नाशिक : कृषी नगर येथील दत्त मंदिरातील उद्यान हे टवाळखोरांचा, प्रेमी युगुलांचा अड्डा बनले आहे. उद्यानाजवळच कॉलेज असल्याने दुपारी कॉलेज सुटल्यावर आणि संध्याकाळच्या वेळी तरुण मुले, प्रेमी युगुल उद्यानात येऊन बसतात. कृषी नगर परिसरात ठिकठिकाणी तरुणांचे घोळक्याने उभे राहत असल्याने गोंगाट, भरधाव वेगाने वाहने चालवणे, स्टंटबाजी करणे यामुळे स्थानिक रहिवासी हैराण झाले आहेत. त्यांच्या अशा स्टंटबाजीमुळे संध्याकाळी फिरायला जाणाऱ्या ज्येष्ठ नागरिकांना, लहान मुलांना रस्तावरून चालणेही अवघड होते. उद्यानातील आवारात दत्त मंदिर आणि श्री संत ज्ञानेश्वर वाचनालय आहे. त्यामुळे परिसरातील नागरिकांची सतत ये-जा चालू असते. परिसरातील नागरिकांनी अनेकवेळा या मुलांना समजविण्याचा प्रयत्न केला आहे. मात्र, ते ऐकत नसून, यातून गैरकृत्य होण्याचा धोका निर्माण झाल्याचे येथील नागरिकांचे म्हणणे आहे.

साडेपाच लाखांचा सरकारी खजिना लुटल्याच्या आरोपातून मुक्ती

\B

jitendra.tarte@timesgroup.com

Tweet : jitendratarte@MT

नाशिक : 'स्वातंत्र्यलढ्यातील सहभागाच्या कारणाने तुरुंगवास भोगलेल्या क्रांतिवीर वसंतराव नारायणराव नाईक यांना पुन्हा १९४२ च्या सुमाराला साडेपाच लाखांचा सरकारी खजिना लुटल्याच्या आरोपात ब्रिटीश सरकारने गोवण्याचा कट केला होता. ब्रिटीशांनी ताब्यात घेतल्यानंतर खोटे गुन्हे दाखल करण्यात आल्याने याप्रश्नी आता आपणच लक्ष घालावे, अशी विनंती क्रांतिवीरांनी थेट महात्मा गांधी यांना पत्राव्दारे केली. यावर गांधींनी क्रांतिवीरांना कायदेशीर मदत उपलब्ध करून देत खटल्यातून निर्दोष सोडविले होते', असे मोलाचे ऐतिहासिक संदर्भ ज्येष्ठ कामगार नेते बळवंत आव्हाड यांनी क्रांतिवीर वसंतराव नाईक यांच्या ५० व्या पुण्यस्मरणानिमित्त 'मटा' सोबत बोलताना मांडले.

\B

जिल्ह्यातील नांदगांव तालुक्यातील मनमाड येथे जन्मलेल्या आणि स्वातंत्र्यचळवळीत विशेष योगदान देणाऱ्या क्रांतिवीर वसंतराव नाईक यांच्या नावे सामाजिक सहभागाच्या जोरावर शिक्षणसंस्था चालविली गेली किंवा मनमाडमध्ये पुतळाही उभारला गेला; तरीही त्यांच्या देशासाठीच्या योगदानाची सरकारने अधिकृत नोंद त्यांच्या पश्चातच्या ५० वर्षांनंतरही अद्याप घेतलेली नाही, अशी खंतही मनमाड येथील ज्येष्ठ कामगार नेते आव्हाड यांनी व्यक्त केली. इतक्या वर्षांमध्ये सरकारे आली अन् गेली. पण स्वातंत्र्यलढ्यात जीवनभर स्वत:ला झोकून देणाऱ्या या क्रांतीकारकाचे कार्य शासनाच्या नोंदींच्या यादीत दुर्लक्षितच राहीले आहे. आगामी काळात तरी ही चूक शासनाने दुरुस्त करावी, अशी अपेक्षाही त्यांनी व्यक्त केली.

