राज्यातील परवानाधारक कुटुंबाना महिन्याकाठी ३५ हजार रुपये मानधन देण्यात यावे, रॉकेल परवानाधारकांवर उपासमारीची वेळ आली असून त्यांचा उदरनिर्वाहाचा प्रश्न सोडवावा, यासह विविध मागण्यांकडे लक्ष वेधण्यासाठी राज्यातील रेशन व केरोस‌िन परवानाधारक १ ऑगस्टपासून बेमुदत संपावर जाणार आहेत. नाशिक जिल्हा रास्त भाव दुकानदार व किरकोळ केरोस‌िन परवानाधारक संघटनेची शनिवारी कालिका माता मंदिर परिसरातील सभागृहात बैठक झाली. या बैठकीला जिल्हा परिषदेच्या अध्यक्षा विजयश्री चुंबळे, आमदार सीमा हिरे, राष्ट्रवादीचे जिल्हाध्यक्ष रवींद्र पगार, संघटनेचे विभागीय अध्यक्ष गणपत डोळसे-पाटील, विजय गुप्ता (पुणे), आप्पासाहेब तोडकरी (सातारा), बाबुराम ममाणे (सोलापूर), संघटनेचे जिल्हाध्यक्ष निवृत्ती कापसे आदी उपस्थित होते. सरकार दरबारी परवानाधारकांच्या अनेक मागण्या प्रलंबित आहेत. मागण्या मान्य होत नाही तोपर्यंत माल न उचलण्याचा ठराव या बैठकीत मंजूर करण्यात आला. यावेळी संप यशस्वी करण्यासाठी संघटनेची एक समिती गठीत करण्याचा निर्णय घेण्यात आला.
मोबाइल अॅप डाउनलोड करा आणि राहा अपडेट
