महापालिकेच्या निवडणुकीत राखीव जागांवर उमेदवारी करून निवडून आलेल्या पाच नगरसेवकांनी अखेर निवडणूक विभागाकडे जातपडताळणी प्रमाणपत्र सादर केले आहे. त्यामुळे त्यांच्यावरील अपात्रतेची कारवाई टळली आहे. जात पडताळणी प्रमाणपत्र सादर करणाऱ्यांमध्ये भाजपचे उद्धव निमसे, मिर्झा शाहीन सलीम बेग, शिवसेनेच्या सत्यभामा गाडेकर, काँग्रेसच्या समिना मेमन, मनसेचे योगेश शेवरे यांचा समावेश आहे.
महापालिका निवडणुकीत निवडून आल्यानंतर सहा महिन्यांच्या आत जातपडताळणी प्रमाणपत्र सादर करणे बंधनकारक असते. महापालिकेची निवडणूक २३ फेब्रुवारीला झाली. त्यामुळे २३ ऑगस्ट रोजी निवडणुकीला सहा महिने पूर्ण होत असल्याने आरक्षित जागेवरून निवडून आलेल्यांना जात पडताळणी प्रमाणपत्र सादर करणे आवश्यक होते. परंतु, भाजपचे उद्धव निमसे, मिर्झा शाहीन सलीम बेग, शिवसेनेच्या सत्यभामा गाडेकर, काँग्रेसच्या समिना मेमन, मनसेचे योगेश शेवरे यांनी ते जातवैधता पडताळणी प्रमाणपत्र सादर केले नव्हते. त्यामुळे १५ दिवसांपूर्वी निवडणूक विभागाने या नगरसेवकांसह जातपडताळणी समितीला पत्र देऊन तातडीने जातपडताळणी प्रमाणपत्र सादर करण्याची विनंती केली होती.
निवडणूक विभागाच्या नोटिसीमुळे या पाचही नगरसेवकांची धावपळ उडाली. जात पडताळणी प्रमाणपत्र मिळवण्यासाठी त्यांनी कार्यालयाकडे धाव घेतली. अखेरीस मंगळवारी या पाचही नगरसेवकांनी ‘ओबीसी’चे जातपडताळणी प्रमाणपत्र महापालिकेच्या निवडणूक विभागाकडे सादर केले. त्यामुळे त्यांच्यावरील अपात्रतेची कारवाई आता टळली आहे. उद्धव निमसे यांच्या जात प्रमाणपत्राबद्दल अनंत सूर्यवंशी यांनी आक्षेप घेतला होता.
मोबाइल अॅप डाउनलोड करा आणि राहा अपडेट