माहेरवाशिणीला जड अंत:करणाने निरोप

August 31, 2017, 3:30 pm

≪ Previous: झगडे यांनी भरला अवयवदानाचा अर्ज

म. टा. खास प्रतिनिधी, नाशिक

‘गणपती बाप्पा मोरया...पुढच्या वर्षी लवकर या!’ असा गजर करत गणेशभक्तांनी दोन दिवसांची माहेरवाशीण आलेल्या गौराईंना व सात दिवसांच्या गणपती बाप्पांना भावपूर्ण निरोप दिला. या निमित्ताने गोदाघाटावर तसेच नदीच्या कडेकडेने विसर्जनासाठी प्रचंड गर्दी झाली होती.

गुरुवारी गौरी विसर्जनाचा दिवस होता. गणपतीच्या तिसऱ्या दिवशी गौरी म्हणजे माहेरवाशिण घरी येते, अशी आख्यायिका आहे. गौरी साधारणपणे तीन दिवस असतात. पहिला दिवस आगमनाचा, दुसरा पूजनाचा आणि तिसरा विसर्जनाचा. गौरींचे विसर्जन जिथे केले जाते, त्या नदी तलावातील काही दगड आणून ते घरी ठेवण्याची पद्धत आहे. सुखसमृद्धी आणि पिकांची भरघोस वाढ व्हावी, ही त्यामागची श्रद्धा आहे. गणेशोत्सवाच्या तिसऱ्या दिवशी आलेल्या माहेरवासिनी गौरींना मोठ्या उत्साहात निरोप देण्यात आला. गौरी पूजनाला केलेला लाडू, चिवडा, शंकरपाळे असा फराळ भाविकांना प्रसाद म्हणूनही ठिकठिकाणी वाटण्यात येत होता. दुपारी गौराईंची पूजा केल्यानंतर बाजरीची भाकरी, गोडधोड पदार्थाचा नैवेद्य असलेली शिदोरी बांधली. या शिदोरीचे गौराईसोबत विसर्जन करण्यात आले. माहेरवाशीण आलेल्या गौराईंचे कौतुक करताना महिलांचे डोळे पाणावले होते. गौरी विसर्जनासाठी परंपरेनुसार केवळ महिलाच येतात. परंतु, काहीजण सहकुटुंब आले होते. गणपती बाप्पा, गौराईंसोबत सेल्फी काढून घेताना गणेशभक्त दिसत होते. बाप्पांचे दर्शन घेण्यासाठी गोदाघाटावर भक्तांची मांदियाळी होती. विसर्जन सोहळा निर्विघ्न पार पडण्यासाठी रस्ते, घाटावर पोलिसांचा कडेकोट बंदोबस्त होता. वाहतूक पोल‌िस, स्वयंसेवक, महापालिका कर्मचारी, सुरक्षा रक्षक, कर्मचारी सज्ज होते.

सात दिवसांच्या गणेशमूर्तींसोबत गौरींनाही गोदाघाट, चोपडा लॉन्स, सोमेश्वर या ठिकाणी भक्तिभावात निरोप देण्यात आला. दुपारच्या दरम्यान गणपती व गौरी विसर्जनासाठी गर्दी वाढू लागली. घरगुती गौरी-गणेशमूर्तींसोबत काही ठिकाणच्या सार्वजनिक गणेशमूर्तींचेही सातव्या दिवशी विसर्जन करण्यात आले.

Latest Images