म. टा. प्रतिनिधी, नाशिक
राज्यात २०१७ मध्ये होणाऱ्या २६ जिल्हा परिषद, २९७ पंचायत समित्यांच्या सार्वत्रिक निवडणुकांसाठी प्रभाग रचना, तसेच आरक्षण सोडतीचा कार्यक्रम राज्य निवडणूक आयोगाने जाहीर केला आहे. २५ नोव्हेंबरपर्यंत हा कार्यक्रम राबविण्यात येणार असून, हरकती व सूचनांचा विचार करून अंतिम प्रभाग रचना तयार केली जाणार आहे. त्यासाठी विभागीय आयुक्त कार्यालय तसेच जिल्हाधिकारी कार्यालयात नोडल ऑफिसरची नियुक्ती करण्यात आली आहे.
नाशिक जिल्ह्यातील एक जिल्हा परिषद, १५ पंचायत समित्या, १४६ गण व ७३ गटांसाठी सार्वत्रिक निवडणूक घेण्यात येणार आहे. त्यासाठीच्या प्रभाग रचना व आरक्षण सोडतीसाठीचा प्रारुप प्रस्ताव जिल्हाधिकारी ९ सप्टेंबर २०१६ पर्यन्त विभागीय आयुक्तांकडे सादर करतील. या प्रस्तावाला शुक्रवार २३ सप्टेंबरपर्यंत महसूल आयुक्त मान्यता देतील. २८ सप्टेंबरला आरक्षण सोडतीची सूचना वृत्तपत्रातून प्रसिध्द केली जाईल. त्यानंतर आरक्षणाची सोडत निघेल. ५ ऑक्टोबरला जिल्हा परिषद निवडणूक विभागासाठी व पंचायत निर्वाचक गणासाठी ही आरक्षण सोडत काढली जाणार आहे. १० ऑक्टोबर रोजी सोमवारी प्रारूप प्रभाग रचनेची अधिसूचना प्रसिध्द करण्यात येईल. हरकती व सूचना १० ते २० ऑक्टोबर या कालावधीत होणार आहे.
१७ नोव्हेंबरला निवडणूक विभाग व निर्वाचक गण रचना अतिंम केली जाणार आहे. शुक्रवारी २५ ऑक्टोबरला अंतिम प्रभाग रचना प्रसिध्द करण्यात येणार आहे.
मोबाइल अॅप डाउनलोड करा आणि राहा अपडेट
