राज्यातील शाळांची २०१५-१६ ची संचमान्यता करण्यात आली असून, या संचमान्यतेत जे शिक्षक अतिरिक्त ठरले आहेत, त्यांच्या समायोजनाची प्रक्रिया सुरू झाली आहे. यासंबंधित परिपत्रक जारी करण्यात आले असून, याचा लाभ अनेक शिक्षकांना होणार आहे. नाशिकमध्ये रिक्त जागांच्या तुलनेत अतिरिक्त शिक्षकांचे प्रमाण कमी असल्याने शंभर टक्के म्हणजे सर्वच शिक्षकांचे समायोजन होणार असल्याने शिक्षकांमध्ये आनंदाचे वातावरण आहे. समायोजनाच्या शिक्षकांविषयी edustaff.maharashtra.gov.in या वेबसाइटवर अतिरिक्त कर्मचाऱ्यांची यादी, त्यांची नावे व रिक्त पदांच्या माहितीसह जाहीर करण्यात आली आहे.
अतिरिक्त ठरलेल्या कर्मचाऱ्यांचा प्रवर्ग व अध्यापनाचा विषय याचा विचार करून त्याच प्रवर्गात व त्याच विषयांच्या रिक्त जागांवर समायोजनाची प्रक्रिया राबविण्यात आली. या कर्मचाऱ्यांच्या समायोजनासाठी प्रवर्गनिहाय जागा शिल्लक नसल्यास संबंधित शिक्षकाच्या अध्यापनाच्या विषयानुसार खुल्या प्रवर्गातील रिक्त जागांवर समायोजन करण्यात येणार असल्याचे जाहीर करण्यात आले, तसेच उपलब्ध असलेल्या रिक्त पदांवर समायोजन करण्यात येणार असल्याची माहिती राज्य शिक्षण विभागाने जारी केलेल्या परिपत्रकात देण्यात आली आहे. समायोजनामुळे ज्या ठिकाणी शिक्षकांच्या रिक्त जागा असतील तेथे समायोजित शिक्षकांमुळे विद्यार्थ्यांचे शैक्षणिक नुकसान होणार नाही, याची काळजी राज्यभर घेण्यात येत आहे. नाशिकमध्ये मात्र रिक्त जागांपेक्षा अतिरिक्त शिक्षकांची संख्या कमी असल्याने सर्वच शिक्षकांचे समायोजन होणार आहे. त्यामुळे नाशिक असा एकमेव जिल्हा ठरला आहे जिथे शंभर टक्के समायोजन पूर्णत्त्वास पोहोचले आहे, असे मत शिक्षकांनी व्यक्त केले आहे.
संबंधित संस्थेत भविष्यात अन्य रिक्त होणाऱ्या पदामुळे बिंदुनामावलीनुसार तात्पुरते समायोजन केलेल्या शिक्षक कर्मचाऱ्याच्या समायोजनामुळे आरक्षणास बाधा येत नसल्यास समायोजन केलेल्या शिक्षकांना कायमस्वरूपी सामावून घेण्यात येणार असल्याची स्पष्ट करण्यात आले आहे. समायोजनाच्या शिक्षकांविषयी edustaff.maharashtra.gov.in या वेबसाइटवर अतिरिक्त कर्मचाऱ्यांची यादी त्यांच्या नावे व रिक्त पदांच्या माहितीसह जाहीर करण्यात आली आहे.
मोबाइल अॅप डाउनलोड करा आणि राहा अपडेट
