म. टा. प्रतिनिधी, नाशिक
दुष्काळाशी दोन हात करणाऱ्या नाशिककरांची तहान सध्या टँकरच्या माध्यमातून भागवली जात आहे. कोरडी पडलेली धरणे आणि भूगर्भातील पाणी आटल्याने शेकडो वाड्या-वस्त्यांवर टँकरने पाणी पोहोचवावे लागत आहे. गतवर्षापेक्षा यंदा जिल्ह्यात तिप्प्ट टँकर धावत आहेत.
पावसाने पाठ फिरविली की पाणीटंचाईचा समस्या कशी हैराण करून सोडते, याचा अनुभव सध्या जिल्हावासी घेत आहेत. कधी नव्हे, ते जिल्ह्याच्या सर्वच तालुक्यांना यंदा पाणीटंचाईचा सामना करावा लागत आहे. विहिरी, तलाव यांसाख्या जलाशयांमधील पाणी आटले आहे. भूगर्भातील पाणी पातळीदेखील कमालीची खाली गेली आहे. धरणांमधील शिल्लक पाणीसाठा पुरवून वापरण्याचे काम सध्या प्रशासनाकडून सुरू आहे. मनमाडसारख्या ठिकाणी महिन्यातून एकदा पाणी पुरविण्याची वेळ आली आहे. थोड्याबहूत फरकाने जिल्ह्यातील बहुतांश भागात अशीच परिस्थिती असून, टँकरद्वारे पाणीपुरवठा करण्यावरच प्रशासनाकडून भर दिला जात आहे.
मे महिन्याच्या पहिल्याच पंधरवड्यात जिल्ह्यात १९१ गावे आणि ४५६ वाड्या अशा ६४७ ठिकाणी टँकरद्वारे पाणीपुरवठा केला जात आहे. त्यासाठी १६२ सरकारी आणि ३५ खासगी टँकर्सची मदत घेण्यात येत आहे. गेल्यावर्षी याच कालावधीत १०२ गावे आणि १६९ वाड्या अशा २७१ ठिकाणी अवघ्या ६९ टँकरच्या माध्यमातून पाणीपुरवठा केला जात होता. यंदा गावांची संख्या दुपटीने, वाड्यांची आणि टँकर्सची संख्या तिपटीने वाढल्याची माहिती जिल्हा प्रशासनाकडून देण्यात आली आहे. गतवर्षी सर्वाधिक १३ टँकर येवला तालुक्यात पाणीपुरवठा करीत होते. त्याखालोखाल
सिन्नरमध्ये १२, नांदगावात १० टँकरद्वारे पाणी पुरविले जात होते. यंदाही सर्वाधिक ३३ टँकर एकट्या येवल्यात सुरू आहेत. नांदगावात ३१, सिन्नरमध्ये ३०, बागलाणमध्ये २५ टँकर रहिवाशांची तहान भागवित आहेत.
टँकर्सची द्विशतकाकडे वाटचाल जिल्ह्यात सध्या १९७ टँकर्सद्वारे पाणीपुरवठा केला जात आहे. आणखी काही टँकर्सची मागणी नोंदविण्यात आली असून, त्यामुळे येत्या एक दोन दिवसांतच टँकर्सचे द्विशतक पूर्ण होईल, अशी माहिती प्रशासनाने दिली. जिल्ह्यात टँकर्सच्या ६१९ फेऱ्या मंजूर असून, त्यापैकी ५९२ फेऱ्या सुरू आहेत. सिन्नरमध्ये सर्वाधिक १७० ठिकाणी टॅँकरद्वारे पाणीपुरवठा सुरू आहे. नाशिक आणि कळवण तालुका वगळता जिल्ह्यात सर्वच तालुक्यांमध्ये टँकरद्वारे पाणीपुरवठा केला जात आहे.
मोबाइल अॅप डाउनलोड करा आणि राहा अपडेट
