जिल्हा परिषद निवडणुकीचे आरक्षण जाहीर होताच इच्छुक उमेदवारांनी गावागावात जाऊन मतदारांची चाचपणी सुरू केली आहे. पहिल्यांदाच तालुक्यातील लोहोणेर व नव्याने अस्तित्त्वात आलेला वाखारी हे दोन्ही जिल्हा परिषद गट सर्वसाधारण महिलेसाठी राखीव झाल्याने कधी नव्हे इतकी चुरस निर्माण झाली आहे.
जिल्हा परिषदेच्या राजकारणात गेल्या तीस वर्षांपासून देवळा तालुक्यातील राजकारण्यांनी आपला वेगळा ठसा उमटविला आहे. जिल्हा परिषदेचे आरक्षण जाहीर झाल्यानंतर गुडग्याला बाशिंग बांधून बसलेल्या अनेक इच्छुकांची हिरमोड झाला असला तरी पर्याय म्हणून आपल्या सौभाग्यवतींना संधी देण्यासाठी सर्वच इच्छुक उमेदवार सरसावले आहेत. तालुक्यातील लोहोणेर, वाखारी गट सर्वसाधारण महिलेसाठी राखीव असून उमराणा गट अनुसूचित जातीसाठी राखीव आहे. जिल्हास्तरावरच्या जिल्हा परिषद, पंचायत समितीच्या निवडणुकीसाठी ‘जिल्हा विकास आघाडी’ निर्माण करण्याच्या हालचाली चालू झाल्या असून देवळा तालुक्यात त्याचीच पुनरावृत्ती होते की पक्षीय चिन्हावर निवडणूक लढविली जाते याबाबत सर्वांना उत्कंठा लागली आहे. केदा आहेर यांच्या पत्नी तथा देवळा नगरपंचायतीच्या नगराध्यक्षा धनश्री आहेर यांचे नाव दोन्ही गटातून चर्चेत आहे. वाखारी गटातून माजी आमदार शांतारामतात्या आहेर यांच्या स्नुषा, राष्ट्रवादीचे प्रांतिक सदस्य योगेश आहेर यांच्या पत्नी लीना आहेर यांचेही नाव चर्चेत आहे. शांताराम आहेर यांचा तालुक्याच्या राजकारणात अजूनही दबदबा कायम आहे. मितभाषी स्वभावाच्या योगेश आहेर यांनी तालुक्यातील कार्यकर्त्यांचा संपर्क कायम ठेवल्याने व गटातील असलेल्या नात्यागोत्यामुळे लीना आहेरांना ती एक जमेची बाजू आहे. वाखारी गटातून सुनील आहेर यांच्या पत्नी नूतन आहेर, रामेश्वरचे उपसरपंच विजय पगार यांच्या पत्नी वर्षा पगार, माजी जिल्हा परिषद सदस्या तथा पंचायत समितीचे माजी सभापती अशोक आहेर यांच्या पत्नी भारती आहेर, गुंजाळनगरच्या विद्यमान उपसरपंच सुजाता गुंजाळ, देवळ्याचे माजी सरपंच जितेंद्र आहेर यांच्या पत्नी सुलभा आहेर, खर्ड्याच्या उपसरपंच प्रमिला जगताप, वत्सला देवरे, बांधकाम सभापती लक्ष्मीकांत आहेर यांच्या पत्नी सरोज आहेर आदींचीही नावे चर्चेत आहेत. लोहोणेर गटातून देवळ्याच्या नगराध्यक्षा धनश्री आहेर यांच्या बरोबरच शिवसेनेचे माजी उपजिल्हाप्रमुख, पंकज निकम यांच्या पत्नी सुरेखा निकम, खालपचे भूमिपुत्र अरविंद सूर्यवंशी यांच्या पत्नी अलका सूर्यवंशी, लोहोणेरच्या विद्यमान सरपंच तथा युवानेते दीपक बच्छाव यांच्या पत्नी जयवंता बच्छाव, राष्ट्रवादीचे तालुकाध्यक्ष पंडितराव निकम यांच्या पत्नी सरला निकम आदींचीही नावे चर्चेत आहेत. उमराणा गट अनुसूचित जातीसाठी राखीव आहे. कर्मवीर ग्यानदेवदादा देवरे व जिल्हा परिषदेचे माजी उपाध्यक्ष विश्वासराव देवरे यांच्या गटांकडून प्रबळ उमेदवार उभा केला जाण्याची चिन्हे दिसत आहेत.
मोबाइल अॅप डाउनलोड करा आणि राहा अपडेट