सिंहस्थासाठी सहा कायम व चार तात्पुरती अग्निशमन केंद्रे सज्ज
म. टा. प्रतिनिधी, नाशिक
नाशिक-त्र्यंबकेश्वर येथे होणाऱ्या सिंहस्थ कुंभमेळ्यादरम्यान आपत्ती व्यवस्थापनासाठी नाशिक महानगरपालिकेच्या अग्निशमन विभागाने कंबर कसली आहे. आपत्तीप्रसंगी किमान दोन ते तीन मिनिटातच तातडीने प्रतिसाद देण्यासाठी अत्याधुनिक उपकरणे आणि वाहनांसह अग्निशमन यंत्रणा सज्ज झाली आहे. यासाठी विशिष्ट प्रकारच्या वाहनांची निर्मिती करण्यात आली असून, गल्लीबोळात जाऊन ते परिस्थितीचा सामना करू शकणार आहेत.
दुर्घटनांच्या वेळी सर्वात जलद कृतीची जबाबदारी ही अग्निशामक विभागाची असते. त्यासाठी महापालिकेचा अग्निशामक विभाग सज्ज झाला आहे. नाशिक शहरातील सहा अग्निशमन केंद्र तसेच साधुग्राममधील चार तात्पुरत्या अग्निशामक केंद्रांसह विविध भागात दोन पथके कार्यन्वित करण्यात येणार आहेत. फायर इंजिनीअरिंगचा एक वर्षाचा प्रशिक्षण पूर्ण केलेल्या प्रशिक्षणार्थी युवकांनाही या कुंभमेळ्यात सहभागी करून घेण्याचा निर्णय प्रशासनाने घेतला आहे. अग्निशामक दलामध्ये क्विक रिस्पॉन्स व्हेईकल्स, ब्रिदिंग ऑपरेटस व्हॅन, रेस्क्यू उपकरणे, अॅडव्हान्स्ड इमर्जन्सी रेस्क्यू व्हॅन, फ्लड रेस्क्यू व्हॅन आदी वाहने व उपकरणे अग्निशामक दलाच्या ताफ्यात समाविष्ट केली आहेत.
नदीच्या पाणीपातळीत वाढ झाल्यास जलसंपदा विभागाशी समन्वय साधून ते इतरत्र वळविण्याबरोबरच घाट आणि नदीकाठी पोहणाऱ्यांचे जीवरक्षक पथक फ्लड रेस्क्यू लाँचर, लाईफ रिंग्ज, लाईफ जॅकेट्स, फायबर व रबर बोटस् आदी आवश्यक जीवरक्षक साहित्यासह तैनात ठेवले जाणार आहे. अशा आपत्तीच्या वेळी नागरिकांना एका ठिकाणी जमविण्यासाठी जागेची आणि नंतर पुनर्वसनासाठी स्थळेही निश्चित केली आहेत. गर्दीच्या वेळी अग्निशमन बंब तत्काळ पोहोचण्यासाठी प्रशासकीय राखीव मार्गाचा वापर केला जाणार आहे. शहरातील सहा अग्निशमन केंद्रांबरोबरच कुंभमेळ्याच्या काळात साधुग्राम, बाह्य वाहनतळे, अंतर्गत वाहनतळे, भाविक थांबणारे क्षेत्र (स्टेजिंग एरिया) आदी ठिकाणी तात्पुरती अग्निशमन केंद्रे प्रस्तावित केली आहेत. त्र्यंबकेश्वर येथेही अग्निशमन दलाची आठ पथके व एक रेस्क्यू व्हॅन कार्यन्वित करण्यात येणार असून, वाहनतळांवर देखील पथके ठेवण्यात आली आहेत. त्र्यंबकेश्वर येथील अग्निशामक दलाची सहजबाबदारी एमआयडीसीचे विभागीय अग्निशमन अधिकारी मिलिंद ओगले यांच्यावर सोपवण्यात आली आहे.
डायल करा १०१ किंवा १०७७
कुठल्याही आपत्तीला तोंड देण्यासाठी अग्निशमन यंत्रणा सज्ज झाली असून, अनेक ठिकाणी या यंत्रणेने मॉकड्रिल घेतले आहे. २१ वर्ष पूर्ण झालेल्या युवा-युवतींना 'स्वयंसेवक' म्हणून एकदिवसीय प्रशिक्षण दिले आहे. आपत्तीच्या काळात अग्निशमन दलाच्या १०१ या क्रमांकाबरोबरच जिल्हाधिकारी कार्यालयातील आपत्कालिन कक्षात १०७७ या क्रमांकावर हेल्पलाईनवर देखील नागरिकांना संपर्क साधता येणार आहे. कुंभमेळा काळात नाशिक अग्निशामक दलाच्या सहाय्यासाठी पुणे, ठाणे, पिंपरी-चिंचवड, कल्याण-डोंबिवली, नवी मुंबई, वसई-विरार, कोल्हापूर, जळगाव, धुळे, मालेगाव आदी महानगरपालिकांचे तसेच एमआयडीसी, सिडको या प्राधिकरणाचे अग्निशमन बंब त्यांच्या पथकासह उपलब्ध होणार आहेत.
मोबाइल अॅप डाउनलोड करा आणि राहा अपडेट
