धुळे : नंदुरबार जिल्ह्यातील १५ हजार शेतकऱ्यांना १९० कोटी रुपयांच्या पीक कर्जाचे वितरण करण्यात आले आहे. शेतकऱ्यांनी पीक कर्जाच्या माध्यमातून शेतीचे आधुनिकीकरण करावे. तसेच नवनवीन तंत्रज्ञानाचा वापर करून उत्पादन वाढवावे, असे प्रतिपादन जिल्ह्याचे पालकमंत्री तथा पर्यटनविकास मंत्री जयकुमार रावल यांनी केले.
भारतीय स्वातंत्र्य दिनानिमित्त जिल्हाधिकारी कार्यालयाच्या प्रांगणात ध्वजारोहणाचा मुख्य सोहळा झाला. याप्रसंगी पालकमंत्री रावल यांच्या हस्ते ध्वजारोहण झाले. त्यावेळी ते बोलत होते. यावेळी जिल्हा परिषद अध्यक्षा रजनी नाईक, खासदार हिना गावीत, आमदार चंद्रकांत रघुवंशी, नगरपालिका नगराध्यक्षा रत्ना रघुवंशी, जिल्हाधिकारी डॉ. मल्लिनाथ कलशेट्टी, जिल्हा परिषदेचे मुख्य कार्यकारी अधिकारी रवींद्र बिनवडे, जिल्हा पोलिस अधीक्षक राजेंद्र डहाळे, अप्पर जिल्हाधिकारी अनिल पाटील, गोरक्ष गाडीलकर, स्वातंत्र्य सैनिक, ज्येष्ठ नागरिक, विविध संघटनांचे पदाधिकारी, राजकीय पक्षांचे पदाधिकारी, विविध विभागांचे प्रमुख, अधिकारी, कर्मचारी उपस्थित होते.
नंदुरबार दाखल्यात अग्रेसर
जिल्ह्यात २.७३ लाख हेक्टर क्षेत्रावर पेरणी पूर्ण झाली असून, जिल्ह्यात सरासरी शंभर टक्के खरीप हंगामाचा पेरा झाला आहे, अशी माहिती पालकमंत्री रावल यांनी दिली. तळोद्यासह शहादा तालुक्यातील काही पिकांवर रोगाचा प्रादुर्भाव आढळून आला आहे. तर त्यावर कृषी विभागामार्फत आवश्यक त्या उपाययोजना सुरू असून, शेतकऱ्यांना दिलासा देण्यासाठी महाराष्ट्र शासनाने छत्रपती शिवाजी महाराज शेतकरी सन्मान योजना जाहीर केली आहे, असेही ते म्हणाले. जिल्ह्यातील सर्वसामान्य जनतेला मालमत्ता संदर्भात आवश्यक कागदपत्रे सहज व तत्काळ उपलब्ध होण्याच्या अनुषंगाने सरकारने ऑनलाइन ७/१२ संगणकीकरणाचे काम सुरू केले असून, नंदुरबार जिल्ह्यात ९९ टक्के सातबारा संगणकीकृत झाले आहेत. नंदुरबार जिल्हा हा नाशिक विभागात प्रत्येक टप्प्यावर अग्रेसर राहिलेला आहे, असेही रावल यावेळी बोलतांना म्हणाले.
यावेळी पालकमंत्री रावल यांच्या हस्ते जिल्हा पोलिस अधीक्षक राजेंद्र डहाळे यांना राष्ट्रपती पदक जाहीर झाल्याबद्दल सत्कार करण्यात आला. तसेच स्वच्छ भारत मिशन अंतर्गत उत्कृष्ट काम केल्याबद्दल सविता गावीत, सभापती पंचायत समिती, नवापूर व एन. डी. वाळेकर गटविकास अधिकारी नवापूर, संत गाडगेबाबा ग्राम स्वच्छता अभियान अंतर्गत प्रथम-पुरस्कार सरपंच ज्योतीबेन पाटील, द्वितीय पुरस्कार सरपंच शकुंतला गावीत व तृतीय पुरस्कार बेबीबाई पाडवी, सार्वजनिक बांधकाम विभागातील लेखा शाखेचे उत्कृष्ट काम केल्याबद्दल बी. एल. मोरे, जिल्हा क्रीडा पुरस्कार राजेश परदेशी, यांना मिळाल्याबद्दल त्यांनाही सन्मानपत्र देवून गौरविण्यात आले.
मोबाइल अॅप डाउनलोड करा आणि राहा अपडेट