शैक्षणिक जीवनातच स्वत:ला स्वातंत्र्य चळवळीत झोकून देणाऱ्या क्रांतिवीर वसंतराव नाईक यांचा जन्म १३ डिसेंबर १९१२ रोजी झाला होता. त्यांची १०६ वी जयंतीही गुरुवारी साजरी झाली. तर त्यांची ५० वी पुण्यतिथी आहे. यानिमित्ताने कामगार नेते आव्हाड यांच्याकडील दस्ताऐवजांच्या संदर्भांनुसार सधन घरात जन्मल्यानंतर क्रांतिवीर नाईक यांनी शिक्षण सुरू असताना ब्रिटीशकालीन राजवटीतील सायमन कमिशनला त्यांनी विरोध दर्शविला. मीठाच्या सत्याग्रहातील सहभाग, ब्रिटीशांविरोधात तरुणांचे संघटीकरण, चलेजाव घोषणांमधील सहभाग अशा देशकार्यातील सहभागांमुळे ब्रिटिशांनी त्यांना सहा महिन्यांची शिक्षा सुनावली होती. त्यानंतरही ब्रिटीशांनी त्यांना सरकारी खजिना लुटल्याच्या आरोपावरून शोध सुरू केला होता. त्यावेळी क्रांतिवीरांनी महात्मा गांधींना पत्र लिहून या खटल्यात लक्ष घालण्याची विनंती केली होती. यावर महात्मा गांधी यांनी बॅ. मुन्शी, बॅ. धीरूभाई देसाई यांच्यावर खटल्याची जबाबदारी सोपविली. नाशिकमध्येच चालविण्यात आलेल्या या खटल्यातून पुढे क्रांतिवीर नाईक निर्दोष सुटले. स्वातंत्र्योत्तर कालखंडात मनमाडच्या नगराध्यक्ष पदापासून तर कायदेमंडळावर आमदार पदापर्यंत जाऊनही राजकीय चढाओढीत त्यांच्या वाट्याला उपेक्षाच आली होती, असेही आव्हाड यांनी सांगितले.

क्रांतिवीर वसंतराव नारायणराव नाईक यांचे देशकार्यातील योगदान अतिशय मोठे आहे. सरकारने आजवर त्यांच्या कार्याची नोंद शासकीय दप्तरात करणे आवश्यक होते. आज त्यांचे ५० वे पुण्यस्मरण आहे. नागरीकांनी जशी त्यांची स्मृती जपली आहे तशीच शासनानेही त्यांच्या कार्याची नोंद करून स्मृती जपावी, अशी कळकळीची अपेक्षा आहे.

- \Bबळवंत आव्हाड, ज्येष्ठ कामगार नेते, मनमाड \B

..

लोगो : वसंतराव नाईक पुण्यतिथी विशेष

म. टा. खास प्रतिनिधी, नाशिक

'नामको'चे माजी चेअरमन कै. हुकूमचंद बागमार यांच्या प्रतिमेवरून राजकारण तापले असतांना निवडणूक निर्णय अधिकाऱ्यांनी मात्र या प्रकरणात हात झटकले आहे. प्रगती पॅनलने बागमार यांच्या प्रतिमेचा वापर प्रचारात केल्याने त्याबाबत त्यांचे पुत्र अजित बागमार यांनी आक्षेप घेत निवडणूक निर्णय अधिकारी यांच्याकडे तक्रार केली. पण, या तक्रारीवरून काय कारवाई करावी, असा प्रश्न अधिकाऱ्यांना पडला आहे.

यापूर्वी अजित बागमार यांनी फौजदारी दाखल करण्याचा इशारा दिला होता. त्यामुळे निवडणूक निर्णय अधिकाऱ्यांनी या तक्रारीची दखल घेतली नाही. तर हे प्रकरण पोलिस स्थानकात जाणार असल्याचे बोलले जात आहे. प्रगती पॅनलचे सर्व माजी संचालकांनी यापूर्वी हुकूमचंद बागमार यांच्या नेतृत्वाखाली निवडणूक लढवल्या असल्याने त्यांनी प्रचाराच्या पत्रक व पोस्टरवर प्रतिमेचा वापर केला आहे. तर दुसरीकडे नम्रता पॅनलनेही बागमार यांचीच प्रतिमा वापरली आहे. त्यामुळे हा वाद निवडणुकीत पेटण्याची शक्यता आहे.

'नामको'च्या निवडणुकीत प्रचाराने रंगत आलेली असतांना प्रतिमेचा वाद सुरू झाला आहे. याअगोदर अजित बागमार यांनी नम्रता पॅनलची निर्मिती करून माजी संचालकांची कोंडी केली. त्यानंतर या माजी संचालकांनी प्रगती पॅनल नाव पॅनलला दिले. आता प्रतिमेचा वादानेही त्यांच्या अडचणी वाढल्या आहे.

..

लोगो : नामको निवडणूक

परगावची वाहने 'टार्गेट' (फोटो)

-------

त्रस्त वाहनचालकांकडून नाराजी

---------

म. टा. वृत्तसेवा, नाशिक

सातपूर परिसरातील पपया नर्सरी येथे इतर जिल्ह्यांतील तथा राज्यांतील वाहनचालकांना वाहतूक पोलिसांकडून 'टार्गेट' केले जात आहे. त्यामुळे अशा त्रस्त वाहनचालकांकडून नाराजी व्यक्त होत आहे.

विशेष म्हणजे रविवारी सुटीच्या दिवशी पपया नर्सरी भागातील जाधव संकुल पोलिस चौकी अर्थात, अंबड टी पॉइंट येथे तब्बल एकाच वेळी सहा वाहतूक पोलिस कसे, असा प्रश्न वाहनचालकांना पडत आहे. खरोखरच अशा प्रकारे एकाच ठिकाणी सहा वाहतूक पोलिसांची नेमणूक केलेली असावी का, असा सवालही उपस्थित होत आहे.

