दुसऱ्या आंतरराष्ट्रीय योगदिनाचा उत्साह नाशिक शहरासह जिल्हाभरात दिसून आला. केवळ शालेय संस्था, कॉलेजेसच नव्हे, तर सामाजिक संस्थांनीही योगाचे ज्ञान आत्मसात करण्यासाठी पुढाकार घेतला. शास्त्रशुद्ध माहिती असलेल्या प्रशिक्षकांच्या मदतीने योगासने करण्यात आली आणि संजीवन आरोग्याचा मंत्र स्वीकारण्यात आला.
नाशिक महापालिका नाशिक महापालिकेच्या वतीने योग दिनानिमित्त अनुसया रामचंद्रन, हार्ट फुलनेस इन्स्टिट्यूट यांनी अधिकारी व कर्मचारी यांना योगाबद्दल माहिती व प्रशिक्षण दिले. या सामूहिक योगासन प्रात्यक्षिकात नाशिक महापालिकेचे अधिकारी व कर्मचारी यांनी उत्स्फूर्त सहभाग घेतला.
आनंद हास्य योग क्लब नाशिकरोड येथील आनंद हास्य योग क्लबतर्फे विविध आसने करून योगदिन साजरा करण्यात आला. नियमितपणे प्राणायामपूरक व्यायाम व हास्य योग अभ्यास करणाऱ्या आनंद हास्य योग क्लबच्या सदस्यांचा आनंद व उत्साह अनोखा होता. या कार्यक्रमाला मार्गदर्शन करण्यासाठी प्रसिद्ध योगशिक्षक आत्माराम देवाणी उपस्थित होते. कार्यक्रमाची सुरुवात योग प्रार्थनेने झाली. त्यानंतर आत्माराम दीवानी यांनी विविध प्राणायामाचे प्रकार व योगासने याविषयी उपस्थिताना मार्गदर्शन केले. उपस्थित सर्व साधकांनी प्रत्यक्ष भाग घेऊन विविध प्राणायाम व योगासने केली. यावेळी क्लबचे अध्यक्ष अॅड. वसंतराव पेखळे म्हणाले, की योगाचं महत्त्व अनन्यसाधारण आहे. आपण जे हास्य प्रकार करतो त्यातही योगा समाविष्ट आहे. म्हणूनच त्याला हास्स्य योग असे म्हणतात. उपस्थित हास्यप्रेमींनी विचारलेल्या प्रश्नांना देवानी यांनी समर्पक उत्तरे देत शंकांचे निरसन केले. कार्यक्रमास डी. जी. पाटील, केशव वाणी, सुरेश सोनवणे, रमेश नवले, वसंत खालकर आदी उपस्थित होते.
जुने नाशिकमध्ये उत्स्फूर्त प्रतिसाद जुने नाशिक : मुख्यध्यापिका सय्यद शिरीन यांच्या मार्गदर्शनाखाली रहेबर तालीम कमिटी संचलित रहेनुमा उर्दू शाळेत, तसेच नॅशनल उर्दू हायस्कूल येथे योगासने करण्यात आली. यावेळी शिक्षकांनी योगाचे महत्त्व विशद केले. रंगूबाई जुन्नरे, रवींद्र विद्यालय, न्यू जनता विद्यालय, गांधीनगर, बुरहानिया स्कूल, दारणा हायस्कूल, वडाळागाव महापालिका हायस्कूलसह विभागीय संदर्भ सेवा रुग्णालय येथे डॉक्टर्स, रुग्ण व स्टाफ कर्मचारींनी सहभाग नोंदविला. जुने नाशिक परिसरातील अन्य विविध शाळांमध्येही योगासने करण्यात आली.
माहेरघर मंगल कार्यालय माहेरघर मंगल कार्यालयात लाड वाणी समाजाच्या वतीने योग शिबिर झाले. यावेळी संगू गुरुजी व त्यांचे साथीदारांनी योगाचे धडे देऊन योगाविषयी उपस्थितांना माहिती दिली. नीलेश कोतकर, अमोल शेंडे, लाडवाणी समाजाचे अध्यक्ष सचिन बागड, विवेक जायखेडकर यांच्या विशेष प्रयत्नातून या कार्यक्रमाचे आयोजन करण्यात आले.
