पोलिस आयुक्तालयाच्या स्थापनेला आता २७ वर्ष पूर्ण होणार असून, मंगळवारपासून (दि. २) सुरू होणाऱ्या पोलिस रेझींग सप्ताहाच्या आयोजनात याची झलक पाहण्यास मिळणार आहे. नाशिकमध्ये यापूर्वी काम केलेल्या सर्व पोलिस आयुक्तांना एकाच मंचावर बसवण्याचाही प्रयत्न होणार आहे.
शहर पोलिस आयुक्तालयाची स्थापना सप्टेंबर १९९० मध्ये झाली. तत्कालीन पोलिस आयुक्त के. के. कश्यप यांनी १९९२ मध्ये पदभार सोडला होता. या पार्श्वभूमीवर शहर पोलिसांनी २ जानेवारीपासून सुरू होणाऱ्या पोलिस रेझींग सप्ताहाचे नियोजन हाती घेतले आहे. या सप्ताहात सर्वसामान्य नागरिकांना पोलिसांचे काम जवळून पाहण्याची संधी उपलब्ध करून दिली जाते. वेगवेगळ्या वयोगटातील विद्यार्थ्यांना पोलिस स्टेशनला आणून पोलिसांबद्दलची त्यांच्या मनातील भीती दूर करण्याचा प्रयत्न केला जातो. पूर्वी हा कार्यक्रम एकाच दिवसात आटोपला जाई. आता तो एक आठवडाभर राबवला जातो. याबाबत पोलिस आयुक्त डॉ. रवींद्रकुमार सिंगल म्हणाले, की पोलिस आयुक्तालयाची २५ वर्षे पूर्ण झाली आहेत. त्यामुळे यंदाच्या रेझींग सप्ताहामध्ये वेगवेगळ्या तसेच अभिनव कार्यक्रमांचे आयोजन करण्यात येणार आहे. मागील २५ वर्षात नाशिक शहारात काम केलेल्या सर्व पोलिस आयुक्तांना एकाच मंचावर आणण्याचा प्रयत्न सुरू आहे. त्यातील काही निवृत्त झाले असून, काही सध्या कार्यरत आहेत. पोलिस म्हणून काम करताना अधिकाऱ्यांचा शहराशी जवळून संबंध येतो. शहरातील चांगले नाते जोडले जाते. काही कटू आठवणीही असतात. यानिमित्ताने या सर्व बाबींना उजाळा देण्याचा प्रयत्न होऊ शकतो, असे पोलिस आयुक्त सिंगल यांनी स्पष्ट केले. सध्या सर्वांशी संपर्क साधण्याचा प्रयत्न सुरू असून, एकाच दिवशी किती अधिकारी एकत्र येऊ शकतील, हे अद्याप स्पष्ट नाही. आमचा प्रयत्न जास्तीत जास्त आजी-माजी पोलिस आयुक्तांनी एकत्र यावे यासाठी होणार असल्याचे त्यांनी स्पष्ट केले.
हे होते पोलिस आयुक्त
के. के कश्यप, पी. चक्रवर्ती, पी. के. जोशी, पी. पी. शर्मा, पी. टी. लोहार, एल. एल. वर्मा, पी. डी. पवार, पी. टी. लोहार, हिमांशू रॉय, एस. एम. सय्यद, हिमांशू रॉय, व्ही. डी. मिश्रा, विनोद लोखंडे, कुलवंतकुमार सरंगल, एस. जगन्नाथन
मोबाइल अॅप डाउनलोड करा आणि राहा अपडेट