अखेरच्या दिवशी २०० कोटींहून अधिक रक्कम जमा

December 30, 2016, 2:30 pm

≪ Previous: साध्या फोनद्वारे बँकिंग दृष्टिपथात

म. टा. खास प्रतिनिधी, नाशिक

पाचशे व हजाराच्या रद्द नोटा जमा करण्यासाठी अखेरच्या दिवशी नागरिकांनी बँकेत गर्दी केली होती. जिल्ह्यात या अगोदरच सात हजार कोटींहून अधिक रद्द नोटा जमा झाल्या आहेत. त्यात शेवटच्या दिवसातील रक्कम सुमारे २०० ते २५० कोटी असल्याचा अंदाज बँकांनी व्यक्त केला आहे. रात्री उशिरापर्यंत किती नोटा बँकेत जमा झाल्या याचा हिशेब केला जात होता. मालेगावमध्ये रद्द झालेल्या नोटा भरण्यासाठी स्टेट बँकेसह इतर बँकांमध्ये मोठी गर्दी होती.

रद्द झालेल्या नोटांचा हिशेब करून या नोटा शनिवारी सायंकाळपर्यंत करन्सी चेस्टला पाठवायचे निर्देश रिझर्व्ह बँकेने दिले असल्यामुळे बँकेला पुन्हा मोठे काम लागले आहे. रद्द नोटा भरण्याचा शेवटचा दिवस असल्यामुळे नेहमीपेक्षा गर्दी वाढल्याने बँक कर्मचाऱ्यांवर ताण पडला होता. जिल्ह्यातील राष्ट्रीयकृत व खासगी बँकांच्या ५२५ शाखा असून, त्यांना यापुढे रद्द नोटा जमा करून त्यांचा हिशेब ठेवण्याचा ताण कमी होणार आहे. त्यामुळे कर्मचाऱ्यांनी सुस्कारा सोडला असला तरी नवीन अजून काय निर्देश येतात याचे दडपण मात्र सर्वांवर आहे. गेल्या पन्नास दिवसांत बँकांना रद्द झालेल्या नोटा जमा करून घेताना त्यांच्या तपशीलसह विविध कागदपत्रे घेण्याचे काम वाढले होते. त्यामुळे जबाबदारी वाढली होती.

अनेकांना वाटले हायसे

गेले काही दिवस विविध नियम व कारणांमुळे आम्ही पैसे भरले नाही, पण आता हे पैसे भरणेच हातात होते. त्यामुळे पुढे आता जे काही होईल ते होईल, पण आजचा दिवस आनंदाचा व भार कमी करणारा होता, अशा प्रतिक्रिया पैसे भरण्यासाठी आलेल्या नागरिकांनी व्यक्त केल्या.

खात्यांची शोधाशोध
आपल्या खात्यात जास्त पैसे भरता येणार नाहीत. त्यामुळे काही खातेदारांनी आपले मित्र व नातेवाईकांना फोनाफोनी करीत किती पैसे भरले याची विचारपूस केली. ज्यांच्या खात्यात पैसे भरता येणार शक्य आहे, तेथे पैसे भरल्याची चर्चा सुरू होती.

Latest Images