उत्सव मंगल कार्यालय श्री गजानन महाराज देवस्थान व नाशिकच्या योगविद्याधाम यांच्यातर्फे प्रभाग क्रमांक ५६ मधील उत्सव मंगल कार्यालयात सामूहिक योग साधना शिबिर झाले. याप्रसंगी भाजप शहराध्यक्ष आमदार बाळासाहेब सानप, डॉ. विश्वास मंडलिक, नाशिकरोड मंडलाध्यक्ष बाजीराव भागवत, नगरसेवक संभाजी मोरुस्कर, संगिता गायकवाड, नरेश कारडा, अशोक कुलकर्णी, गजानन तितरे आदी उपस्थित होते. नगरसेवक संभाजी मोरुस्कर यांनी प्रास्ताविक केले. यावेळी नीलेश वाघ, दत्ता कुलकर्णी, नीलिमा जोशी, ज्योती वराडे, हर्षद पटेल, प्रिती सोनी, अनुजा आवटी, अतुल तरटे, निखिलेश भाकरे, कल्पना गिते यांनी योग प्रशिक्षण दिले.
जगताप मळा अभ्यासिका लोकसंकल्प हेल्थ फाऊंडेशनच्या वतीने केमिस्टांसाठी जगताप मळ्यातील अभ्यासिका सभागृह येथे योगसाधना घेण्यात आली. माणिक हांडगे, संजय बागुल, महेंद्र शहा या योग शिक्षकांच्या मार्गदर्शनाखाली झालेल्या या शिबीरात सुमारे ४५ केमिस्ट बंधू-भगिनींनी सहभाग घेतला.
मातोश्री वृद्धाश्रम एकलहरे येथील मातोश्री वृद्धाश्रमातील ज्येष्ठ नागरिकांसाठी लोकसंकल्प हेल्थ फाउंडेशनच्या वतीने योगशिक्षक बाळासाहेब मोकळ, संजय बागुल, अमोल जाधव, योगिता पाटील, गोवर्धने या योगशिक्षकांच्या मार्गदर्शनाखाली योग संजिवनी वर्गाचे आयोजन करण्यात आले. यात सुमारे ८० ज्येष्ठांनी सहभाग घेतला.
ऋतुरंग भवन नाशिकरोड येथील ऋतुरंग भवनात योगशिक्षिका सुनीता सानप यांच्या मार्गदर्शनाखाली योगाभ्यास घेण्यात आला. या कार्यक्रमात ऋतुरंग परिवारातील सर्व सदस्य सहभागी झाले.
हजार विद्यार्थ्यांचा योगाभ्यास इगतपुरी : इगतपुरीसह टाकेद-घोटी येथील पंचवटी स्कूलमध्ये योगदिन उत्साहात झाला. यात सुमारे एक हजार विद्यार्थ्यांनी योगाभ्यास केला. या कार्यक्रमाला प्रमुख पाहुणे योगगुरू मीना अग्रवाल, विशाल मेहता, कीर्तीभाई शहा, प्राचार्य अशिषकुमार खुळे, पर्यवेक्षिका तोषा तिवारी आदी मान्यवर होते.
जिल्हा परिषद शाळेत योग प्रशिक्षण कळवण : भेंडी (ता. कळवण) येथील जिल्हा परिषदेच्या शाळेत योगदिन साजरा करण्यात आला. योगशिक्षक भास्कर भामरे यांनी विद्यार्थ्यांसह उपस्थितांकडून प्रात्यक्षिके व योगा करून घेतली. यात प्रार्थना, योगासन पूरक हालचाली, आदींचा समावेश होता. उपस्थितांना योगासनाविषयी संकल्प व शपथ देण्यात आली. याप्रसंगी शिक्षण विस्तार अधिकारी एस. के. वाघ, मुख्याध्यापक अशोक भामरे, विजय पगारे, राजेंद्र जगताप, भगवान आहेर आदी उपस्थित होते.
पोलिसांचा योगाभ्यास सातपूर : नाशिक पोलिस आयुक्तालयाच्या वतीने शहराच्या सर्वच पोलिस ठाण्यांतील कर्मचारी व अधिकाऱ्यांनी योग दिनात सहभाग घेतला. महाराष्ट्र पोलिस अॅकॅडमी, नाशिक शहर पोलिस आयुक्तालय व ग्रामीण पोलिसांनीही योग दिनात भाग घेतला.