पपया नर्सरी भागात वाहतूक पोलिसांबाबत अनेकांनी याआधी तक्रारी मांडल्या आहेत. मात्र, तरीही येथील समस्या सुटताना दिसत नाही. आता पुन्हा तेथेच वाहतूक पोलिसांचा जाच इतर जिल्ह्यांतून, राज्यांतून येणाऱ्या वाहनचालकांना सहन कराव लागत आहे. कारवाईवेळी दोन वाहतूक पोलिस अशी वाहने बाजूला घेण्यास सांगतात. त्यानंतर 'भीक नको, पण कुत्रे आवर' असे म्हणत वाहनचालक काही पैसे देत निघण्यास पसंती देतात. परंतु, अशा प्रकारामुळे नाशिकचेच नाव बदनाम होत असल्याचे वाहनचालकांचे म्हणणे आहे. याप्रश्नी पोलिस आयुक्तांनी लक्ष घालत कारवाई करावी, अशी मागणी वाहनचालकांनी केली आहे.

---

नाशिकचे नाव धार्मिक स्थळांचा जिल्हा म्हणून प्रसिद्ध आहे. परंतु, त्याच नाशिक शहरात इतर जिल्ह्यांतून, राज्यांतून येणाऱ्या वाहनचालकांना पपया नर्सरी भागात टार्गेट केले जाते. येथे एकाच वेळी सहा वाहतूक पोलिस कसे, असाही प्रश्न पडतो.

-बंडू आहेर, वाहनचालक

००००००००००००००००००००थोडक्यात००००००००००००००००००००

'एचएएल'तर्फे स्वच्छतेबाबत रामकुंड भागात प्रबोधन (फोटो)

पंचवटी : स्वच्छ भारत अभियानांतर्गत एचएएल, ओझर आणि घनकचरा विभाग पंचवटीतर्फे रामकुंड, म्हसोबा पटांगण, गौरी पटांगण परिसरात स्वच्छतेबाबत रॅली काढून स्वच्छतेची शपथ घेण्यात आली. या परिसरात स्वच्छताही करण्यात आली. या मोहिमेत 'एचएएल'चे अपर महाप्रबंधक एच. एल. सूर्यप्रकाश, उपमहाप्रबंधक एस चंदेल, जितेंद्र मोरे, प्रबंधक, विठ्ठल बनसोड, युनियन पदाधिकारी अशोक गावंडे, एस. पी. आहेर, नितीन पाटील, मन्सूर शेख, दीपक तावरे आदी सहभागी झाले होते. महापालिकेचे संजय दराडे, किरण मारू आदींसह कर्मचाऱ्यांनी मोहिमोप्रसंगी सहकार्य केले.

---

छायाचित्र प्रदर्शन

गंगापूररोड : ज्येष्ठ तत्त्वज्ञ, विचारवंत जे. कृष्णमूर्ती यांचे निवडक साहित्य आणि छायाचित्रांचे प्रदर्शन आज, शुक्रवार (दि. १४)पासून १६ डिसेंबरपर्यंत कुसुमाग्रज स्मारकात आयोजित करण्यात आले आहे. आज सायंकाळी ५ ते रात्री ८.३० या वेळेत खुल्या राहणाऱ्या या प्रदर्शनाचा रसिकांनी लाभ घ्यावा, असे आवाहन कृष्णमूर्ती अभ्यास मंडळाने केले आहे.

--

बॅरिकेडिंग निरुपयोगी

नाशिक : शहरातील अत्यंत वर्दळीच्या कॉलेजरोडवरील बीवायके कॉलेजसमोर लावलेले बॅरिकेडिंग काही तरुण हाताने बाजूला सारून त्यातून दुचाकी नेत असल्याने निरुपयोगी ठरत आहेत. परिणामी वाहतूकही विस्कळीत होत आहे. त्यामुळे वाहतूक पोलिसांनी याप्रश्नी त्वरित लक्ष घालून योग्य कार्यवाही करण्याची अपेक्षा त्रस्त वाहनचालकांकडून व्यक्त होत आहे.

--

बोगद्याजवळ कोंडी

इंदिरानगर : गोविंदनगरकडून इंदिरानगरकडे जाणारा बोगदा 'वन वे' आहे. पण, ज्यावेळी येथे वाहतूक पोलिस नसतात त्यावेळी असंख्य नागरिक नियम पाळत नाहीत. त्यामुळे या बोगद्याजवळ अनेकदा वाहतूक कोंडी होत आहे. त्यामुळे येथील वाहतुकीचे योग्य नियोजन करण्याची मागणी परिसरातून होत आहे.

