म. टा. वृत्तसेवा, निफाड
कर्जाच्या ओझ्याखाली दबलेल्या आणि जप्तीच्या विळख्यात सापडलेल्या निफाड सहकारी साखर कारखाना वाचावा, यासाठी निफाड तालुक्यातील युवक पुढे सरसावले आहेत. त्यासाठी आज (दि. १०) सकाळी १० वाजता नाशिक जिल्हाधिकारी कार्यालयावर मूकमोर्चा काढण्यात येणार आहे.
गेल्या तीन हंगामापासून निफाड सहकारी साखर कारखाना बंद आहे. उत्पादन बंद, कर्जाची रक्कम वाढत असताना सह्योगी तत्त्वावर देण्याच्या प्रक्रियेलाही गती मिळाली नाही. त्यामुळे थकीत कर्जापोटी जिल्हा बँकेने जप्तीची कारवाई सुरू केली. तीन वेळा कारवाई पुढेही ढकलण्यात आली. मात्र, कोणतीही ठोस पावले न उचलल्यामुळे आता जप्तीची कारवाई अटळ असल्याने निसाका वाचला पाहिजे, यासाठी निफाडच्या गोदाकाठ भागातील तरुणांनी एकत्र येत गावागावात बैठका घेतल्या. यातून निर्णय होऊन आज या मूक मोर्चा काढला जाणार आहे.
अखेरीची घटका मोजणारा निसाका वाचविण्यासाठी तालुक्यातील कोणीही नेता पुढे येत नसल्याने या तरुणांनी सोशल मीडियाचा आधार घेत जनजागृती केली. त्याला प्रतिसाद मिळत गेला. गोदाकाठातील शिंगवे, करंजगाव, म्हाळसाकोरे, चांदोरी, सायखेडा येथे बैठका घेण्यात आल्या. या बैठकांमध्ये जर वसाका सुरू होऊ शकतो तर निसाका का नाही? असा प्रश्न उपस्थित करून शेतकरी, कामगार, व्यावसायिक अशा अनेक घटकांच्या जीवन मरणाचा प्रश्न असलेल्या निसाकाला वाचविणे आपले कर्तव्य आहे. या भावनेतून विजय कारे, गोकुळ गिते, अश्पाक शेख, संपतराव गावले आदींनी निसाका बचावसाठी पुढाकार घेतला आहे.
या मूक मोर्चाला सर्व राजकीय पक्षाचे नेते, कार्यकर्ते, पदाधिकारी, शेतकरी, कामगार यांनी सहभागी व्हावे, यासाठी राजकीय जोडे बाजूला ठेवावे, असे आवाहन निसाका बचाव कृती समितीने केले आहे. आज सकाळी दहा वाजता बी. डी. भालेकर मैदानापासून या मोर्चाला सुरुवात होणार आहे. निसाकाबाबत असा उठाव करण्याची वेळ निघून गेली आहे. त्यामुळे या मोर्चाचा कितपत उपयोग होतो, हे आज समजेल. कारण निसाका हा केवळ भावनेवर सुरू होऊ शकत नाही, त्यासाठी लढा तीव्र करावा लागेल. शासनाला सकारात्मक विचार करायला प्रवृत्त करावे लागेल.
मंत्रालयातील बैठक पुढे ढकलली
आमदार अनिल कदम यांनी निसाका व रासाका वाचविण्यासंदर्भात आज (दि.१०) मंत्रालयात सहकारमंत्री चंद्रकांत पाटील व सहकार राज्यमंत्री दादा भुसे यांच्या उपस्थितीत बैठक आयोजित केली होती. काही कारणास्तव ही बैठक पुढे ढकलल्याची माहिती आमदार कदम यांनी कळवली आहे.
मोबाइल अॅप डाउनलोड करा आणि राहा अपडेट
