नाशिकरोडच्या इंडिया सिक्युरिटी प्रेस कामगारांच्या वैचारिक व सांस्कृतिक प्रगल्भतेच्या विकासाचा एकेकाळचा साक्षीदार असलेला येथील श्रमिक हॉल सध्या प्रेस कामगारांकडूनच विस्मृतीत गेल्याची स्थिती आहे. गेल्या अनेक वर्षांपासून या श्रमिक हॉलला कामगारांच्या लगबगीची प्रतीक्षा असल्याचे दिसून येत आहे.
येथील क्रांती चौकाजवळील शास्त्री पथावर इंडिया सिक्युरिटी प्रेस कामगारांच्या श्रमिक हॉलची तीन मजली वास्तू आहे. एकेकाळी या वास्तूत प्रेस कामगारांच्या पाल्यांच्या लग्नांपासून, तर कामगारांच्या सांस्कृतिक कार्यक्रमांची रेलचेल असायची. याशिवाय कामगार संघटना नेते व कार्यकर्त्यांच्या सभा आणि बैठकांचाही हा श्रमिक हॉल साक्षीदार आहे. कामगारांच्या हिताच्या प्रश्नांवर याच श्रमिक हॉलच्या भिंतींच्या साक्षीने चर्चा, ठराव या हॉलमध्ये होत असत. कामगारहिताच्या चळवळीला गती देण्यासाठी याच श्रमिक हॉलचा वापर होत असे. कामगारांच्या वैचारिक, सांस्कृतिक व सामाजिक विकासात या श्रमिक हॉलचा सिंहाचा वाटा राहिला आहे. आज मात्र हा हॉल कामगारांच्या प्रतीक्षेत आहे.
व्यावसायिक वापरावर भर
श्रमिक हॉलच्या तळमजल्यावर १५ व्यावसायिक गाळ्यांची उभारणी केलेली असल्याने या गाळ्यांचा तेवढा व्यावसायिक वापर होत आहे. मात्र, वरील मजल्यांचा वापर सध्या बंद झाला आहे. दि. ११ जून १९८० रोजी राष्ट्रीय कामगार नेते बगारामजी तुळपुळे यांच्या हस्ते या श्रमिक हॉलचे उद््घाटन झाले होते. दुसऱ्या मजल्याचे उद््घाटन दि. ४ मे १९८७ रोजी भानुमती कुलकर्णी यांच्या हस्ते झाले होते.
दरवाजे मोडकळीस
श्रमिक हॉलला गेल्या १५-२० वर्षांत अनेक पर्याय निर्माण झाल्याने श्रमिक हॉलकडे कामगारवर्ग फिरकेनासा झाला आहे. सध्या या हॉलच्या खिडक्या दरवाजे, जिने, पंखे, वीजपुरवठा व्यवस्था, शौचालये आदींची प्रचंड दुरवस्था झाली आहे. ध्वनिक्षेपक व्यवस्थाही उपलब्ध नाही. पूर्वीसारखा या हॉलचा वापर कामगारवर्गाकडून होत नसल्याने या हॉलचा बकालपणा वाढला आहे.
सध्या या हॉलचा वापर पूर्वीसारखा होत नाही. जिमखाना, नेहरूनगर, गोरेवाडी येथील सरकारी हॉलचा वापर वाढला आहे.
-ज्ञानेश्वर जुंद्रे, कार्याध्यक्ष, आयएसपी मजदूर संघ
मोबाइल अॅप डाउनलोड करा आणि राहा अपडेट
