इगतपुरी तालुक्याची मदार अवलंबून असलेले भावली धरण पाच दिवसांपूर्वी पूर्ण क्षमेतेने भरल्याने शनिवारी आमदार निर्मला गावित यांनी धरणाचे विधिवत जलपूजन केले.
यावेळी धरणाच्या पाणीसाठ्याबाबत आढावा घेऊन पाण्याचा संपूर्ण तालुक्याला लाभ होईल, असे नियोजन करण्याच्या सूचना गावित यांनी संबंधीत अधिकाऱ्यांना दिल्या. या धरणाला पर्यटकांचीही पसंती असल्याने परिसर सुशोभित करणार असल्याचेही त्या म्हणाल्या. यावेळी कार्यकारी अभियंता आर. एस. शिंदे, तहसीलदार अनिल पुरे, कार्यकारी अभियंता आर. एस. शिंदे, कार्यकारी अभियंता रमेश गावीत, शाखा अभियंता सुहास पाटील, कचरू डुकरे आदी उपस्थित होते.
जलसंपदा हीच खरी राष्ट्रीय संपत्ती आहे. संपूर्ण जनतेला या पाण्याचा लाभ होवो, तालुक्यातील व मतदारसंघातील जनता सुखी समाधानी होवो, अर्ध्या महाराष्ट्राला पिण्याचे व शेतीचे पाणी पुरविणाऱ्या दारणा, मुकणे, कडवा, वाकी व वैतरणा धरणेही लवकर भरोत अशी प्रार्थना त्यांनी यावेळी केली.
भावलीसह दारणा, कडवातून विसर्ग
इगतपुरी तालुक्यात सलग चौथ्या दिवशी पावसाची संततधार असून, धरणांतील जलसाठा झपाट्याने वाढत आहे. इगतपुरीचा पश्चिम परिसर जलमय झाला आहे. इगतपुरी तालुक्यात ४८ तासांत ३०० मिमी इतका दमदार पाऊस झाला आहे. त्यामुळे अवघ्या दीड महिन्यात तालुक्यात २१८३ मिमी पाऊस झाला असून, ही सरासरी ६३ टक्क्यांवर गेली आहे. दारणा, कडवा या धरणांतून मोठ्या प्रमाणात जलविसर्ग सुरू असून, वैतरणा व मुकणे धरणातही जलसाठा वाढला आहे. भावली धरण चार दिवसांपूर्वीच ओव्हरफ्लो झाले असून, दारणा ८० तर कडवा ८५ टक्के भरले आहे. दारणा धरणातून १३ हजार क्यूसेस, तर कडवा धरणातून ७ हजार क्यूसेस वेगाने पाण्याचा विसर्ग होत आहे. भावली धरणातून १६०० क्यूसेस वेगाने पाणी सोडले जात आहे. वैतरणा ७२ टक्के, मुकणे ३६ टक्के तर वाकी धरण ३५ टक्के भरले आहे.
निफाडला रिमझिम
निफाड ः निफाड व परिसरात रिमझिम पाऊस सुरू होता. शनिवारी सकाळी सहा वाजेच्या दरम्यान अर्धा तास चांगला पाऊस झाला. दुपारी रिमझिम पाऊस बरसत होता. दारणा व गंगापूर धरणातून विसर्ग सुरू असल्याने सायखेडा-चांदोरी परिसरात पूरसदृश स्थिती आहे. गोदाकाठ परिसरातील वीटभट्ट्या तसेच शेती पाण्याखाली गेली आहे.
चांदवड, नांदगावला भिजपाऊस
मनमाड ः मनमाड शहर परिसरात तसेच चांदवड तालुक्यात शनिवारी रिमझिम पावसाने जनजीवन विस्कळीत केले. शुक्रवार रात्रीपासून मनमाड शहरात संततधार पाऊस सुरू होता शनिवारी मनमाडसह चांदवड व नांदगाव तालुक्यात पावसाच्या हलक्या सरी पडल्या. या पावसाने रस्त्यावर दुकाने मांडून बसलेल्या किरकोळ विक्रेत्यांची धांदल उडाली. या भिजपावसाने शेतकरी वर्गात समाधान पसरल्याचे चित्र होते.
मोबाइल अॅप डाउनलोड करा आणि राहा अपडेट
