रमजान महिन्याच्या काळात मालेगाव शहरातील मुस्लिम बांधवांचे अनेक धार्मिक विधी संपन्न होतात. त्या अनुषंगाने या काळात वीज मंडळाकडून भारनियम करू नये. वीज पुरवठा खंडित करण्यासंबंधी पूर्वसूचना द्याव्यात तसेच शहरातील सर्व प्रशासकीय विभागांनी मनपाच्या २४ तास कार्यान्वित असणाऱ्या आपत्ती नियंत्रण कक्षाशी समन्वय राखावा, अशा सूचना प्रांताधिकारी अजय मोरे यांनी दिल्या. ते रमजान पर्वाच्या पार्श्वभूमीवर शहरातील प्रशासकीय विभागांच्या आढावा बैठकीत बोलत होते.
शहरातील शासकीय विश्रामगूहात नुकतीच ही बैठक पार पडली. या बैठकीत मनपा, उपप्रादेशिक परिवहन कार्यालय, वीजवितरण, शहर वाहतूक व पोलिस, अग्निशामक दल आदि विभागांचे वरिष्ठ अधिकारी उपस्थित होते. प्रांताधिकारी मोरे यांनी सर्व विभागांनी शहरातील कायदा सुव्यवस्था कायम ठेवण्यासाठी दक्ष राहावे, अशा सूचना दिल्या.
यावेळी अपर पोलिस अधीक्षक राकेश ओला यांनी रमजान काळात शहर वाहतूक तसेच कायदा सुव्यवस्था राखण्यासाठी केल्या जाणाऱ्या उपाययोजनांची माहिती दिली. तर मनपा उपायुक्त राजेंद्र फातले यांनी शहर स्वच्छता कामांचा आढावा घेतला.
या पवित्र रमजान काळात शहरातील अग्निशामक दलदेखील तत्पर राहील, असे अधीक्षक संजय पवार यांनी यावेळी संगितले. बैठकीस तहसीलदार सुरेश कोळी, आरटीओ नानासाहेब बच्छाव, सुभाष गीते, राहुल पाटील तसेच अधिकारी उपस्थित होते.
मोबाइल अॅप डाउनलोड करा आणि राहा अपडेट
