म. टा. प्रतिनिधी, नाशिक त्र्यंबकेश्वर तालुक्यातील तळेगाव येथे अल्पवयीन मुलीवरील अत्याचारानंतर विल्होळी येथे उसळलेल्या दंगलप्रकरणी २१ संशयित आरोपींची अतिरिक्त जिल्हा व सत्र न्यायाधीश जे. पी. झपाटे यांनी निर्दोष मुक्तता केली आहे. तळेगाव येथे अल्पवयीन मुलीवर अत्याचाराची घटना घडली होती. या घटनेचे पडसाद उमटून जिल्ह्यात काही ठिकाणी दंगल उसळली. विल्होळी येथे सुरेश उमाजी यशवंते यांच्या घराची जाळपोळ करण्यात आली. या प्रकरणी पोलिसांनी मराठा क्रांती मोर्चातील काही सदस्यांवर जाळपोळीसह अॅट्रॉसिटीचा गुन्हा दाखल केला. या प्रकरणाचे दोषारोपपत्र न्यायालयात दाखल करण्यात आले. संशयितांच्या वतीने अॅड. सुजीत बोराडे यांनी युक्तिवाद केला. यशवंते यांनी घराच्या जाळपोळीनंतर पोलिसांकडे तक्रार केली नव्हती. तसेच जाळपोळीत पोलिस कर्मचारी अरुण शिर्के यांचा समावेश असल्याचा आरोप यशवंते यांनी केला होता. मात्र, घटनेच्या वेळी शिर्के हे सेवा बजावत असल्याचे तपासात समोर आले. जाळपोळीची माहिती पोलिसांना देण्यास संधी असतानाही यशवंते यांनी दोन दिवस उशिरा तक्रार केली. तसेच, तक्रारीनंतर यशवंते यांचे वर्तन विश्वासपात्र न वाटल्याचा युक्तिवाद करण्यात आला. प्रबळ साक्षी आणि पुरावे नसल्याने या गुन्ह्यातील २१ संशयितांची निर्दोष सुटका करण्यात आली आहे. या प्रकरणात नऊ साक्षीदार तपासण्यात आले. ... यांची निर्दोष सुटका पंढरीनाथ गंगाधर थोरात, अरुण पंढरीनाथ थोरात, कैलास पंढरीनाथ थोरात, सुनील पंढरीनाथ थोरात, बाळू गंगाधर थोरात, सागर चौधरी, अमोल चौधरी, सतीष शिर्के, शंकर शिर्के, यशवंत चौधरी, पिंट्या नरवडे, तानाजी नरवडे, गणेश चौधरी, रोशन चौधरी, गोकुळ थोरात, प्रकाश नवरडे, बंडू नवरडे, योगेश थापेकर यांची न्यायालयाने निर्दोष सुटका केली आहे.
मोबाइल अॅप डाउनलोड करा आणि राहा अपडेट