प्रादेशिक परिवहन विभागातील (आरटीओ) ऑटोमेटिक व्हेईकल इन्स्पेक्शन सर्टिफिकेशन सेंटरमधील (एव्हीईएस) सिस्टिम हॅक केल्या प्रकरणात आणखी काही संशयितांना अटक होण्याची शक्यता पोलिसांनी व्यक्त केली. या गुन्ह्यात अटक केलेल्या संशयितास न्यायालयीन कोठडी मिळाली आहे.
हॅकिंग प्रकरणी सायबर पोलिसांनी दीपक गिरधरलाल पटेल यास मंगळवारी अटक केली. त्यास बुधवारी कोर्टाने एका दिवसाची पोलिस कोठडी सुनावली. मुदत संपल्याने त्यास कोर्टात गुरूवारी पुन्हा हजर केले. दोन्ही बाजुचा युक्तिवाद संपल्यानंतर कोर्टाने पटेलला न्यायालयीन कोठडी सुनावली. ‘आरटीओ’तील स्वयंचलित वाहन तपासणी केंद्रात एमएच १५ इजी ४५२१ व एमएच १५ इजी ४६२१ ही दोन वाहने तपासणीसाठी न आणता त्यांना योग्यता प्रमाणपत्र देण्यात आल्याचे व यासाठी आपला लॉगइन आयडी व पासवर्डचा वापर केल्याचे व्यवसाय मोटार परिवहन निरीक्षक हेमंत हेमाडे यांच्या १९ ऑगस्ट रोजी लक्षात आले. या प्रकरणी त्यांनी सायबर पोलिस स्टेशनमध्ये फिर्याद दिली. सायबर पोलिस स्टेशनचे वरिष्ठ निरीक्षक अनिल पवार यांच्या मार्गदर्शनाखाली तपास सुरू केला असता सदर वाहने सौम्या अर्थमुव्हर्स या नावाने खरेदी करण्यात आल्याचे समोर आले. तसेच ही दोन्ही वाहने महिंद्रा अॅण्ड महिंद्रा फायनान्सने जप्त केल्यानंतर संशयित दीपक पटेल याने खरेदी केलेली वाहने तपासणीसाठी न आणता त्यांचे फिटनेस प्रमाणपत्र तयार केल्याचे उघड झाले. मात्र, पटेल याने हे काम करून घेतले असून, प्रत्यक्ष हॅकिंगची कृती त्याने केलेली नाही.
सदर दोन्ही वाहने जप्त करण्यात आली. या गुन्ह्यात हॅकिंगचे काम नक्की कोणी व कसे केले यावर सध्या काम सुरू आहे. पटेलने मध्यस्थामार्फत सर्टिफिकेट मिळवले असून, त्या व्यक्तीचा शोध सुरू आहे. लवकरच कटाचा हा गुन्हा पूर्णतः स्पष्ट होईल. हॅकिंग प्रकरणात नक्की किती संशयिताचा सहभाग आहे, हे अद्याप स्पष्ट झाले नाही.
- अनिल पवार,
वरिष्ठ निरीक्षक, सायबर पोलिस स्टेशन
मोबाइल अॅप डाउनलोड करा आणि राहा अपडेट