मटा ऑनलाइन वृत्त । सटाणा :
केंद्रात नरेंद्र, राज्यात देवेंद्र आणि शेतकऱ्याच्या नशिबी दारिद्रय, अशी भयावह परिस्थिती राज्यात निर्माण झाली आहे, असा हल्लाबोल करतानाच बळीराजाला सरसकट कर्जमाफी केल्याशिवाय विरोधी पक्ष गप्प बसणार नाही, असा निर्धार राज्याचे माजी मुख्यमंत्री व काँग्रेसचे प्रदेशाध्यक्ष अशोक चव्हाण यांनी व्यक्त केला.
मालेगावहून निघालेली संघर्ष यात्रा दुपारी सटाण्यात दाखल झाली. येथील बाजार समितीच्या आवारात सभेचे आयोजन करण्यात आले होते. चव्हाण म्हणाले, आता खऱ्या अर्थाने भाजप सरकारशी संघर्ष करण्याची वेळ आली आहे. सरकार जोपर्यंत न्याय देत नाही व शेतकऱ्याचा सातबारा कोरा करीत नाही, तोपर्यंत संघर्ष यात्रा सुरूच राहणार असल्याची ग्वाही चव्हाण यांनी दिली. अडीच वर्षात राज्यात नऊ हजार शेतकऱ्यांनी आत्महत्या केल्या असून, सरकार केव्हा सातबारा कोरा करणार आहे. २०१९ सालातील निवडणुका डोळ्यासमोर कर्जमाफ करणार असेल तर तोपर्यंत शेतकऱ्यांनी काय करायचे, असा सवाल चव्हाण यांनी उपस्थित केला. अजित पवार म्हणाले, विद्यमान सरकार हे शेतकरी हिताचा आव आणणारे आहे. केवळ घोषणाबाजी करून सत्ता संपादन केल्यावर शेतकरी हिताकडे डोळे झाक केली आहे. उत्तर प्रदेश, तेलंगणा, आंध्र प्रदेशमध्ये कर्जमाफी केली जात आहे. मग महाराष्ट्रावर अन्याय का केला जात आहे. सरकारविरोधात ही संघर्ष यात्रा असल्याचे पवार म्हणाले.
कर्जमाफी कधी?
कर्जबाजारीपणामुळे राज्यातील शेतकरी रोजच आपले जीवन संपवत आहेत. यावर उपाययोजना करण्याचे सोडून राज्य सरकार मात्र बड्या उद्योगपतींना कर्जमाफी देत आहे. शेतकऱ्याला कर्जमाफी कधी देणार, असा सवाल उपस्थित करून शेतमालास हमीभाव मिळावा, त्याचा ७/१२ कोरा करावा, हाच संघर्ष यात्रेमागील हेतू आहे. आणि जोपर्यंत कर्जमाफीचा निर्णय घेत नाही तोवर ही संघर्ष यात्रा सुरू राहील, असा इशारा विरोधी पक्ष नेते राधाकृष्ण विखे पाटील यांनी मालेगावच्या सभेत दिला.
राज्यातील शेतकऱ्यांची कर्जमाफी या प्रमुख मागणीसाठी विरोधी पक्षांनी सुरू केलेली संघर्ष यात्रा सोमवारी मालेगावात येथे दाखल झाली. यावेळी शहरातील मनमाड चौफुली येथे आयोजित सभेत विखे पाटील बोलत होते. यावेळी व्यासपीठावर माजी उपमुख्यमंत्री अजित पवार, काँग्रेस अध्यक्ष अशोक चव्हाण, काँग्रेस नेते रोहिदास पाटील, समाजवादी पक्षाचे आबू आझमी, आमदार भाऊसाहेब कांबळे, गोपालदास अग्रवाल, हेमलता पाटील, बी. डी. पाटील, शोभा बच्छाव, हिना गावित, पंकज भुजबळ, तुषार शेवाळे आदी विरोधी पक्षाचे नेते, पदाधिकारी उपस्थित होते.
विखे पाटील म्हणाले, महाराष्ट्र शासनाकडे राज्यात बुलेट ट्रेन, विमान वाहतूक आदींसाठी कोट्यवधी रुपये आहेत. केवळ शेतकऱ्यांच्या कर्जमाफीसाठी पैसे नाहीत का? हे केवळ राजकारण आहे. मुख्यमंत्री कर्जमाफीसाठी योग्य वेळेची वाट पाहत असून, अजून किती शेतकरी आत्महत्या झाल्यानंतर मुख्यमंत्री कर्जमाफीचा निर्णय घेणार आहेत, अशा शब्दात त्यांनी मुख्यमंत्री देवेंद्र फडणवीस यांच्यावर टीका केली. माजी उपमुख्यमंत्री अजित पवार यांनीही राज्य सरकारवर टीका केली. ते म्हणाले, नाबार्डने तूर खरेदी केंद्र बंद करून शेतकऱ्यांच्या जखमेवर मीठ चोळले आहे. शेतकरी आत्महत्येवर राजकारण करणे चुकीचे असून शेतकरी जगाला पाहिजे.
यासाठी कर्जमाफी करून शेतकऱ्यांना या विवंचनेतून बाहेर काढणे गरजेचे आहे. जापर्यंत शेतकरी कर्जमुक्त होत नाही तोपर्यंत ही संघर्ष यात्रा सुरू राहणार असेही पवार यांनी स्पष्ट केले. या सभेस तालुक्यातील शेतकरी मोठ्या संख्येने उपस्थित होते. दरम्यानच तालुक्यातील वाके येथील शेतकऱ्याने आत्महत्या केल्याची बातमी सजल्याने सर्वच विरोधी पक्ष नेत्यांनी वाके जावून आत्महत्याग्रस्त शेतकऱ्यांच्या कुटुंबियांचे सांत्वन केले. यावेळी तालुक्यातील राष्ट्रवादी, काँग्रेसचे पदाधिकारी कार्यकर्ते हजर होते. त्यानंतर संघर्ष यात्रा बागलाण तालुक्यातील नामपूर, सटाण्याकडे रवाना झाली.
मोबाइल अॅप डाउनलोड करा आणि राहा अपडेट