नाशिकरोड पोलिस ठाणे नाशिकरोड पोलिस ठाण्याच्या सभागृहात लोकसंकल्प हेल्थ फाऊंडेशनतर्फे योग दिनानिमित्त योगासनांच्या प्रात्यक्षिकांत सर्व पोलिस अधिकारी व कर्मचाऱ्यांंनी सहभाग घेतला. संगीता पाटील, महेंद्र शहा, वर्षा साळवे, सोनाली सोनवणे यांनी यावेळी मार्गदर्शन केले.
घोटीत पोलिसांसह ग्रामस्थांची योगसाधना घोटी पोलिस व ग्रामस्थ यांनी संयुक्तपणे योगशिबिर घेऊन योगसाधना केली. जैन भवन येथे झालेल्या शिबिरात योगगुरू रुपचंद राठोड व योगगुरू संतोष माने यांनी योगाचे प्रशिक्षण दिले. यावेळी घोटी पोलिस निरीक्षक प्रभाकर पाटील, उपनिरीक्षक कमलेश बच्छाव यांच्यासह ग्रामस्थ व पोलिस कर्मचाऱ्यांसह सर्व पोलीस पाटील आणि पोलिस मित्र उपस्थित होते. सध्याच्या आधुनिक जीवनशैलीमुळे अनेक आजार निर्माण होऊन शारीरिक व मानसिक स्वास्थ बिघडत आहे. नियमित योगसाधनेमुळे आजार दूर होतात. कार्यक्षमता वाढते, नवचैतन्य निर्माण होते. शारीरिक ऊर्जा वाढते व मानसिक संतुलन स्थिर राहते. यासाठी जीवणात योगसाधनेला प्राधान्य दिले पाहिजे, असे आवाहन योगप्रशिक्षक राठोड व पोलिस निरीक्षक प्रभाकर पाटील यांनी केले. 'आरोग्यसंपन्नतेची योग ही गुरुकिल्ली' प्रत्येक व्यक्तीला सर्वच योगासने लागू पडतीलच असे नाही. प्रत्येकाच्या प्रकृतीनुसार, दोषानुसार कोणते आसन करावे हे सांगितले जाते. आरोग्यसंपन्न होण्याची योग हीच गुरुकिल्ली असून, 'जो जे वांछिल तो ते लाहो' हेच योगाचे वैशिष्ट्य आहे, असे प्रतिपादन योग विद्या गुरूकुलचे कुलगुरू विश्वास मंडलिक यांनी केले. योग विद्या गुरूकुल, योग विद्या धाम आणि नेहरु युवा केंद्र यांच्यातर्फे आयोजित योग शिबीरात ते बोलत होते. यावेळी आमदार सीमा हिरे, जिल्हाधिकारी राधाकृष्णन बी, मुख्य कार्यकारी अधिकारी मिलींद शंभरकर, राष्ट्रीय स्वयंसेवक संघाचे संघटनमंत्री राजेंद्र फडके, योगविद्या धामचे उपाध्यक्ष डॉ. रमेश मंत्री, भाजपचे प्रदेश चिटणीस लक्ष्मण सावजी, योग विद्यालयाचे अध्यक्ष मनोहर कानडे, नेहरू युवा केंद्राचे समन्वयक भगवान गवई नाना फड, ज्ञानेश्वर मटाले आदी उपस्थित होते. डीजीपी नगर परिसरातील माऊली लॉन्समध्ये सकाळी सात वाजता कार्यक्रम झाला. परिसरातील शेकडो नागरिकांना या शिबिराचा आणि प्रदर्शनाचा लाभ घेतला.
महापालिका शाळांमध्ये उत्साह महापालिकेच्या सातपूर विभागातील शिवाजीनगर शाळेत योगदिन उत्साहात साजरा करण्यात आला. नगरसेवक दिनकर पाटील यांनी विद्यार्थ्यांसह शाळेच्या प्रांगणात योगाची प्रात्यक्षिके केली. महापालिकेच्या सातपूर कॉलनीतील जिजामाता शाळेत योग दिन उत्साहात साजरा करण्यात आला. योगाच्या शिक्षकांनी विद्यार्थ्यांना योगाचे धडे दिले. विद्यार्थ्यांसह शिक्षकांनी सहभाग घेतला.
