म. टा. वृत्तसेवा, पंचवटी
अहिराणी भाषेला तिची म्हणून स्वतंत्र लिपी नाही. अजूनही ती बोलीभाषेच्या कळपातच आहे. अहिराणी बोलणारे, तिची परंपरा सांगणारे, तिच्या विषयी अभिमान बाळगणारे कोट्यावधी लोक आहेत. वर्षानुवर्ष आपल्या काळजात आणि ओठावर अहिराणी फुलवणारे आहेत. या भाषेला लिपी लाभली असती तर तिचा आणखी विकास झाला असता, पण तसे घडले नाही, असे प्रतिपादन ज्येष्ठ साहित्यिक उत्तम कांबळे यांनी केले. खांदेश अहिराणी कस्तुरी मंच महाराष्ट्र आणि नाशिक महापालिका यांच्यातर्फे खांदेश साहित्य, सांस्कृतिक महोत्सवाच्या उद्घाटनप्रसंगी ते महोत्सवाच्या अध्यक्षस्थानावरून बोलत होते.
कालिदास कला मंदिर येथे झालेल्या या महोत्सवाचे उद्घाटन प्रसिद्ध उद्योजक उमेशभाई राठी यांच्या हस्ते करण्यात आले. मी मराठी न्यूजचे सल्लागार संपादक तुळशीराम भोईटे, आमदार बाळासाहेब सानप, उपमहापौर गुरुमित बग्गा, अहिराणी अभ्यासक डॉ. उषा सावंत, सदाशिव माळी, मंचच्या महिला प्रदेशाध्यक्ष वंदना वनकर, विजया मानमोडे उपस्थित होते.
कांबळे म्हणाले, खान्देशाने जन्माला घातलेली अहिराणी ही अन्य वेगळ्या भाषांपेक्षा पूर्णतः वैशिष्ट्यपूर्ण अशी भाषा आहे. या भाषेच्या जन्मामध्ये अनेकांचा सहभाग असला तरी मराठीची भूमिका अधिक आहे. खान्देशला त्याचा एक भूगोल आहे, एक कृषी संस्कृती आहे. त्याचे एक अर्थकारण आहे. खान्देशची वस्त्रसंस्कृती, अलंकार संस्कृती, नृत्य कला सस्कृती आगळी-वेगळी आहे. अनेकांना ती मोहिनी घालते. अहिराणीच्या व्यासपीठावर अन्य भाषांना निमंत्रित करणे आनंददायी आणि आवश्यक आहे. त्यामुळे भाषा-भाषांमधला भगिनीभाव दृढ होतो.
उद्योजक राठी यांनी विविध पदार्थ एकत्र आल्यानंतर जशी चवदार मिसळ तयार होते, त्याचप्रमाणे विविध भाषा एकत्र आल्यानंतर त्यांच्या जो सुसंवाद होतो तो सर्वांना आवडणार असतो, असे सांगितले.
भोईटे यांनी बोलीभाषेतून बोलण्याचा आनंद आगळावेगळा असतो असे सांगितले. आमदार सानप यांनी बोलीभाषा टिकण्यासाठी त्यांचे संवर्धन होण्यासाठी अशा प्रकारच्या महोत्सवाची गरज असल्याचे सांगितले. उपमहापौर बग्गा यांनी शुभेच्छा दिल्या.
सांस्कृतिक क्षेत्रात चाळीस वर्ष योगदान देणारे विश्राम बिरारी यांना जिवन गौरव पुरस्काराने सन्मानित करण्यात आले. तसेच योगेश शिरसाठ, अश्विनी कासार, अमोल थोरात, प्रकाश पाटील, आशा रंधे, नाना खेडीकर, रेखा महाजन, भैय्या पाटील, सुनील गायकवाड, पुष्पा ठाकूर, आबा पाटकरी, तनय मल्हारा, विजयराज पाटील, रामदास वाघ, डॉ. रमेश सूर्यवंशी, शाहीर शिवाजी पाटील, किशोर कुलकर्णी, पंकज निकम, सुभाष शिंदे, सुनील ढगे, रजनी घुगे यांना कलाभूषण, कलागौरव, खांदेश भूषण, साहित्यभूषण आदी पुरस्कारांनी गौरविण्यात आले. रेखा महाजन यांनी सूत्रसंचालन केले.
मोबाइल अॅप डाउनलोड करा आणि राहा अपडेट
