म. टा. खास प्रतिनिधी, नाशिक
सन २०१३-१४ या आर्थिक वर्षापेक्षा गेल्या वर्षात महापालिकेच्या मालमत्ता करासह पाणापट्टी वसुलीत वाढ झाली आहे. मात्र, उद्दिष्ट पूर्ण करण्यात यंत्रणेला अपयश आले आहे. मालमत्ताकराचे उद्दिष्ट हे ११५ कोटींचे ठेवण्यात आले होते. त्यापैकी ३१ मार्चपर्यंत ७५ कोटी १९ लाखांची वसुली झाली असून, ती गेल्या वर्षापेक्षा पाच टक्क्यांनी अधिक आहे. पाणीपट्टी कराचे उद्दिष्ट हे ६० कोटींचे ठेवण्यात आले होते. त्यापैकी केवळ ४२ कोटींची वसुली झाली असून, गेल्या वर्षाच्या तुलनेत सात टक्क्यांनी अधिक आहे.
मालमत्ता करासह पाणीपट्टी वसुलीसाठी महापालिकेन मार्च महिन्यात उघडलेल्या वसुली मोहिमेला चांगला प्रतिसाद मिळाला. आयुक्त डॉ. प्रवीण गेडाम यांनी महापालिकेची आर्थिक स्थिती चांगली नसल्याने विविध करांच्या वसुलीवर जोर दिला होता. त्याला चांगला प्रतिसाद मिळाला होता. मार्चमध्ये मालमत्ता कर वसुलीसाठी ७५ हजार मिळकतधारकांना नोटिसा बजावल्या होत्या. तर, काही मालमत्ता जप्तही केल्या होत्या. पाणीपट्टी वसुलीसाठीही ११ हजार जणांना कारणे दाखवा नोटिसा बजावल्या होत्या. त्यामुळे पालिकेच्या तिजोरीत मार्च महिन्यात वसुलीचा जोर वाढला आहे. सन २०१३-१४ मध्ये मालमत्ता कर ७१ कोटी वसूल झाला होता. सन २०१४-१५ मध्ये यात पाच कोटींची वाढ होऊन ७५ कोटी १९ लाखांची वसुली झाली आहे. त्यामुळे गेल्या वर्षाच्या तुलनेत ही वाढ ५.२० टक्के एवढी आहे. सन २०१३-१४ मध्ये पाणीपट्टीतून पालिकेला ३८ कोटी ८५ लाख रुपये मिळाले होते. तर, सन २०१४-१५ मध्ये ही रक्कम ४१ कोटी ६८ लाखांपर्यत गेली आहे. मात्र दिलेल्या उद्दिष्टापेक्षा ही रक्कम १८ कोटींनी कमी आहे. मालमत्ताकराचे उद्दिष्ट हे ११५ कोटींचे दिले आहे. मात्र, वसुली ३० कोटींनी कमी आहे.
घरपट्टी वाढीसाठी प्रयत्न गरजेचे
नाशिक शहराच्या वाढत्या विस्तारात विकासकामांसाठी निधी उपलब्ध होत नसल्याची ओरड नगरसेवक करीत असतात. परंतु, महापालिकेच्या उत्पन्नवाढीत घरपट्टीचे उद्दिष्ट वाढविणार कोण, असा प्रश्न उपस्थित होत आहे. सातपूर व अंबड एमआयडीसी व रहिवाशी भागातील पोटभाडेकरूंची योग्य माहिती महापालिकेने घेतल्यास निश्चितच उत्पन्नात भर पडणार आहे. नागरी सुविधा देताना नगरसेवक व प्रभागातील रहिवाशी यांच्या नेहमीच खटक्या उडत असतात. निधी उपलब्ध होत नसल्याने नगरसेवकही नाराजी व्यक्त करताना दिसतात.
मोबाइल अॅप डाउनलोड करा आणि राहा अपडेट