००००००००००००

नाशिक : निफाड तालुक्यातील रसलपूर येथे शेतकरी कुटुंबातील एका तरुणाने गळफास घेऊन आत्महत्या केली. या तरुणाच्या वडिलांच्या नावे शेती असल्याची माहिती जिल्हा प्रशासनाने दिली. अमित अहमदखा पठाण (वय ३८) असे आत्महत्या करणाऱ्या शेतकऱ्याचे नाव आहे. १२ डिसेंबर रोजी त्यांनी गळफास घेऊन जीवनयात्रा संपवली. त्यामुळे जिल्ह्यात चालू वर्षात आत्महत्या करणाऱ्या शेतकऱ्यांची संख्या १०६ झाली आहे.

म. टा. वृत्तसेवा, जेलरोड

देवळालीगावचे रहिवासी, पोलिस मित्र व माजी प्रेस कामगार तानाजी पुंडलिक खेलुकर (वय ६८) यांचा नर्मदा परिक्रमासाठी जात असताना वाटेतच अपघाती मृत्यू झाला. त्यांच्या निधनाने सर्वत्र हळहळ व्यक्त करण्यात येत आहे. खेलुकर यांच्या पश्चात एक मुलगा, चार मुली असा परिवार आहे.

तानाजी खेलूकर हे देवळालीगाव व विहितगाव परिसरातील ५० नागरिकांसह नर्मदा परिक्रमासाठी खासगी ट्रॅव्हल्सने गेले होते. गुजरातमधील भरूच येथे एका मंदिरात दर्शनासाठी खेलूकर जात असताना त्यांचा पाय घसरला व ते डोक्यावर पडले. गंभीर दुखापत झाल्याने त्यांचा मृत्यू झाला. तेथे असलेले त्याचे नातेवाईक व मित्रांना मोठा धक्का बसला. खेलुकर व त्यांच्या नातेवाईकांनी नर्मदा परिक्रमा यात्रा अर्ध्यावर सोडली. खेलुकर यांचा मृतदेह खासगी वाहनाने देवळालीगावी आणण्यात आला. त्यांच्यावर गुरुवारी (दि. १३) रात्री अंत्यसंस्कार करण्यात आला.

खेलुकर हे आठ वर्षांपूर्वी सेवानिवृत्त झाले होते. नाशिकरोड परिसरात ते पोलिस मित्र म्हणून परिचित होते. उपनगर व नाशिकरोड पोलिस ठाण्याच्या कर्मचाऱ्यांना प्रत्येक कामात ते मदत करत असे. त्यामुळे पोलिसांमध्येही त्यांची चांगली प्रतिमा होती.

बचाव पक्षाचा युक्तिवाद संपला

म. टा. खास प्रतिनिधी, नाशिक

कोर्ट सुनावणीला नियमित हजर राहण्याची आवश्यकता नसून, त्यातून सूट मिळावी यासाठी संभाजी भिडे यांनी दाखल केलेल्या अर्जावर शुक्रवारी सुनावणी पूर्ण झाली. कोर्टाने पुढील सुनावणी ४ जानेवारी रोजी ठेवली असून, त्यात याबाबत आदेश होण्याची शक्यता आहे.

'माझ्या शेतातील आंबे खाल्ल्यानंतर ज्यांना मुलगा हवा असेल त्यांना मुलगाच होतो' असे वक्तव्य केल्याप्रकरणी शिवप्रतिष्ठान संघटनेचे संस्थापक अध्यक्ष संभाजी भिडे यांच्याविरुद्ध महापालिकेने कोर्टात खटला दाखल केला आहे. या प्रकरणाची सुनावणी शुक्रवारी जिल्हा कोर्टात झाली. मागील सुनावणीवेळी हजर राहिलेले भिडे आज सुनावणीला हजर नव्हते. भिडे यांच्या वतीने अॅड. अविनाश भिडे यांनी युक्तिवाद केला. भिडे यांना हजर राहण्यापासून सवलत मिळावी, यासाठी अॅड. भिडे यांनी अर्ज केला असून, त्यावर आज युक्तिवाद पूर्ण झाला. अॅड. भिडे यांनी सांगितले, की सर्व पुरावे कोर्टासमोर असून, भिडे यांनी दर सुनावणीला हजर राहणे आवश्यक नाही. भिडे यांचे वय, त्यांचे वास्तव्याचे ठिकाण, त्यांना पुरविण्यात येणारे पोलिस संरक्षण आणि त्यासाठी होणारा वारेमाप खर्च लक्षात घेता कोर्टाने त्यांना सवलत द्यावी, अशी विनंती अॅड. भिडे यांनी कोर्टाकडे केली. भिडे यांच्या वतीने दर तारखेला वकील बाजू मांडतील, तसेच आवश्यकता असेल त्या वेळी भिडे हजर राहतील, अशी हमीही बचाव पक्षाने दिली. दोन्ही बाजूंचा युक्तिवाद संपल्यानंतर कोर्टाने पुढील सुनावणी ४ जानेवारीला ठेवली आहे. या दिवशी कोर्ट आपला निर्णय देण्याची शक्यता आहे.