नाईक कॉलेजात शिबिर दिंडोरी : क्रांतिवीर वसंतराव नारायणराव नाईक शिक्षण संस्थेच्या कला व वाणिज्य कॉलेजात योग शिबिर उत्साहात पार पडले. प्राचार्य डॉ. महादेव कांबळे यांच्या हस्ते शिबिराचे उदघाटन झाले. याप्रसंगी प्रा. संजय काळे, प्रा. डॉ. धीरज झाल्टे, प्रा. राजेंद्र डोईफोडे, कार्यालय अधीक्षक राजेंद्र तिवडे, सोमनाथ धात्रक यांच्यासह प्राध्यापक, शिक्षकेतर कर्मचारी उपस्थित होते. क्रीडा संचालक प्रा. अरविंद केदारे, प्रा. अनिल आहिरे यांनी विविध आसनांचे प्रात्यक्षिके सादर करून योगा विषयी मार्गदर्शन केले. प्रा. डॉ. धिरज झाल्टे यांनी सूत्रसंचालन केले. शिबिरात कॉलेजातील सर्व प्राध्यापक, शिक्षकेतर कर्मचारी वर्गाने उत्साहाने सहभाग घेतला. शिबीर यशस्वीतेसाठी प्रा. वैशाली गांगुर्डे, कनिष्ठ विभागाचे प्रमुख प्रा. शिवाजी साबळे, प्रा. भास्कर आव्हाड, प्रा. तुषार उफाडे, सुनील चव्हाण, कैलास गांगुर्डे, योगेश बोडके आदींनी परिश्रम घेतले.
मनमाड, नांदगावसह चांदवडमध्ये योगासने मनमाड, नांदगाव शहर परिसर, तसेच चांदवड तालुक्यात विविध ठिकाणी योगासने व प्राणायामाचे कार्यक्रम उत्साहात घेण्यात आले. योगाविषयी जागरूकता वाढविण्याच्या उद्देशाने शैक्षणिक संस्था व सामाजिक संघटनांतर्फे हे कार्यक्रम झाले.
मनमाड येथे छत्रे न्यू हायस्कूल व उपविभागीय पोलिस अधिकारी कार्यालय यांच्यातर्फे पोलिस परेड ग्राउंडवर योग दिन साजरा करण्यात आला. यावेळी पोलिस कर्मचारी व शिक्षक पालक विद्यार्थी यांना राष्ट्रीय पुरस्कार प्राप्त योगशिक्षक सुनील ढमाले यांनी योगाविषयक मार्गदर्शन केले. या कार्यक्रमास पोलिस उपअधीक्षक डॉ. राहुल खाडे, पोलिस निरीक्षक पुंडलिक सपकाळे, श्रीराम शैक्षणिक संस्थेचे सचिव दिनेश धारवाडकर, संचालक पी. व्ही. पंचवाघ, मुख्याध्यापिका के. एस. लांबोळे, उपमुख्याध्यापक आर. एन. थोरात, पर्यवेक्षक प्रवीण व्यवहारे आदी उपस्थित होते. हरिश चंद्रात्रे व सहकारी शिक्षकांनी कार्यक्रमाचे संयोजन केले.
नांदगाव शहर व परिसरातील शाळा कॉलेजेसमध्ये योग दिन उत्साहात साजरा करण्यात आला. नांदगाव कला वाणिज्य विज्ञान कॉलेजच्या मैदानावर प्राचार्य डॉ. पी. आर. भाबड यांनी मार्गदर्शन केले. तसेच प्रा. दिनेश उकिरडे, प्रा. बी. पी. शिंदे यांनी प्रात्यक्षिके सादर केली. चांदवड शहरात शैक्षणिक संकुल सामाजिक संस्था संघटना यांच्या वतीने योगाविषयी प्रबोधनात्मक कार्यक्रमाचे आयोजन करण्यात आले.
मोबाइल अॅप डाउनलोड करा आणि राहा अपडेट
