मैत्रेयच्या गुंतवणूकदारांना लवकरच पैसे परत मिळणार आहेत. यासाठी पोलिसांच्या पुढाकाराने आणि कोर्टाच्या आदेशाने इस्क्रो हे वेगळ्याच्या धाटणीचे बँक खाते सुरू करण्यात आले आहे. आजवर, या खात्यात मैत्रेय ग्रुपच्या संचालकानी दीड कोटी रुपयांपैकी ७४ लाख रुपये जमा केले आहेत. उर्वरीत रक्कम दोन दिवसात भरली जाणार आहे. गुंतवणूकदारांना मैत्रेय ग्रुपने पैसे कसे परत करावे, याबाबत आराखडा तयार करण्याचे काम सुरू असून, त्यावर २३ मार्च रोजी कोर्टात फैसला होऊ शकतो.
राज्यात चर्चेत असलेल्या मैत्रेय ग्रुपच्या संचालिका वर्षा मधुसदन सत्पाळकर यांना कोर्टाने काही अटींवर २० दिवसांचा जामीन दोन मार्च रोजी मंजूर केला. गुंतवणूकदारांना पैसे परत देण्याच्या दृष्टीने सत्पाळकरांनी पोलिसांनी सादर केलेल्या अटींवर अंमलबजावणी करण्यास कोर्टात सहमती दर्शवली होती. यात प्रामुख्याने नाशिकमध्ये दाखल झालेल्या तक्रारदारांचे पैसे जमा करण्याबाबतचा ऊहापोह करण्यात आला होता. दोन मार्चपर्यंत शहर पोलिसांकडे ६६१ तक्रारदार आले होते. या तक्रारदारांनी सुमारे १ कोटी ५० लाख रुपये मैत्रेयमध्ये गुंतवले होते. तेवढे पैसे सत्पाळकरांनी बँकेत जमा करावे, अशी पोलिसांची मागणी कोर्टाने मान्य केली. पोलिसांच्या या प्रस्तावानुसार आणि कोर्टाच्या आदेशानुसार अॅक्सिस बँकत इस्क्रो खाते सुरू करण्यात आले. जामीन मिळाल्यानंतर पहिल्याच दिवशी सत्पाळकरांनी या खात्यात ७४ लाख रुपये जमा केले. उर्वरित पैसे दोन दिवसात जमा होतील. याबाबत बोलताना तपास अधिकारी आणि सरकारवाडा पोलिस स्टेशनचे सिनीअर पीआय सीताराम कोल्हे यांनी सांगितले की, सत्पाळकरांचा पासपोर्ट जमा असणे आणि इस्क्रो खाते सुरू होणे हे या तपासाच्या दृष्टीने जमेच्या बाजू ठरल्या आहेत.
तक्रारदारांची संख्या दिवसेंदिवस वाढत असून, त्याबाबतची माहिती कोर्टात सादर केली जाणार आहे. आजमितीस तक्रार समोर आलेल्या तक्रारदारांनी तीन कोटी रुपये गुंतवल्याचे दिसते. हे पैसे सत्पाळकरांनी खात्यात जमा केल्यास गुंतवणूकदारांना ते कोर्टाच्या आदेशाने देण्यात येतील. पोलिसांकडे तक्रार दाखल असेल तरच कोर्टात त्यावर निर्णय होऊ शकतो, असे कोल्हे यांनी स्पष्ट केले. दरम्यान, इस्क्रो खाते सुरू करून गुंतवणूकदारांना परत पैसे देण्याची ही राज्यातील पहिलीच घटना असावी, अशी चर्चा पोलिस दलात सुरू आहे. या खात्याची माहिती पोलिस आयुक्त एस. जगन्नाथन यांना होती. सीबीआयमध्ये आर्थिक शाखेचे प्रमुख म्हणून काम केलेल्या जगन्नाथन यांचा अनुभव या निमित्ताने उपयोगी पडल्याचे सांगितले जाते.
इस्क्रोमुळे कायदेशीर प्रक्रिया बंधनकारक
इस्क्रो खाते सुरू करण्यासाठी कंपनीतर्फे बँकेशी करार करण्यात येतो. हा करार झाल्यानंतर कोर्टाच्या आदेशानुसार कंपनीला पैसे भरावे लागतात. एकदा पैसे भरल्यानंतर संबंधित कंपनीला ते पैसे परत काढता येत नाही. गुंतवणूकदारांना पोलिसांच्या रिपोर्टनुसार आणि कोर्टाच्या आदेशाने काढता येतात. दरम्यान, ज्या तक्रारदारांनी आजवर तक्रार दाखल केलेली नाही, त्यांनी पुढे यावे, असे आवाहन पोलिसांनी केले आहे. पैसे परत मिळवण्यासाठी कायदेशीर प्रक्रियेशिवाय पर्याय नसल्याचा दावा पोलिसांकडून केला जात आहे.
मोबाइल अॅप डाउनलोड करा आणि राहा अपडेट
