टीम मटा
राज्य शासनाच्या वतीने १ ते ७ जुलै दरम्यान वनमहोत्सवाचे आयोजन करण्यात आले आहे. जिल्ह्यात या महोत्सवाला उत्स्फूर्त प्रतिसाद मिळाला. संपूर्ण जिल्ह्यात वृक्षारोपणाचा संकल्प सोडण्यात आला.
मालेगाव परिक्षेत्रात
दहा लाख वृक्ष लागवड
मालेगाव ः वनपरिक्षेत्रात ९ लाख ५३ हजार वृक्षांची लागवड करण्यात येणार असून, या महोत्सवाचा प्रारंभ शनिवारी करण्यात आला. वनपरिक्षेत्रातील दहीदी येथे वनविभागाच्या वतीने वृक्षारोपण कार्यक्रम घेण्यात आला. ग्रामविकास राज्यमंत्री दादा भुसे, अपर जिल्हाधिकारी दिलीप स्वामी, पंचायत समिती सभापती प्रतिभा सूर्यवंशी यांच्या हस्ते मुख्य वृक्षारोपण कार्यक्रम झाला. यावेळी उपविभागीय वनधिकारी जगदीश येडलावर, नगरसेवक तानाजी देशमुख, पंचायत समिती सदस्य जगदीश मालपुरे, सरपंच राजेंद्र कचवे उपस्थित होते. या वन महोत्सवाअंतर्गत तालुक्यातील वेगवेगळ्या १७ ठिकाणी ४६ केंद्रांवर वृक्षलागवड करण्यात येणार आहे. मुंगसे येथे पंचायत समितीचे गटविकास अधिकारी आनंद पिंगळे यांच्या हस्ते वृक्षलागवड करण्यात आली. मालेगाव महापालिकेतर्फे वृक्षारोपण करण्यात आले. फातमा गार्डन येथे महापौर रशीद शेख, आयुक्त संगीता धायगुडे यांच्या हस्ते वृक्षारोपण करण्यात आले. येथील के. बी. एच. एस. एस. ट्रस्ट संचलित भायगाव रोड जाजुवाडी येथील वृक्षारोपण करण्यात आले. यासाठी प्रसाद हिरे, इंदिराताई हिरे यांचे मार्गदर्शन लाभले. शाह विद्यालयात कौशल्य विकसन जनजागृती फेरीचे आयोजन करण्यात आले. संस्थेचे अध्यक्ष शरद चमनलाल पटनी, प्राचार्य संजय बेलन उपस्थित होते.
न्यायाधीशांनी केले वृक्षारोपण
मनमाड ः येथील न्यायालय आवारात न्यायाधीश स्वाती फुलबांधे यांनी वृक्षारोपण केले. रेल्वे न्यायालयाचे न्यायाधीश व्ही. ए. टेकवानी, वकील संघाचे अध्यक्ष व्ही. एम. कासार, सचिव सुधाकर मोरे, मोहन माळवतकर, एन जी बापट उपस्थित होते. नांदगाव तालुक्यातील सारताळे येथील आश्रमशाळेत हरित सेना उपक्रम कार्यक्रमात वृक्षारोपण करण्यात आले. पंचायत समितीचे उपसभापती सुभाष कुटे, जिल्हा परिषदेचे साकोरा गटाचे सदस्य रमेश बोरसे, ग्रामीण विकास संस्थेचे सरचिटणीस रमेश पगार आदी उपस्थित होते. एकलव्य प्राथमिक, कै. बाबूलाल देवचंद पगार आश्रमशाळेतील विद्यार्थ्यांना मार्गदर्शन करण्यात आले.
झाडांचा वाढदिवस देवळ्यात साजरा
कळवण ः कृषिदिनानिमित्त दरवर्षी लाखो वृक्षांची लागवड केली जाते मात्र त्यांचे संगोपन व निगा नियमित राखली जावी याउद्देशाने अमृतकार पतसंस्थेने वृक्षलागवडीचा वाढदिवस साजरा करून समाजापुढे एक वेगळा आदर्श निर्माण केला आहे, असे प्रतिपादन देवळा येथील सहाय्यक निबंधक संजय गीते यांनी केले. कृषिदिनाचे औचित्य साधून देवळा येथील अमृतकार पतसंस्थेने मागील वर्षी लावलेल्या वृक्षांचे संगोपन करून पहिला वाढदिवस मोठ्या उत्साहात साजरा केला. यावर्षीही नवीन वृक्षांची लागवड करीत असताना मागील वर्षी लावलेल्या वृक्षांचा वाढदिवस साजरा करून त्यांचे पुढील काळात चांगल्या प्रकारे संगोपन करण्याचा संकल्प संचालक मंडळाने केला आहे, अशी माहिती पतसंस्थेचे संस्थापक अध्यक्ष भारत कोठावदे यांनी यावेळी दिली. यावेळी सहाय्यक निबंधक संजय गीते, सहकार अधिकारी सतीश देवघरे आदींच्या हस्ते वृक्षारोपण करण्यात आले.
बागलाणमध्ये उत्साह
सटाणा ः वन विभाग व सामाजिक वनीकरणाच्या माध्यमातून तालुक्यात बागलाणच्या आमदार दीप‌किा चव्हाण यांच्या हस्ते मुळाणे, भाक्षी, फोफीर येथे वृक्षारोपण करण्यात आले. तालुक्यात दोन लाख वृक्षलागवड करण्यात येणार आहे. यावेळी सामाजिक वनीकरण विभागासह तालुका वनविभागाचे वनपरिक्षेत्र अधिकारी सुहास पाटील, माजी आमदार संजय चव्हाण उपस्थित होते. सटाणा नगर परिषदेकडून शहरात वृक्षारोपण मोहिमेला सुरुवात करण्यात आली. भाक्षी रस्त्यावरील वृंदावन कॉलनी येथे सुयश क्लासेसचे संचालक बी. के. पाटील यांच्या हस्ते नगराध्यक्ष सुनील मोरे यांच्या उपस्थितीत वृक्षारोपण करण्यात आले. यावेळी उपनगराध्यक्षा निर्मला भदाणे, मुख्याधिकारी हेमलता डगळे, गटनेते संदीप सोनवणे आदी उपस्थित होते.
पाटविहीर येथे मार्गदर्शन
कळवण ः पाटविहीर येथील जि. प. शाळेत पंचायत समिती सदस्य मीनाक्षी चौरे, सरपंच श्रावण पालवी यांच्या हस्ते वृक्षारोपण करण्यात आले. विद्यार्थ्यांनी वृक्षदिंडी काढली. त्यानंतर शालेय परिसरासह गावात वृक्षारोपण करण्यात आले. माजी सरपंच शिवाजी चौरे, आर. एस. भोये, उपस्थित होते.
दिंडोरीत कृषी दिन
दिंडोरी ः येथील पंचायत समिती आवारात वृक्षारोप करण्यात आले. यावेळी सभापती एकनाथ गायकवाड, विलास सोनवणे, वसंतराव थेटे उपस्थित होते.
मोबाइल अॅप डाउनलोड करा आणि राहा अपडेट