नाशिक : येथे सुरू असलेल्या वरिष्ठ गटाच्या पुरुष आणि महिलांच्या ६९ व्या राज्यस्तरीय बास्केटबॉल स्पर्धेत पुरुषांमध्ये मुंबई, पुणे, नागपूर, उस्मानाबाद, बीड, अहमदनगर या संघांनी आपले सामने जिंकून बाद फेरीसाठी आपली दावेदारी सिद्ध केली. महिलांमध्ये मुंबई, नागपूर, मुंबईनेही विजय मिळवत बाद फेरीतील स्थान भक्कम केले. पुरुषांच्या गटात अहमदनगरने यवतमाळचा ३७- २८ असा पराभव केला. बाद फेरीचे सामने शनिवारी होणार असून, १६ डिसेंबर रोजी अंतिम फेरी होईल.

म. टा. खास प्रतिनिधी, नाशिक

देशभरात ओसरत असलेली मोदी लाट आणि पाच राज्यातील निवडणुंकामध्ये त्यावर झालेल्या शिक्कामोर्तबाने शहरातील भाजपचे आमदार चांगलेच धास्तावले असून, पालिकेच्या कामकाजात सक्रिय झाले आहेत. माजी आयुक्त तुकाराम मुंढेंच्या कार्यकाळात आमदारांसह नगरसेवकांच्या कामांची मंदावलेली गती पूर्ववत करण्यासाठी भाजपचे तीनही आमदार आता सरसावले असून, सोमवारी (दि. १७) तीन आमदारांची पालिका आयुक्तांसोबत करवाढ, नगरसेवक निधी, रस्ते आणि आमदारांच्या कामाना एनओसी देण्यासंदर्भातील विषयांवर बैठक होणार आहे. या बैठकीत अनेक मुद्द्यांवर तोडगा निघड्याची शक्यता आहे.

शहरातील बांधकाम परवानग्या ठप्प होणे, अंगणवाड्या बंद होणे, नागरिकांवर भरमसाठ कर लादल्याने भाजपबद्दल नागरिकांमध्ये दिवसेंदिवस नाराजी वाढत चालली आहे. तुकाराम मुंढेंनी आमदारांनी मंजूर करून आणलेली कामेही रोखली होती. वर्षभरापूर्वी भाजपने २५७ कोटींच्या रस्त्यांचा प्रोजेक्ट तयार करून तो मंजूर करून घेतला. परंतु, तुकाराम मुंढेंनी त्रिसूत्री लावून त्यावर काट मारली. त्यातच सध्या ६२ हजार मिळकतधारकांना लाखांच्या घरपट्ट्या हातात पडत असल्याने भाजपविषयी त्याचा असंतोष वाढत चालला आहे. नगरसेवकांचा ७५ लाखांचा निधीही रोखला गेला आहे. त्यामुळे नागरिकांपाठोपाठ नगरसेवकही नाराज आहेत. तुकाराम मुंढेंच्या बदलीनंतर नागरिकांसह नगरसेवकांच्या मागे लागलेले शुक्लकाष्ठ सुटावे यासाठी पदाधिकारी प्रयत्नशील झाले आहेत. महापौरांसह पदाधिकाऱ्यांनी आयुक्तांची भेट घेवून त्यांना प्रलंबित कामे पुन्हा सुरू करण्याची मागणी केली होती. परंतु, आयुक्तांनी अभ्यास करून निर्णय घेणार असल्याचे सांगितले आहे. त्यामुळे नगरसेवकांची धडधड वाढली आहे. त्यातच पाच राज्यांमध्ये भाजपचे पानीपत झाले असून, मोदींचा करिश्मा ओसरला आहे. त्यामुळे आपलेही पानीपत होवू नये, यासाठी शहरातील भाजपचे तीनही आमदार कामाला लागले आहेत. करवाढ, अंगणवाड्या, बांधकाम परवानग्या, नगरसेवक निधी, आमदारांची कामे याबाबत चर्चा करण्यासाठी सोमवारी आमदार बाळासाहेब सानप, देवयानी फरांदे, सीमा हिरे यांची पालिकेत आयुक्तांसमवेत बैठक होणार आहे. महापौरांसह भाजपचे पदाधिकारी या बैठकीला हजर राहणार असून, शहरातील प्रलंबित प्रश्नांबाबत या बैठकीत तोडगा निघण्याची शक्यता आहे.

नाशिक : नाशिक आणि खवय्येगिरी, हे समीकरणचं अगदी खास आहे. नाशिकच्या मृणाल भिडे या तरुणीने, इन्स्टाग्रामवर गेल्या काही महिन्यांपासून 'फूड इज लाइफ शून्य शून्य एक' हा पेज ब्लॉग सुरू केला. या पेजवर नाशिकच्या सर्व चोखंदळांची खवय्येगिरी एकत्र व्हावी, यासाठी शनिवारी, १५ डिसेंबर रोजी सायंकाळी ६ ते ८ या वेळेत नाशिकच्या खवय्यांचा मेळावा होणार आहे. हा मेळावा कॉलेजरोडच्या 'दि हॅपी फिस्ट रेस्टॉरंट'मध्ये होणार असून, मेळाव्यात खवय्ये एकमेकांचा परिचय करुन देत, खाद्यपदार्थांची मेजवानीचा आनंद घेणार आहेत.

