आत्महत्याग्रस्त ३७ शेतकरी कुटुंबांना लाभ
म. टा. प्रतिनिधी, नाशिक
शेतकरी आत्महत्यांचे सत्र काहीसे थांबले असले तरी गेल्या आठ महिन्यांत जिल्ह्यात ६४ शेतकऱ्यांनी मृत्यूला कवटाळले. त्यापैकी ३७ शेतकरी कुटुंब मदतीस पात्र ठरले असून, काही शेतकरी आत्महत्या मदतीच्या निकषांत न बसल्याने अशी २६ प्रकरणे जिल्हा प्रशासनाने फेटाळून लावली आहेत.
अवकाळी पाऊस, गारपीट, दुष्काळासारखी निसर्गाची अवकृपा, सावकारी पाश, कर्ज परतफेडीसाठी बँकांकडून सुरू असणारा ससेमिरा यासारख्या अनेक कारणांमुळे शेतकरी स्वत:ची जीवनयात्रा संपवित आहेत. आत्महत्या करणाऱ्या शेतकऱ्याच्या पीडित कुटुंबाला राज्य सरकारकडून प्रत्येकी एक लाख रुपयांची मदत दिली जाते. जानेवारी ते ऑगस्ट या आठ महिन्यांत जिल्ह्यात शेतकरी आत्महत्येच्या ६४ घटना घडल्या. त्याबाबतचे अहवाल त्या त्या तालुक्यांमधील तहसीलदारांकडून जिल्हाधिकाऱ्यांना प्राप्त झाले. मदतीसाठीचे सरकारी निकष आणि प्राप्त अहवालांची पडताळणी करून जिल्हा प्रशासनाने ३७ प्रस्ताव पात्र, तर २६ प्रस्ताव अपात्र ठरविले आहेत. एका प्रकरणाची फेरचौकशी करण्याचे आदेश संबंधित तहसीलदारांना देण्यात आले आहेत.
शुक्रवारी (दि. २६) याबाबत जिल्हाधिकारी कार्यालयात निवासी उपजिल्हाधिकारी रामदास खेडकर यांच्या अध्यक्षतेखाली बैठक झाली. या बैठकीत जूनपासूनची १५ प्रलंबित प्रकरणे ठेवण्यात आली होती. त्यापैकी आठ प्रकरणे मंजूर, तर सहा प्रकरणे नामंजूर करण्यात आली.
मदतीस पात्र ठरलेले शेतकरी कुटुंब
ज्ञानेश्वर शिवराम शिंदे (वय ४२, वनसगाव, ता. निफाड), महेश नामदेव नंदन (वय २७, रा. ताहराबाद, सटाणा), यशवंत यादव पवार (वय ६०, रा. अजमीर सौंदाणे, बागलाण), दत्तू राघो बोरसे (वय ४२, रा. साकोरा, नांदगाव), अजयसिंग रामसिंग देवरे (नांदगाव बु, ता. मालेगाव), रामदास त्र्यंबक मोरे (वय ४२, रा. भेंडी, ता. कळवण), दशरथ त्र्यंबक भोये (वय ४२, रा. दलपतपूर, ता. त्र्यंबकेश्वर), गणेश फकीर बर्डे (वय ३४, रा. म्हेळुसके, दिंडोरी)
अपात्र ठरविण्यात आलेली कुटुंब
बाबाजी रामनाथ जाधव (वय ४०, रा. औरंगपूर, निफाड), शांताराम नथू वाजे (वय ६०, रा. श्रीरामपूर, ता. निफाड), रामा गंगाराम खाने (वय ७०, जातेगाव, ता. त्र्यंबकेश्वर), रामदास शिवाजी गाजरे (वय २३, गाजरवाडी, ता. निफाड), विकास ज्ञानदेव बोरस्ते (वय ३५, रा. साकोरे, निफाड), भरत अशोक शेवाळे (वय ३२, रा. बागलाण)
मोबाइल अॅप डाउनलोड करा आणि राहा अपडेट
