म. टा. खास प्रतिनिधी, नाशिक
दी जीनिअस व स्मिमाताई हिरे कॉलेज ऑफ अप्लाईड आर्ट्स, परफॉर्मिंग आर्ट्स अॅण्ड फॅशन डिझाईन यांच्यातर्फे 'अंतर्वक्र भिंगातून पाहताना : नाट्यदर्शन' या लघुनाट्य महोत्सवाचे शनिवार, २० ऑगस्ट रोजी आयोजन करण्यात आले आहे. या नाट्य महोत्सवाची सुरुवात दिवाकरांच्या निवडक नाट्यछटांनी होणार आहे. परशुराम सायखेडकर नाट्यगृहात, सायंकाळी ६ वाजता हा महोत्सव होणार आहे.
नाट्य छटांच्या प्रांतातील निर्विवाद असे चक्रवर्ती सम्राट दिवाकर हे नाट्यछटेद्वारे मार्मिक विनोद, जगण्यातील विसंगती व तत्कालीन सामाजिक अन्यायाची जाणीव करून देतात. काव्यमय व चिंतनात्मक लिखाणातून लिहिलेल्या या नाट्यछटा आजही समाज जीवनाचं प्रतिबिंब आपल्यासमोर लख्खपणे दाखवून आपलेच दर्शन घडवितात. या नाट्यछटा सुयश लोथे, राजवर्धन दुसाने, चैतन्य देवरे, भूषण आहिरे, श्रद्धा उबाळे, ओवी भालेराव, पल्लवी ओढेकर, रिया हिंगणे, एकता आढाव आणि मनोज गुळवे हे कलाकार सादर करणार आहेत. या नाट्यछटांचे दिग्दर्शन पूर्वा सावजी व सुहास जाधव यांनी केले आहे.
त्यानंतर 'बी. आर. ई गणेश' तसेच 'डिजिटल इंडिया : हेंडल विथ केअर' हे प्रहसन सदर होणार आहेत. अभिषेक रहाळकर, ओवी भालेराव, रिया हिंगणे, एकता आढाव यांनी यात अभिनय केलेला असून त्याचे दिग्दर्शन प्रतिक शर्मा आणि स्वराली हरदास यांनी केले आहे. तंत्रज्ञान कितीही प्रगत झाले तरीही माणसांच्या मूलभूत गरजा पूर्ण होत नाही तोपर्यंत खऱ्या अर्थाने समाजाची प्रगती होत नाही, असे या प्रहसनातून नर्म विनोदी शैलीतून प्रामुख्याने मांडण्यात आले आहे.
यांचे लाभले सहकार्य
देवेन कापडणीस यांनी या लघुनाटकांचे लेखन केलेले असून चेतन वडनेरे, विश्वदीप यादव, अभिषेक रहाळकर, प्रतिक नाईक, प्रशांत सोनवणे, रिया हिंगणे, एकता आढाव यांनी या 'शॉर्ट प्ले'चे दिग्दर्शन केले आहे. आपण अजुनही आपली सरंजामी वृत्ती कशी जोपासली आहे यावर केलेले भाष्य, चौका-चौकातून तयार होणारे राजकारणी, भाई व त्यांनी पसरविलेली दहशत, जुनी माणसे जातात आणि नव्या मुखावट्यांची माणसे येतात अशा आशयांच्या शॉर्ट प्ले बरोबरच सार्वजनिक जीवनात दाखविली जाणारी शिस्त व शुद्धता आतून दांभिकतेने घेरलेली असते. असे कथानक त्यातून येते.
या कार्यक्रमात प्रकाशयोजना रवी रहाणे, आदित्य रहाणे यांची असून संगीत तेजस बिल्दीकर, नेपथ्य गुलाब पवार, रंगभूषा माणिक कानडे, वेशभूषा पल्लवी ओढेकर, दीपक गरुड, प्रीतम खैरनार, चंद्रकांत जाडकर, प्रसाद गर्भे यांची सर्जनशील मदत आहे. लघुनाट्य महोत्सवास प्रवीण काळोखे व रश्मी काळोखे यांचे मार्गदर्शन लाभले आहे.
प्रवेशिका कार्यक्रम स्थळी
कार्यक्रमासाठी प्राचार्या संपदा हिरे, चित्रपट दिग्दर्शक तानाजी घाडगे, मकरंद माने यांची विशेष उपस्थिती लाभणार आहे. यासाठी लक्ष्मण सावजी, रव‌ींद्र विद्या प्रसारक मंडळाचे अध्यक्ष मनोज पिंगळे, प्राचार्य रामदास गायधनी यांचे विशेष सहकार्य लाभले आहे. प्रवेशिका कार्यक्रमस्थळी एक तास आधी उपलब्ध असतील. जास्तीत जास्त नाट्यप्रेमींनी या महोत्सवाचा लाभ घ्यावा असे आवाहन आयोजकांमार्फत करण्यात आले आहे.
मोबाइल अॅप डाउनलोड करा आणि राहा अपडेट