विद्यार्थ्यांचा सत्कार

जेलरोड : गोखले एज्युकेशन सोसायटीच्या नाशिकरोड केंद्रातर्फे जे. डी. सी. बिटको हायस्कूल येथे झालेल्या विज्ञान प्रदर्शनातील सहभागी विद्यार्थ्यांना प्रमाणपत्र वितरित करण्यात आली. मंचावर विभागीय सचिव प्राचार्य डॉ. राम कुलकर्णी, प्राचार्य एस. एस. दारोळे, प्राचार्य एस. पी. महाले, मीता राय, पर्यवेक्षक व्ही. सी. चौधरी, उपप्राचार्य डॉ. महेस औटी आदी उपस्थित होते. त्यांच्याहस्ते प्रमाणपत्र वितरण करण्यात आले.

नाशिकरोडच्या जेडीसी बिटको इंग्लिश स्कूल तसेच जयरामभाई हायस्कूलच्या विद्यार्थ्यांनी विज्ञान प्रदर्शनात चार्टस, मॉडेल्स व प्रोजेक्टस सादर केले होते. संस्थेच्या शतकपूर्ती महोत्सव आणि संस्थेचे सचिव मो. स. गोसावी यांच्या गौरवानिमित्त हे प्रदर्शन झाल्याची माहित प्राचार्य एस. पी. महाले यांनी दिली. आशा भालेराव यांनी सूत्रसंचलन केले. रोहणी पटवाल यांनी आभार मानले.

थोडक्यात

धुळ्यात सात घरांना आग

धुळेः शॉर्ट सर्किट होऊन पाच घरांना आग लागल्याची घटना शहरातील चाळीसगाव रोडलगत पूर्व हुडको वसाहतीमध्ये घडली. या आगीत परिसरातील सहा ते सात घरे जळून खाक झाली. या घटनेत गरीब मुस्लिम परिवारांचे संसार उघडयावर आले आहेत. यात घटनेमुळे कोणतीही जीवितहानी झाली नसली, तरी पाच लाखांहून अधिक नुकसान झाल्याचा अंदाज वर्तविण्यात आला आहे. शहरातील चाळीसगाव रोडलगत असलेल्या पूर्व हुडको वसाहतीमधील एका वस्तीला दुपारी एक वाजेच्या सुमारास अचानक ही आग लागली.

म. टा. वृत्तसेवा, धुळे

शॉर्ट सर्किट होऊन पाच घरांना आग लागल्याची घटना शहरातील चाळीसगाव रोडलगत पूर्व हुडको वसाहतीमध्ये घडली. या आगीत परिसरातील सहा ते सात घरे जळून खाक झाली. या घटनेत गरीब मुस्लिम परिवारांचे संसार उघडयावर आले आहेत. यात घटनेमुळे कोणतीही जीवितहानी झाली नसली, तरी पाच लाखांहून अधिक नुकसान झाल्याचा अंदाज वर्तविण्यात आला आहे.

शहरातील चाळीसगाव रोडलगत असलेल्या पूर्व हुडको वसाहतीमधील एका वस्तीला दुपारी एक वाजेच्या सुमारास अचानक आग लागली. एका घरात विजेच्या शॉट सर्किटमुळे आग लागल्याचे नागरिकांकडून सांगण्यात आले. या आगीमुळे घरातील सिलेंडरनेदेखील पेट घेतला होता. यामुळे आग पसरुन शेजारील घरांपर्यंत पोहोचली आणि रौद्ररूप धारण केले. यावेळी काही नगारिकांनी तत्काळ महानगरपालिकेच्या अग्निशमन विभागाला फोनवरुन घटनेची माहिती दिली. काही वेळातच अग्निशमन बंब घटनास्थळी दाखल होऊन आग आटोक्यात आणली. काही नागरिकांनीही आग विझविण्यासाठी मदत केली. याबाबत चाळीसगावरोड पोलिस ठाण्यात माहिती देण्यात आली. पोलिसांनी घटनास्थळी पाहणी करुन नोंद केली आहे. आगीत फरमान सैयद रज्जाक, अमिनाबी सैयद, मेहजूद सैयद, यास्मीन खाटिक आणि रुबेनाबी मेहमूद शेख यांची घरे खाक झाली. या आगीमुळे सुमारे पाच लाखांहून अधिक नुकसान झाल्याचा अंदाज वर्तविण्यात आला आहे.

