गौतम संचेती महाराष्ट्र पर्यटन महामंडळाने नाशिकपासून ७० किलोमिटर अंतरावर असलेल्या भंडारा येथे काजवा महोत्सव घेतला. २१ मे ते ३० जूनपर्यंत या महोत्सवाचा कालावधी जाहीर करण्यात आला. पण पावसाची चाहुल लागल्यामुळे २५ जूनपर्यंत हा महोत्सव सुरु राहणार आहे. पर्यटनाच्या दृष्टीने मे व जून महिना हा कोरडा असतो. ही संधी साधत या महोत्सवाचे आयोजन महामंडळाने पब्लिक पार्टनरशिप अंतर्गत केले. नाशिकहून येथे जाण्यासाठी खास वाहने उपलब्ध करण्यात आली व राज्यभर या महोत्सवाचा प्रचार विविध माध्यमांतून केला गेला. खरं तर हा कोणताही मोठा महोत्सव नसतानाही मुंबई, पुणे, नाशिक, औरंगाबाद, जळगाव, धुळे, बीड, सोलापूर, कोल्हापूर या जिल्ह्यांतील पर्यटकांनी या महोत्सवाला भेट देत आनंद लुटला. रोज ५०० हून अधिक गाड्या या ठिकाणी येत असल्यामुळे येथील आदिवासी बांधवांना रोजगारही मिळाला. याच महोत्सवात आलेल्या पर्यटकांपर्यंत महामंडळाच्या प्रादेशिक व्यवस्थापक प्रज्ञा बढे -मिसाळ यांनी महाराष्ट्राच्या पर्यटन विकास महामंडळाची माहिती देत ब्रँडिंग केले. गेल्या तीन वर्षांपासून सुरू असलेला हा महोत्सव तसा नाशिककरांना नवा नाही. पण या महोत्सवात जाऊन फक्त काजवेच बघायचे व त्यासाठी एक हजार रुपये मोजायचे हा प्रश्न मात्र महामंडळाला अनेकांनी विचारला. पण अशा स्थितीत या महोत्सवाचे महत्व सांगत अनेक पर्यटकांना काजवा महोत्सवाची सहल महामंडळाने घडवली. दिवाळीपूर्वीच दिव्यांचा आनंद देत प्रकाशमय वातारवरणात आलेल्या पर्यटकांना हा प्रकाशसोहळा हरखून गेला. चहा, नाष्टा, आदिवासी जेवण याबरोबरच भंडारदऱ्याचे साईट सीन व २५ कि. मी. अंतरावर असलेले अमृतेश्वरचे मंदिर हे सर्व पर्यटकांना वेगळेपण दाखवत होते. जेवणामध्ये असलेली बाजरी व तांदळाची भाकरी, गुळाची खीर, भरीत, प‌िठलं, ठेचा व आदिवासी बांधव विकत असलेले आंबा, जांभूळ, करवंदे यामुळे येथे खवैय्यांचीसुध्दा मौज झाली. खरं तर शहरात किंवा इतरत्र काजवे दिसतात. पण त्यांच्या झुंडीच्या झुंडी बघणं ही गोष्ट खूपच आनंददायी असते. अल्प आयुष्य असलेले हे काजवे पावसाची चाहूल लागताच दिसतात व पाऊस पडला की गायब होतात. अशा या काजव्यांचा उजळून निघणारा हा महोत्सव भंडारदऱ्याच्या कुशीत पार पडला. अनेकांनी भेटी दिल्या तर काहींचे राहून गेले. पर्यटन महामंडळाने आपल्या उपक्रमाला उजळण्याचे काम केले असले, तरी त्यातून त्यांची कल्पकता निश्चितच स्वागतार्ह आहे. नाशिक जिल्हा हा पर्यटकांना आकर्षित करणारा जिल्हा आहे. पण येथे मोठमोठे अधिकारी, राजकीय पक्ष व श्रीमंत व्यक्ती येतात ते त्र्यंबकेश्वर व शिर्डीच्या दर्शनासाठी. त्यांचा मुक्काम नाशिकला असला तरी त्यांचे पर्यटन येथे होत नाही. याच संधीचा फायदा घेऊन पर्यटन महामंडळाने काजवा महोत्सवासारखे उपक्रम घेऊन जिल्ह्यातील सौंदर्य फुलवणाऱ्या पर्यटन स्थळाकंडे त्यांना आकर्षित करायला हवे. महाराष्ट्रात कोकण, मराठवाडा, विदर्भ, खान्देश, पश्चिम व उत्तर महाराष्ट्र येथे कितीतरी स्थळे अशी आहेत, तेथे पर्यटकांना आनंद मिळेल. येथील गड-किल्ल्यांना इतिहास आहे. पण त्याकडे पर्यटनाच्या दृष्टीने अजूनही लक्ष दिले गेले नाही. ही स्थळे विकसित केली तरी पर्यटनाचे डेस्ट‌िनेशन म्हणून महाराष्ट्र नंबर एक असेल. पण त्यासाठी ब्रँडिंग करणे तितकेच गरजेचे असेल. त्यात कल्पकता वापरली तर पधारो म्हणण्याची गरज पडणार नाही. पर्यटक आपोआप वळतील, हे निश्चित! Gautam.sancheti @timesgroup.com
मोबाइल अॅप डाउनलोड करा आणि राहा अपडेट
