म. टा. प्रतिनिधी, नाशिक
राज्यातील दुसऱ्या क्रमांकाची शिक्षणसंस्था असणाऱ्या मराठा विद्या प्रसारक संस्थेत अखेर सत्ताधारी प्रगती पॅनललाच सभासदांनी कौल दिला. जिल्ह्यातील संचालकांच्या १३ पैकी १३ जागांवर अटीतटीच्या परिस्थितीत विजयश्री खेचून आणत प्रगतीने संस्थेवरील वर्चस्व सिध्द केले. याशिवाय अध्यक्ष , सभापती , उपसभापती , चिटणीस आणि घटनेतील सर्वोच्च पद असलेल्या सरचिटणीस या पदाधिकाऱ्यांच्या जागांवरही निर्विवाद वर्चस्व मिळवित विजयाचे निशाण रोवले आहे. नीलिमा पवार यांच्या कार्यकाळातील हा सर्वांत मोठा विजय मविप्रमध्ये मानला जात आहे.
विरोधकांनी सत्ताधाऱ्यांसमोर अत्यंत ताकदीचे आव्हान उभे केल्यानंतरही सत्ताधारी प्रगती पॅनलने विरोधी समाज विकास पॅनलचा पूर्ण धुव्वा उडविला. तरीही, सेवक पदाच्या तीन जागांवर समाज विकास पॅनलला अनुकूल असणाऱ्या त्रिकूटाने विजय मिळवत काही अंशी संघर्षाचे अस्तित्व कायम राखले. २१ जागांसाठी अंतिमत: ४९ उमेदवारांमध्ये लढत झाली. सरचिटणीसपदासाठी झालेल्या चुरशीच्या लढतीत विद्यमान सरचिटणीस नीलिमा पवार यांनी विद्यमान सभापती अॅड. नितीन ठाकरे यांच्यावर १४५ मतांनी विजय मिळविला. अध्यक्षपदासाठीही चुरशीची लढत झाली. यात विद्यमान प्रतापदादा सोनवणे यांच्यावर डॉ. तुषार शेवाळे यांनी विजय मिळविला. सभापतिपदासाठी दिलीपराव बोरस्ते यांच्यावर माणिकराव बोरस्ते यांनी विजय मिळविला. चिटणीसपदासाठी डॉ. सुनिल ढिकले यांनी नानासाहेब बोरस्ते यांचा पराभव केला.
मविप्रच्या विजयी उमेदवारांना मिळालेली एकूण मते
अध्यक्ष : डॉ. तुषार शेवाळे : ४९७०, सभापती : माणिकराव बोरस्ते : ४८३८, उपसभापती : राघो आहिरे : ४५३८, सरचिटणीस : नीलिमा पवार : ४७४६,
चिटणीस : डॉ. सुनिल ढिकले ७२४४, इगतपुरी : भाऊ खताळे : ५००८, कळवण व सुरगाणा : अशोक पवार : ५१४०, चांदवड : उत्तम भालेराव : ४८८१,
दिंडोरी व पेठ : दत्तात्रय पाटील : ४७६७, नाशिक : नाना महाले : ४९३०, निफाड : प्रल्हाद गडाख : ४७१२, नांदगांव : दिलीप पाटील : ४९४१,
सटाणा : डॉ. प्रशांत देवरे : ४९५४, मालेगांव डॉ. जयंत पवार : ५२०७, येवला : रायभान काळे : ----, सिन्नर : हेमंत वाजे : ५१६७, देवळा : डॉ. विश्राम निकम : ५०५१, नाशिक ग्रामिण : सचिन पिंगळे : ५२१३
मोबाइल अॅप डाउनलोड करा आणि राहा अपडेट