वाहतूक कोंडी व अपघाताच्या घटना टाळण्यासाठी शहर पोलिसांनी सीबीएस, मेहेर सिग्नल तसेच मायको सर्कल येथील वाहतुकीमध्ये काही बदल केले आहेत. वाहतूक सुरळीत होण्यासाठी पोलिसांनी याठिकाणी नो एंट्री तसेच वन-वेचे पर्याय उपलब्ध करून दिले आहेत. नियमांकडे दुर्लक्ष करणाऱ्या वाहनचालकांवर थेट कारवाई करण्यात येणार आहे.
सीबीएसपासून कान्हेरेवाडीत जाणाऱ्या, गोळे कॉलनीतून मेहेर सिग्नलकडे येणाऱ्या तसेच मायको सर्कलपासून होलाराम कॉलनीकडे येणाऱ्या रस्त्यांबाबत हे नियम असून, गुरुवारपासून सदर नियमांची अंमलबजावणी होत आहे. रस्ते वापराबाबत होणाऱ्या बदलांबाबत शहर पोलिसांनी काही दिवसांपूर्वी हरकती व सूचना मागवल्या होत्या. मुदतीत आलेल्या थोड्याफार हरकती निकाली काढत वाहतूक पोलिसांनी आपला प्रस्ताव कायम केला. या तिन्ही रस्त्यांचा वापर करण्यासाठी वाहनचालक धोकादायक पध्दतीने रस्ता पार करतात. त्यातून स्वतःसह दुसऱ्याचाही जीव धोक्यात येतो. तसेच वाहतूक कोंडीची समस्याही निर्माण होते. या पार्श्वभूमीवर सदर बदल लागू करण्यात आले असून, वाहनचालकांनी त्याची दखल घ्यावी, असे आवाहन सहायक पोलिस आयुक्त जयंत बजबळे यांनी केले आहे.
असे आहेत बदल
सीबीएसकडून कान्हेरवाडीमार्गे कालिदास कलामंदिराकडे जाणारी वाहतूक एकेरी असणार आहे. कालिदास कलामंदिराकडून कान्हेरेवाडीमार्गे सीबीएसकडे येणाऱ्या सर्व प्रकारच्या वाहनांना प्रवेश बंदी असून, संबंधित वाहनचालकांनी शालिमार मार्गे किंवा किटकॅट कॉर्नर येथून त्र्यंबक सिग्नल येथून सीबीएसकडे यावे.
शरणपूर पोलिस चौकी सिग्नलकडून मायको सर्कलकडे जाणाऱ्या वाहनचालकांना होलाराम कॉलनीकडे जाणाऱ्या रस्त्याने वाहने नेता येतील.
जलतरण, चांडकसर्कल, उंटवाडीरोडकडून मायको सर्कलवर येणाऱ्या वाहनांना रस्ता क्रॉस करून सरळ होलाराम कॉलनी रोडकडे जाता येणार नाही. अशा वाहनांना प्रवेश बंद आहे. या वाहनांना शरणपूर पोलिस चौकी सिग्नलवरून वळूनच यावे लागेल.
मेहेर हॉटेललगतच्या मार्गावरील एलआयसी ऑफिस, पोस्ट ऑफिसकडून मेहेर सिग्नलकडे येणाऱ्या वाहनांना प्रवेश बंद करण्यात आले आहेत.
मेहेर सिग्नल बाजूकडून बिझनेस बँकेजवळून गोळे कॉलनीत जाणाऱ्या मार्गावर सर्व प्रकारच्या वाहनांसाठी एकेरी मार्ग करण्यात आला आहे. गोळे कॉलनीतून या मार्गाने बाहेर पडणाऱ्या वाहनांना प्रवेश बंद करण्यात आला आहे.
गोळे कॉलनी बाजूकडून बिझनेस बँकेजवळून मेहेरकडे जाणाऱ्या सर्व प्रकारच्या वाहनांनी गद्रे मंगल कार्यालयाकडून अथवा पिपल्स बँकसमोरील बँकेसमोरील मार्गाचा वापर करून गंगापूररोड जाणाऱ्या रस्त्यांचा वापर करावा.
मोबाइल अॅप डाउनलोड करा आणि राहा अपडेट