म. टा. खास प्रतिनिधी, नाशिक
'आपण आपल्या मनामध्ये डोकावण्याचा कधी प्रयत्न केलाय का? आपण कोण आहोत हे जाणून घेण्याचा कधी प्रयत्न केलाय का? क्षणभर डोळे मिटून आपण आपल्या आतमध्ये डोकावले तर आपल्याला कळेल की, आपण कोण आहोत. आपण येथे का आलो आहोत. खरे तर माणूस म्हणजे एक मोठी प्रयोगशाळच आहे,' असे मत खासदार विजय दर्डा यांनी व्यक्त केले.
९५ व्या वसंत व्याख्यानमालेत 'मैं कोन हूँ...मै क्या हूँ' या विषयावरील बाविसावे पुष्प दर्डा यांनी गुंफले. हे पुष्प मूळचंदभाई गोठी यांच्या स्मृतींना अर्पण करण्यात आले होते. गोदाघाट येथील यशवंतराव देवमामलेदार पटांगणावर ही व्याख्यानमाला सुरू आहे.
दर्डा म्हणाले की, आपण येथे आलेलो नाही, आपल्याला आणण्यात आले आहे. परंतु हे कितीजणांना कळते? आपल्या येण्यामागे काहीतरी उद्देश आहे. लहानपण, तरूणपण आणि वृद्धपण असा मोठा कालावधी आपण आयुष्यभर प्रवास करून घालवतो. जीवन सुंदर आहे, शाश्वत आहे आणि संपूर्ण आहे. फक्त गरज आहे ती स्वत:मध्ये हरवून जाण्याची. आपण अंतरंगात डोकावून पाहिले तर आपल्याला अनेक बाबींचे उत्तर मिळेल. आपण आपल्याकडे कधी हिशोब मागणार आहोत की, नाही याचादेखील विचार व्हावा.
आपण लहानपणी आई, वडील व शिक्षक यांचा विचार करतो, तरूणपणी मित्रांचा आणि बायकोचा विचार करतो तर वृद्धपणी आणखी बऱ्याच जबाबदाऱ्या घेऊन ठेवलेल्या असतात; परंतु आपण स्वत:चा कधी विचार करतो का? आपण आज जसे आहोत तसे काही वर्षांपूर्वी होतो का? याचे उत्तर नकारार्थी मिळते. आपण असे का झालो याचे मूळ शिक्षकांमध्ये आहे कारण ते संस्कार देणारे होते व याचा त्यांना आत्मविश्वास होता. आज संस्कार कोठे आहे, संस्कार असते तर वृद्धाश्रम नसते, जागांवरून भांडणे झाली नसती आणि कशावरून हेवेदावे झाले नसते. असेही दर्डा म्हणाले.
यावेळी अविनाश गोठी यांची प्रमुख उपस्थिती होती. विजय दर्डा यांचा परिचय श्रीकांत बेणी यांनी करून दिला. संगीता बाफणा यांनी मूळचंदभाई गोठी यांना श्रध्दांजली अर्पण केली.
_____
आजचे व्याख्यान
विषय : अद्वैत धून (शास्त्रीय-उपशास्त्रीय संगीताची बहारदार मैफल)
सादरकर्ते : निहिरा निसर्ग, निसर्ग देहूकर, नाशिक
स्थळ : यशवंतराव देवमामलेदार पटांगण, गोदाघाट
वेळ : सायंकाळी ७
मोबाइल अॅप डाउनलोड करा आणि राहा अपडेट