म. टा. वृत्तसेवा, धुळे

धुळे व नंदूरबार जिल्ह्यातून सुरत-नागपूर हा राष्ट्रीय महामार्ग क्रमांक ६ आणि धुळे-सोलापूर हा राष्ट्रीय महामार्ग क्रमांक २११ या दोन्हींचे भूसंपादन करताना जमिनीच्या खरेदी-विक्रीमध्ये मोठ्या प्रमाणात गैरव्यवहार झाल्याचे समोर आले आहे. या खरेदी-विक्री व्यवहारातील अनियमिततेची चौकशी करण्यासाठी आता महसूल विभागाने विभागीय आयुक्तांच्या अध्यक्षतेखाली विशेष चौकशी पथक स्थापन केले आहे.

धुळे, जळगाव, नंदूरबार जिल्ह्यातून जाणाऱ्या राष्ट्रीय महामार्ग क्रमांक सहा व २११ यांच्या चौपदरीकरणासाठी भूसंपादन करताना प्रामुख्याने आदिवासींच्या जमिनींची सरकारी परवानगीशिवाय झालेल्या खरेदी-विक्री व्यवहारातील अनियमिततेची चौकशी करण्यासाठी हे विशेष पथक स्थापन करण्यात आले आहे. चौकशी पथकाचे अध्यक्ष नाशिकचे विभागीय आयुक्त राजाराम माने हे आहेत. नाशिक परिक्षेत्राचे विशेष पोलिस महानिरीक्षक, आदिवासी विभागाचे नाशिक येथील अपर आयुक्त, जिल्हाधिकारी किशोर निंबाळकर, धुळे व नंदूरबार जिल्हाधिकारी, नोंदणी उपमहानिरीक्षक तथा मुद्रांक उपनियंत्रक हे या पथकाचे सदस्य आहेत. विभागीय आयुक्त कार्यालयातील भूसंपादन उपायुक्त हे सदस्य चौकशी पथकाला संबंधित राष्ट्रीय महामार्गाच्या तसेच शासकीय प्रकल्पासाठी लागणाऱ्या जमिनीच्या संपादनाच्या अनुषंगाने सखोल चौकशी करुन त्याचा अहवाल साठ दिवसांच्या आत मुख्य सचिवांना सादर करणार आहेत.

विशेष चौकशी पथकाने चौकशीत संबंधित ठिकाणी आढळून आलेल्या दोषी व्यक्तींची नावे, पदनाम व कालावधी याबाबतची माहिती नमूद करण्यात येणार आहे. अशा प्रकारचे गैरव्यवहार भविष्यात होणार नाहीत याबाबत उपाययोजना सुचविण्यात येणार आहेत. या पथकाला महसूल, मुद्रांक व नोंदणी, पोलिस व अन्य संबंधित विभागाचे क्षेत्रीय अधिकारी यांना चौकशीसाठी बोलावण्याची मुभा आहे. तसेच चौकशीसाठी बोलावण्यात येणाऱ्या अधिकारी व कर्मचाऱ्यांनी पथकाला आवश्यक कागदपत्रे उपलब्ध करुन् देणे बंधकारक आहे, असे आदेश महसूल विभागाने दिले आहेत.

एजंटांची साखळी

धुळे व नंदुरबार जिल्ह्यातून जात असलेल्या राष्ट्रीय महामार्ग क्रमांक सहाबाबत भूसंपादनाविषयी अनेक तक्रारी करण्यात आल्या होत्या. मात्र, तत्कालीन भूसंपादन अधिकाऱ्यांनी याकडे दुर्लक्ष केले होत. यात शेतकऱ्यांना भूसंपादनाचा योग्य मोबदला मिळावा म्हणून काही एजंट सक्रिय झाले होते. ते शेतकऱ्यांकडून टक्केवारी घेऊन प्रशासनाकडून मोबदला मिळवून देण्यासाठी संबंधित अधिकाऱ्यांकडे तगादा लावत असल्याचे प्रकार घडले होते. आदिवासींच्या जमिनींबाबत गैरव्यवहारदेखील झाले होते. याबाबत पोलिस ठाण्यांमध्ये गुन्हे दाखल करण्यात आले आहेत. यामुळे कोट्यवधी रुपयांचा घोटाळा महामार्ग चौपदीकरणाच्या भूसंपादनात झाला असल्याने याची चौकशी होऊन दोषींवर कारवाई करणे अपेक्षित असल्याचे शेतकऱ्यांचे म्हणणे आहे.

म. टा. प्रतिनिधी, नाशिक

अरबी समुद्र आणि पश्चिम बंगालच्या महासागरातील वादळी वाऱ्यांचा परिणाम शहरातील हवामानावर झाला असल्याने, शहरात शुक्रवारी दिवसभर वातावरण ढगाळ होते. शहरात दिवसभर हुडहुडी कायम असल्याने, नाशिककरांना ऊबदार कपड्यांचा आधार घ्यावा लागला. शहरातील वाऱ्यांचा मंदावलेला वेग पाहता, पुढील काही दिवस गारठा कायम राहणार असल्याचे हवामान खात्याने सांगितले आहे.

