म. टा. खास प्रतिनिधी, नाशिक
केंद्र सरकारने मोबाइलद्वारे व्यवहार करण्यासाठी उपलब्ध करून दिलेले भीम अॅप अखेर मराठीत उपलब्ध झाले आहे. पंतप्रधान नरेंद्र मोदी यांनी शुक्रवारी या अॅपच्या नवीन सुविधांची माहिती दिली. आता या अॅपमध्ये पंजाबी, मराठी आणि आसामी या तीन प्रादेशिक भाषांचा समावेश करण्यात आला आहे.
पंतप्रधान नरेंद्र मोदी यांनी नागपूर येथे शुक्रवारी तरुणांना भीम अॅपची शिफारस करून पैसे कमावण्याची ऑफर दिल्यानंतर नाशिकच्या तरुणांनाही या अॅपने भुरळ घातली आहे. मराठीची सुविधाही उपलब्घ करून दिल्यामुळे हे अॅप वापर वापरणे आता सोपे झाले आहे. पंतप्रधानांच्या घोषणेनंतर अनेक जणांनी हे अॅप डाऊनलोड करीत रेफरल पर्याय निवडण्यासाठी शोधा शोध सुरू केली आहे. मोबाइल उचला, भीम अॅप शिका, ते अधिकाधिक लोकांना शिकवा आणि पैसे कमवा, अशी साद घालत पंतप्रधान मोदी यांनी भावी पिढीला आपल्या मोहिमेशी जोडण्याचा प्रयत्न केला. त्याला नाशिकमध्ये चांगला प्रतिसाद मिळत आहे.
घरबसल्या रोजगार
हे अॅप वापरण्याची शिफारस केल्यानंतर समोरच्या यूजरने जर त्यावरून तीन व्यवहार केले, तर खात्यात दहा रुपये जमा होणार आहेत. त्यामुळे हे अॅप कसे वापरायचे व त्यातून रेफरल कुठे आहे, अशी माहिती तरूण दिवसभर करून घेत होते. एका दिवसात तुम्ही २० लोकांना या अॅपशी जोडलंत तर २०० रुपये मिळणार असल्यामुळे घरबसल्या हा नवा धंदा मिळाल्याने तरुणांनी आपल्या स्मार्ट फोनवर कोणाला हे अॅप पाठवयाचे याचे गणित जुळवण्याचे काम सुरू केले आहे.
व्यापाऱ्यांचाही फायदा
व्यापाऱ्यांनी सुध्दा दुकानात या भीम अॅपवरून व्यवहार कसे करायचे याची माहिती करून घेतली आहे. त्यांना सुध्दा ठराविक व्यवहारांनंतर २५ रुपये मिळणार असल्यामुळे त्यांची चाचपणीसुध्दा केली. १४ ऑक्टोबरपर्यंत ही योजना सुरू असल्याने सहा महिने त्याचा फायदा घेता येणार आहे. गेल्या काही दिवसांपासून पुन्हा नोटाटंचाईचा विषय पुढे येऊ लागल्याने या अॅपचा वापर नाशिकमध्ये वाढण्याची चिन्हे आहेत.
मोबाइल अॅप डाउनलोड करा आणि राहा अपडेट