म. टा. प्रतिनिधी, नाशिक
शहरात असलेली क्रीडांगणेच लोकसंख्येच्या तुलनेत कमी पडत असताना नाशिक शहर वाहतूक शाखेने शहराच्या मध्यवस्तीत असलेल्या छत्रपती शिवाजी स्टेडियमवर वाहनतळ उभारण्याचा घाट घातला आहे. या निर्णयामुळे खेळाडूंमध्ये खळबळ उडाली असून, वेळ पडल्यास या निर्णयाविरुद्ध क्रीडा संस्थांकडून आंदोलन करण्याचा इशारा देण्यात आला आहे.
लहान मुलांचा सर्वांगीण विकास व्हावा यासाठी खेळ आवश्यक असल्याचे मानसोपचारतज्ज्ञांचे म्हणणे आहे. परंतु, शहरातील मैदानांची संख्या घटत असल्याने मुलांनी खेळायला जायचे कुठे, असा प्रश्न पालकांसमोर ‘आ’ वासून उभा आहे. शहरातील गावठाण भागात छत्रपती शिवाजी स्टेडियम हे एकमेव मैदान आहे. या मैदानावर जिल्हा पातळीवर खेळलेल्या खेळाडूंपासून ते राष्ट्रीय खेळाडूंपर्यंत अनेक जण रोज सरावासाठी येत असतात. शहरातील खेळाडूंना हे एकमेव मध्यवर्ती मैदान आहे. या ठिकाणी नुकत्याच राज्यस्तरीय निमंत्रितांच्या खो-खो स्पर्धाही झाल्या. या मैदानावर अगोदरही नाशिक महापालिकेच्या कबड्डी व महापौर चषक कुस्ती स्पर्धा झाल्या आहेत. या मैदानावरील स्पर्धांना चांगला प्रेक्षकवर्ग लाभत असल्याने इतर मैदानांच्या तुलनेत येथे होणारी स्पर्धा यशस्वी झाल्याची अनेक उदाहरणे आहेत.
मात्र, या मैदानावर वाहतूक शाखेचा डोळा असून, या ठिकाणी पार्किंग करण्याचा घाट घातला जात आहे. शहर वाहतूक शाखेने क्रीडा विभागाला दिलेल्या प्रस्तावानुसार महात्मा गांधी रोडवर असलेली दोन्ही प्रवेशद्वारे उघडून वाहनांना आत प्रवेश दिला जाणार आहे. वाहनांनी मैदानात प्रवेश केल्यानंतर काही वाहने यशवंत व्यायामशाळेच्या भिंतीलगत व काही वाहने शासकीय कन्या शाळेजवळ उभी करावीत, असे नियोजन करण्यात आले आहे. मात्र, वाहनांच्या प्रवेशामुळे या मैदानाची नासाडी होणार आहे. या ठिकाणी वाहनांना प्रवेश दिल्यास ट्रॅकची नासधूस होण्याची चिन्हे आहेत. काही वर्षांपूर्वी या ठिकाणी पार्किंगचा प्रयोग करण्यात आला होता. मात्र, या ठिकाणी रात्री वाहने लावून त्यात अनैतिक प्रकार होत असल्याचे निदर्शनास आले होते. त्याचप्रमाणे मद्यपींसाठी हक्काची जागा तयार झाली होती. पुन्हा पार्किंगला जागा दिल्यास खेळाडूंनी जायचे कुठे, असा प्रश्न निर्माण होणार आहे. या ठिकाणी सरावासाठी महिला खेळाडूदेखील येतात. टवाळखोरांच्या वावराने त्यांना सराव करणे अवघड होणार असल्याने येथे पार्किंग करू नये, अशी मागणी क्रीडा संस्थांनी केली आहे.
---
...तर होणार कोर्टाचा अवमान
याअगोदार काही क्रीडा संस्थांनी या मैदानाबाबत कोर्टात याचिका दाखल केली होती. या क्रीडांगणाचा वापर फक्त खेळासाठीच करावा, असा आदेश कोर्टाने दिला होता. आता या मैदानावर पुन्हा पार्किंग सुरू केल्यास कोर्टाचा अवमान होणार असल्याचेही अनेकांचे म्हणणे आहे.
---
शहर वाहतूक शाखेकडून रनिंग ट्रॅकलगत यशवंत व्यायामशाळा आणि शासकीय कन्या विद्यालय या ठिकाणी पार्किंगचा प्रस्ताव आला आहे. क्रीडा संकुल समितीसमोर तो ठेवण्यात येणार असून, समिती यावर निर्णय घेईल.
-संजय सबनीस, जिल्हा क्रीडा अधिकारी
आम्ही या ठिकाणी नुकतीच खो-खो स्पर्धा भरविली होती. या ठिकाणी महिला खेळाडूंचा सराव सुरू असतो. येथे टवाळखोरांचा वावर वाढल्यास आमच्या खेळाडूंना खेळता येणार नाही. प्रशासनाने विचार करून कार्यवाही करावी, नाहीतर योग्य ते पाऊल उचलू.
-मंदार देशमुख, कार्याध्यक्ष, महाराष्ट्र खो-खो असोसिएशन
शहरातील शाळांसाठी हे एकमेव मैदान आहे. त्यामुळे येथे पार्किंग करू नये. या ठिकाणी पार्किंग केल्यास मुलांनी कुठे खेळायला जायचे, हा प्रश्न निर्माण होणार आहे. या मैदानावर अनेक खेळाडू तयार झाले आहेत. त्यामुळे पुनर्विचार व्हावा.
-प्रशांत भाबड, सहकार्यवाह, नाशिक जिल्हा कबड्डी असोसिएशन
या मैदानावर पार्किंग सुरू केल्यास क्रीडा संस्था गप्प बसणार नाहीत. एकीकडे खेळाडू तयार होत नाहीत, अशी बोंब करायची व दुसरीकडे पिढ्यान् पिढ्या असलेले मैदान खेळाडूंकडून हिसकावून घ्यायचे हे योग्य नाही.
-आनंद खरे, अध्यक्ष, जिल्हा व्हॉलीबॉल असोसिएशन
नाशिक शहरातील प्रत्येक मैदानावर कुणी ना कुणी अतिक्रमण केले आहे. हे एकमेव मैदान चांगल्या स्थितीत आहे. मात्र, यावरदेखील पोलिसांची वक्रदृष्टी गेली आहे. यावर अतिक्रमण झाले, तर क्रीडा संस्था आंदोलन करतील.
-नरेंद्र छाजेड, अध्यक्ष, नाशिक जिमखाना
मोबाइल अॅप डाउनलोड करा आणि राहा अपडेट
