुवारी २०१७ मध्ये होणाऱ्या महापालिका निवडणुकीसाठी भाजपने संघटनेची ताकद वाढवण्यासाठी कंबर कसली आहे. भाजप प्रवेशावेळी गितेंसोबत आलेल्या नगरसेवकांना कारवाईला समोरे जावे लागले असते तसेच निधीलाही कात्री लागली असती. आता परिस्थिती बदलली असून मोठ्या प्रमाणावर पक्षांतर होण्याची शक्यता व्यक्त होते आहे. गेल्या काही दिवसांपासून गुप्त बैठकांचे सत्र पार पडते आहे. दानवे याच्या उपस्थितीत रविवारी (दि. २७) होणाऱ्या कार्यक्रमात प्रमुख राजकीय पक्षातील पदाधिकारी, नगरसेवक भाजपात प्रवेश करणार असल्याची माहिती शहराध्यक्ष लक्ष्मण सावजी यांनी दिली. मनसे, काँग्रेस व इतर पक्षाचे किमान २८ नगरसेवक भाजपच्या संपर्कात आहेत. मनसेच्या काही नगरसेवकांनी तर २०१६ मध्ये ब्रॅण्डींगसाठी वापरले जाणारे कॅलेडर व इतर साहित्य सुध्दा भाजपच्या नावाने तयार केल्याची चर्चा सुरू आहे. मनसेचे २०१२ मध्ये महापालिका निवडणुकीत ४० सदस्य निवडून आले. हेमंत गोडसे, संपत शेलार, नगरसेवका शिंदे यांच्या रुपाने मनसेला खिंडार पडले. माजी महापौर यतीन वाघ सुध्दा अज्ञातवासात असून त्यांचा भाजपप्रवेश पक्का मानला जातो आहे. दरम्यान, होणाऱ्या डॅमेज कंट्रोलला रोखण्यासाठी मनसेकडून कोणतीही तयारी केली जात नसल्याचे चित्र सध्या तरी दिसते.
मोबाइल अॅप डाउनलोड करा आणि राहा अपडेट