शहरात शुक्रवारी किमान १०.४, तर कमाल २८.०५ अंश सेल्सियस तापमानाची नोंद करण्यात आली. पूर्वेकडून उत्तरेकडे वाहणारे वारे ताशी ४ ते ५ नॉट्स वेगाने वाहू लागल्याने, शहरात दिवसभर गारवा जाणवला. त्यामुळे शहरात आर्द्रताचे प्रमाण पहाटे ७० तर सायंकाळी फक्त ४० टक्के असल्याची नोंद करण्यात आली. बुधवारपासून शहरातील किमान तापमान ९ ते १० अंश सेल्सियसच्या दरम्यान असून, कमाल तापमान २८.०५ इतके आहे. दोन दिवसांपासून समुद्रातील वादळी वाऱ्यांमध्ये झालेल्या बदलांमुळे, पूर्वेकडून उत्तरेकडे वाहणाऱ्या वाऱ्यांचा वेग वाढला आहे. त्यामुळे शहरात दिवसभर थंडीचा कडाका जाणवत असून, येत्या काही दिवसात थंडीचा पारा आणखीन घसरणार असल्याची माहिती हवामान खात्याने दिली आहे. शुक्रवारी पहाटेपासूनच थंडीचा जोर कायम असल्याने, दिवसभर नाशिककरांना हुडहुडी भरल्याचे दिसून आले. तसेच संध्याकाळनंतर अनेक ठिकाणी नाशिककरांनी शेकोट्या करत ऊब घेतल्याचेही पहायला मिळाले.

टीम मटा, नाशिक

जेलरोडला शाळा सुटल्यावर रिक्षावाले, व्हॅनवाले काका तसेच पालक विद्यार्थ्यांना घेण्यासाठी येतात. त्यांची वाहने रस्त्यावरच उभी केली जातात. सेंट फिलोमिना हे त्याचे उत्तम उदाहरण आहे. या शाळेचे मोठे मैदान असतानाही वाहनांना आत प्रवेश दिला जात नाही. त्यामुळे ही वाहने रस्त्यावरच उभी असतात. पर्यायाने वाहतूक अर्धा तास खोळंबते.

कोठारी कन्या शाळा, के. एन. केला आणि जेलटाकीवरील महापालिकेच्या तीन शाळा भरण्याच्या आणि सुटण्याच्या वेळीच प्रचंड वाहतूक असते. विद्यार्थ्यांना रस्ता ओलांडता येत नाही. सेंट फिलोमिना शाळेच्या विद्यार्थ्यांना कोणी वाली नाही. शाळा सुटल्यावर प्रचंड वाहतुकीमुळे विद्यार्थीच नव्हे तर पालकांनाही रस्ता ओलांडता येत नाही. शाळेसमोर दोन्ही बाजूला गतिरोधक टाकले नाही, तर दुर्घटना होण्याची भीती आहे. जेलरोडच्या शाळांसमोर जेथे गरज आहे तेथे त्वरीत गतिरोधक टाकावेत. अवजड वाहनांवर कारवाई करावी.

गतिरोधक नसल्याने वाहने सुसाट असतात. शाळा सुटण्यावेळी या शाळांचे खासगी सुरक्षारक्षकच ट्रॅफिक पोलिस बनतात. विद्यार्थी रस्ता ओलांडताना वाहने थांबविणे, पार्किंगबाबत सूचना करणे आदी कामे ते करतात. पण त्यांना कोणी जुमानत नाही. अनेक बळी गेल्यानंतर आणि वारंवार मागणीनंतर जेलरोड टाकीवर सिग्नल बसविण्यात आला. मात्र, तो तोडण्यात वाहनचालक धन्यता मानतात. या चौकात तीन शाळा आहेत. त्या विद्यार्थ्यांचा जीव नेहमीच धोक्यात असतो. बिटको चौकात वाहतूक पोलिसांची चौकी आहे. या पोलिसांनी शाळा सुटण्याच्या व भरण्याच्या वेळी वाहतूक नियंत्रित करण्याची गरज आहे.

कॉलेजांपुढे समस्या

गोसावी पॉलिटेक्निक व बिटको कॉलेज सुटल्यावर विद्यार्थी दुभाजक ओलांडून बस स्टॉपवर जातात. नाशिक-पुणे मार्ग कायम वर्दळीचा असतो. हे विद्यार्थी जीव धोक्यात घालून रस्ता ओलांडतात. के. जे. मेहता हायस्कूल व ज्युनियर कॉलेजच्या विद्यार्थ्यांनाही वेगवान वाहनांचा सामना करावा लागतो. सामनगाव पालिटेक्निक कॉलेज परिसरात वाहने सुसाट धावतात. देवळाली कॅम्प कॉलेज रस्त्यावर आहे. या रस्त्यावर डझनभर गतिरोधक आहेत. तरीही अपघात होतात. शाळांबरोबरच महाविद्यालयीन विद्यार्थ्यांचे जीवही वेगवान वाहनांमुळे धोक्यात आले आहेत.