सातपूर, श्रमिकनगर भागात टवाळखोरांनी पाच चारचाकी वाहनांच्या काचा फोडून नुकसान केल्याचे मंगळवारी उघडकीस आले आहे. दारूच्या नशेत समाजकंटकांकडून वाहनांच्या काचा फोडण्याचे कृत्य केले जात असल्याची शक्यता पोलिसांनी व्यक्त केली आहे.
टवाळखोरांकडून गेल्या महिन्यात सातपूर कॉलनी भागात अनेक वाहनांच्या काचा फोडल्या होत्या. आता त्यानंतर पुन्हा वाहनांच्या काचा फोडण्यात आल्याने परिसरातील नागरिक भयभीत झाले आहेत. दरम्यान, घटनेची माहिती मिळताच सहाय्यक पोलिस आयुक्त अतुल झेंडे, सातपूर पोलिस स्टेशनचे पोलिस निरिक्षक मनोज करंजे यांनी सहकाऱ्यांसह घटनास्थळी भेट देत पहाणी केली.
कोणालाही अडथळा न ठरणाऱ्या आणि घराच्या समोर उभ्या करण्यात आलेल्या चारचाकी वाहनांच्या काचा फोडण्याचे कारण काय? असा प्रश्न रहिवाशी उपस्थित करतात. संबंधित टवाळखोरांवर पोलिसांनी वचक बसवावा, अशी मागणी नागरिकांनी केली आहे. काचा फोडलेली वाहने श्रमिकनगरच्या वेगवेगळ्या भागातील आहेत. हातात मिळेल तो दगड वाहनांच्या काचांवर फेकत नुकसान करण्यात आले आहे. रहिवाशांनीदेखील संशयित अथवा गुन्हेगारी स्वरूपाच्या व्यक्ती आढळल्यास पोलिसांना तत्काळ कळवावे, असे आवाहन पोलिसांनी केले आहे.
दोषींवर कारवाईची मागणी
श्रमिकनगर भागात टवाळखोरांनी चारचाकी वाहनांच्या काचा फोडत नुकसान केले. या प्रकरणी दोषींवर तत्काळ कारवाई करण्यात यावी आणि कायदा व सुव्यवस्था चोख ठेवण्यात यावी, अशी मागणी नगरसेवक दिनकर पाटील व लता पाटील पोलिसांकडे केली आहे.
मोबाइल अॅप डाउनलोड करा आणि राहा अपडेट