खासगी मेडिकल कॉलेजांमध्ये एमबीबीएस आणि बीडीएस या अभ्यासक्रमांसाठी प्रवेश घेऊ इच्छिणाऱ्या विद्यार्थ्यांना प्रवेशासाठी हाती अखेरचे दोनच दिवस शिल्लक राहिले आहेत. दोन दिवसांपूर्वी वैद्यकीय शिक्षण संचालनालयांतर्गत (डीएमईआर) खासगी व विनाअनुदानित मेडिकल आणि डेंटल कॉलेजेसच्या प्रवेशांना सुरुवात झाली होती. या प्रवेशांसाठी २४ ऑगस्ट ही अखेरची मुदत आहे. 'नीट'च्या निकालानुसार हे प्रवेश देण्यात येणार आहेत.
सुप्रीम कोर्टाच्या आदेशानुसार आणि केंद्र सरकारच्या अध्यादेशानुसार खासगी मेडिकल कॉलेजेसमध्ये नॅशनल इलिजिबिलिटी कम एंन्टरन्स टेस्ट (नीट) २०१६ च्या मेरिटनुसार प्रवेश होतील, असे संदर्भ होते. यानंतर १६ ऑगस्ट रोजी नीट परीक्षेचा निकाल जाहीर होताच पुढील प्रक्रियेस सुरुवात झाली असल्याची माहिती मविप्र मेडिकल कॉलेजचे वरिष्ठ प्राध्यापक डॉ. एस. डी. गोसावी यांनी दिली.
अभिमत विद्यापीठ या प्रक्रियेबाहेर
ही प्रवेशप्रक्रिया मात्र अभिमत विद्यापीठांसाठी नाही. राज्यभरात एमबीबीएस अभ्यासक्रमासाठी १९२० जागा उपलब्ध आहेत, तर बीडीएस अभ्यासक्रमासाठी २३०० जागा उपलब्ध आहेत. या प्रक्रियेत निवड झालेल्या विद्यार्थ्यांना शिक्षण शुल्क समितीने निर्धारित केलेली फी भरावी लागणार आहे. ऑनलाइन अर्जासाठी प्रतिविद्यार्थी हजार रुपये, तर ६० रुपये बँक चार्ज यानुसार फी भरावी लागणार आहे. हजार रुपये ही प्रोसेस फी या वर्गात मोडते, तर प्रवेश फी यापेक्षा वेगळी म्हणजे शिक्षण शुल्क समितीने निर्धारित केलेली असणार असल्याची माहिती सूत्रांनी दिली.
प्रवेशासाठी महत्त्वाच्या तारखा
- ऑनलाइन प्रवेश अर्जांसाठी अंतिम मुदत : २४ ऑगस्ट
- एसबीआय शाखेत फी पेमेंट भरण्याची मुदत : २५ ऑगस्ट
- प्रोव्हिजनल मेरिट लिस्ट : २७ ऑगस्ट
- कागदपत्र पडताळणी आणि प्रेफरन्स अर्ज भरणे : ३० ऑगस्ट ते २ सप्टेंबर
- पहिली मेरिट लिस्ट प्रसिद्धी ('नीट'नुसार) : ३ सप्टेंबर
उत्तर महाराष्ट्रात १०७० जागा
उत्तर महाराष्ट्रात नाशिकसह धुळे, जळगाव आणि नगर जिल्ह्यात सुमारे १०७० जागा उपलब्ध आहेत. पैकी नाशिक जिल्ह्यात बीडीएस आणि एमबीबीएस या अभ्यासक्रमांसाठी सुमारे ३५० जागा खासगी विनाअनुदानित कॉलेजसाठी उपलब्ध आहेत. 'नीट'नुसार होणाऱ्या या प्रवेशांसाठी अवघ्या दोन दिवसांत म्हणजे २४ ऑगस्टपर्यंत यादीतील विद्यार्थ्यांना प्रवेश निश्चित करावा लागणार आहे.
नाशिक विभागातील खासगी एमबीबीएस व बीडीएस कॉलेज
डॉ. वसंतराव पवार मेडिकल कॉलेज, नाशिक..............१२० (एमबीबीएस)
एसीपीएम मेडिकल कॉलेज, साक्री, धुळे.................१०० (एमबीबीएस)
पद्मश्री व्ही. व्ही. पाटील मेडिकल कॉलेज, नगर.............१५० (एमबीबीएस)
डॉ. उल्हास पाटील मेडिकल कॉलेज, जळगाव............. १५० (एमबीबीएस)
एसएमबीटी मेडिकल कॉलेज, घोटी (ता. इगतपुरी)..... १५० (एमबीबीएस)
केबीएच डेंटल कॉलेज, पंचवटी....................................१०० (डेंटल)
थोरात डेंटल कॉलेज, संगमनेर.....................................१०० (डेंटल)
जेएमएफ एसीपीएम डेंटल कॉलेज, धुळे......................... १०० (डेंटल)
वायसीएम डेंटल कॉलेज, नगर .......................................१०० (डेंटल)
मोबाइल अॅप डाउनलोड करा आणि राहा अपडेट