न्यायाधीश व वकील एकच असून, न्यायाधीश म्हणजे नोकरी स्वीकारलेला वकीलच आहे. कोर्टात जर न्याय होणार नसेल, तर या व्यवस्थेचे अस्तित्वच उरणार नाही. त्यामुळे नवीन नियुक्त होणाऱ्या न्यायाधीशांपुढे सत्यशोधन करून न्याय देण्याचे मोठे आव्हान असल्याचे प्रतिपादन प्रधान जिल्हा व सत्र न्यायाधीश अनिल ढवळे यांनी केले.
गंगापूर रोडवरील रावसाहेब थोरात सभागृहात बार कौन्सिल ऑफ महाराष्ट्र अ‍ॅण्ड गोवा व नाशिक बार असोसिएशन यांच्यातर्फे सुरू करण्यात आलेल्या न्यायिक मार्गदर्शन केंद्राच्या (ज्युडिशिअल सर्व्हिस अ‍ॅज अ करिअर) शुभारंभावेळी ते बोलत होते. 'न्यायसंस्था' हा देश, राज्य वा संस्था यामधील अविभाज्य घटक असून, स्वातंत्र्याचे रक्षण करणाऱ्या न्यायसंस्थेला अधिकारही अधिक आहेत. कायद्याचे ज्ञान, नि:स्वार्थी, नि:स्पृह न्यायाधीश असतील तर न्यायदान अधिक चांगल्या पद्धतीने होईल. वकील व न्यायाधीश हे दोघेही न्यायव्यवस्थेचे महत्त्वाचे घटक असून, न्यायसंस्था टिकविणे त्यांची सामूहिक जबाबदारी असल्याचे ढवळे यांनी स्पष्ट केले.
न्यायाधीशांनी आपली प्रतिमा जपण्याबरोबरच समोर येणारे पुरावे व कायदा यानुसार न्यायदान करणे गरजेचे आहे. न्यायिक मार्गदर्शन केंद्रामध्ये न्यायाधीश होऊ इच्छिणाऱ्या वकिलांना कायद्याच्या ज्ञानाबरोबरच गुण व संस्कारही देणे आवश्यक आहे. सद्यस्थितीत वकिलांची कामाची पद्धती, व्यवसायिक नीतिमूल्यांचे उल्लंघन यामुळे त्यांचा समाजातील दर्जा घसरत चालला असून, त्यांनी आपली प्रतिष्ठा जोपासणे आवश्यक असल्याचे ढवळे म्हणाले. महाराष्ट्र व गोवा बार कौन्सिल तसेच नाशिक बार असोसिएशन यांच्यातर्फे न्यायाधीशपदाच्या परीक्षेत उर्त्तीर्ण झालेले अॅड. सुरेखा कदम-मोरे, अॅड. वसिम शेख, अॅड. विशाल धोंडगे, अॅड. पंडित देवरे, अॅड. विशाल देशमुख, अॅड. जाहेद इनामदार यांचा मान्यवरांच्या हस्ते सत्कार करण्यात आला.
व्यासपीठावर ज्येष्ठ विधिज्ञ श्रीकांत कानिटकर, सुधाकर आव्हाड, जिल्हा सरकारी वकील राजेंद्र घुमरे, अॅड. प्रमोद पाटील आदी उपस्थित होते. अॅड. जयंत जायभावे यांनी प्रास्ताविक केले. गत तीन वर्षांपासून न्यायिक सेवा मार्गदर्शन उपक्रम सुरू असून, या मार्गदर्शन केंद्रातील सुमारे सव्वाशे अ‍ॅडव्होकेट न्यायाधीशपदाची परीक्षा पास झाल्याचे त्यांनी सांगितले. प्रमुख अतिथिंचे स्वागत अॅड. नितीन ठाकरे यांनी केले. अॅड. जालिंदर ताडगे यांनी कार्यक्रमाचे सूत्रसंचालन केले. अॅड. सुरेश निफाडे यांनी आभार मानले.
मोबाइल अॅप डाउनलोड करा आणि राहा अपडेट
