म. टा. वृत्तसेवा, सटाणा
बागलाण तालुक्यातील प्राथमिक आरोग्य केंद्र व उपकेंद्रातील रिेक्त जागांमुळे आरोग्य यंत्रणाच मृत्यूशय्येवर निपचित पडली आहे. या परिस्थितीत परिसरातील आदिवासींसह ग्रामस्थांना ऐन पावसाळ्यात उपचारासाठी संघर्ष करावा लागण्याची वेळ येऊन ठेपली आहे. तर सटाणा शहरातील ट्रामा केअर युनिटदेखील गेल्या चार वर्षांपासून सुसज्ज असूनही रिेक्त पदांअभावी बंद असल्याने कोट्यवधी रुपयांची मशिनरी धूळखात पडून आहे. याकडे प्रशासनाने कोणतेही लक्ष न दिल्याने नागरिकांना आरोग्यसेवेची समस्या भेडसावत आहे.
जवळपास १७९ खेड्यांचा समावेश असलेला बागलाण तालुका हा तुलनेने जिल्ह्यात मोठा आदिवासीबहूल तालुका आहे. या तालुक्यातील निम्म्याहून अधिक लोकसंख्या आदिवासी समाजाची आहे. सरकारच्या सोयी सुविधा मिळूनदेखील या तालुक्यातील आरोग्याचे प्रश्न सध्या ऐरणीवर आलेले आहेत. बागलाण तालुक्यात ११ प्राथमिक आरोग्य केंद्र तर सुमारे ५१ प्राथमिक आरोग्य उपकेंद्र आहेत. या केंद्र व उपकेंद्राचा कारभार बघण्यासाठी जिल्हा परिषदेच्या अंतर्गत तालुका आरोग्य अधिकाऱ्यांची दोन पदे आहेत. त्यापैकी डॉ. एन. के. सोनवणे हे कार्यरत असून एक पद रिेक्त आहे.
वैद्यकिय अधिकारी पदाची सुमारे सात पदे रिेक्त असल्याने मोठ्या प्रमाणात गैरसोय होत आहे. प्राथमिक आरोग्य केंद्र अलियाबाद व कपालेश्वर येथील प्रत्येकी २ पदे रिेक्त आहेत. तर ब्राम्हणगाव, मुल्हेर येथील प्रत्येकी एक तर तालुका आरोग्य अधिकारी अशी सात पदे रिेक्त आहेत. लोकप्रतिनिधींसह विविध सामाजिक पक्षांनी याबाबत आंदोलने छेडूनदेखील सरकारकडून दखल घेतली जात नसल्याने नागरिकांत नाराजी व्यक्त होत आहे.
रिक्त पदांची भरती केव्हा?
तालुक्यातील ५१ आरोग्य उपकेंद्रामधील ८ आरोग्यसेविकांची पदे रिेक्त आहेत. तसेच तीन उपकेंद्रात आरोग्यसेवकांची ३ पदे रिेक्त आहेत. आरोग्य सहाय्यकांची ६ पदे रिेक्त प्राथमिक आरोग्य केंद्रामध्ये औषधे वाटण्यासाठी औषध निर्माण अधिकारी पदाचीही ३ पदे रिेक्त आहेत. प्रयोगशाळा तंत्रज्ञ पदाची निरपूर व वीरगाव येथे दोन पदे रिेक्त आहेत. एकूणच ११ आरोग्य केंद्र व ५१ उपकेंद्रामधून सुमारे ४१ पदे रिेक्त असल्याने तालुक्यातील आरोग्य यंत्रणा बंदच पडलेली आहे. यामुळे सर्वसामान्य जनतेला आरोग्याच्या विभागाकडून मिळणाऱ्या सुविधा मिळण्यास कठीण झाले आहे.
मोबाइल अॅप डाउनलोड करा आणि राहा अपडेट