म. टा. वृत्तसेवा, नाशिकरोड
येथील करन्सी नोट प्रेसमध्ये पाचशेच्या लाखो नव्या नोटा छापण्यात आल्या आहेत. मुंबईसह देशातील विविध भागात या नोटा व्यवहारात आल्या आहेत. मात्र, प्रेसच्या मायभूमीतील नाशिककरांनाच अद्याप या नोटांचे दर्शन झालेले नाही. त्यामुळे सखेद आश्चर्य व्यक्त केले जात आहे.
नोटाबंदीच्या निर्णयानंतर नाशिकरोड करन्सी नोट प्रेसमध्ये पाचशेच्या नव्या नोटा छापण्याचे काम युद्धपातळीवर सुरू आहे. पाचशेसह अन्य नोटा छापण्यासाठी प्रेस कामगार दिवस-रात्र मेहनत घेत आहेत. त्यांनी दोन रविवार जादा काम केले. मात्र, त्यांनाही या नोटा उपलब्ध झालेल्या नाहीत, तसेच नाशिककरांना त्यांची प्रतीक्षा करावी लागत आहे. पाचशेच्या १२४ दशलक्ष नव्या नोटा एकट्या नाशिकरोड प्रेसमध्ये छापून रिझर्व्ह बॅंकेला पाठविण्यात आल्या आहेत. मात्र, तरीही त्यांचे नाशिककरांना दर्शन झालेले नाही.
प्रेसमध्ये पाऊस!
केंद्र सरकारने ८ नोव्हेंबरला पाचशे व एक हजाराची नोट चलनातून बाद करून पाचशे आणि दोन हजारांच्या नवीन नोटा व्यवहारात आणण्याचे जाहीर केले. त्यामुळे देशभरात नोटांची तीव्र टंचाई झाली होती. ती दूर करण्यासाठी नाशिकसह देशातील चारही प्रेसमध्ये युद्धपातळीवर एक, वीस, पन्नास, शंभर, पाचशे आणि दोन हजारांच्या नोटांची छपाई सुरू आहे. एकट्या नाशिकरोड प्रेसमधून १३ ते २४ नोव्हेंबरदरम्यान सर्व प्रकारच्या मिळून तीनशे दशलक्ष नोटा छापून पाठविण्यात आल्या आहेत. त्यात पाचशेच्या १२४ दशलक्ष नोटा आहेत.
पाचशे रुपयांची नवीन नोट कशी आहे, याबाबत माझ्याही मनात उत्सुकता होती. मुंबईहून ग्राहकांच्या मुलाने ती आणून दिल्यानंतर माझी उत्सुकता भागली. ही नोट दोन हजाराप्रमाणेच सुंदर आहे. पाचशेच्या नोटा नागरिकांना उपलब्ध करून दिल्यास नोटा टंचाईची समस्या बऱ्याच अंशी सुटेल.
- दिलीप बोराडे
---
दोन हजार उपलब्ध
देशात पाचशेपेक्षा दोन हजारांच्या नव्या नोटा अगोदर छापून नागरिकांपर्यंत पोहोचविण्यात आल्या. त्या बॅंका व एटीएममधून मिळताच नागरिकांनी नोटेबरोबर फोटो काढून घेतले. ते मित्र व नातेवाईकांना उत्साहाने पाठवले. मात्र, पाचशेची नोट नाशिकमध्ये छापूनही ती मिळत नसल्याने नागरिकांनी नाराजी व्यक्त केली आहे. दोन हजाराची नोट लवकर कोणी स्वीकारत नाही. पाचशेची नोट उपलब्ध झाल्यास व्यवहारात सुलभता येणार आहे. त्यामुळे ती त्वरित उपलब्ध करावी, अशी मागणी होत आहे.
दिलीप बोराडे लकी!
जेलरोड येथील पंचकमधील किराणा दुकानदार दिलीप बोराडे यांच्या एका ग्राहकाचा मुलगा मुंबईत कामाला आहे. त्याने बोराडे यांच्याकडून किराणा सामान घेतले होते. मुंबईहून त्याने पाचशे रुपयाची नोट आणून ती बोराडे यांना उपलब्ध केली. त्यामुळे पाचशेची नवी नोट मिळवणारे बोराडे हे परिसरातील पहिलेच लकी नाशिककर ठरल्याची चर्चा रंगत आहे.
मोबाइल अॅप डाउनलोड करा आणि राहा अपडेट
