महिला दिन म्हणजे पुरोगामी विचारांच्या दिशेने टाकलेले एक पाऊलच! मात्र, याच दिवसाच्या पूर्वसंध्येला महिलांनी महिलांनाच मंदिर प्रवेशापासून रोखून `आगळावेगळा` पायंडा पाडत पुरोगामीत्वाची वाट अडवली. शनिशिंगणापूरपाठोपाठ त्र्यंबकेश्वराच्या गाभाऱ्यात जाण्यापासून महिलांना रोखण्यात आले. भूमाता ब्रिगेडच्या कार्यकर्त्यांना सिन्नर तालुक्याच्या हद्दीतच पोलिसांनी अडविले. दुसरीकडे, ब्रिगेडच्या आंदोलकांना रोखण्यासाठी त्र्यंबकेश्वरमधील शेकडो महिला तसेच हिंदुत्ववादी संघटनांचे कार्यकर्ते मंदिराभोवती कडे करून उभे होते.
भूमाता बिग्रेडच्या तृप्ती देसाई व त्यांच्या सुमारे ५० महिला कार्यकर्त्यांना पोलिसांनी सिन्नर येथील नांदूर शिंगोटे येथेच रोखल्याने पुढील संभाव्य संघर्ष टळला. महिला कार्यकर्त्यांना त्र्यंबकेश्वर येथे जाण्यास मज्जाव करण्यात आला. मात्र, कार्यकर्त्यांनी पोलिसांना विरोध केल्याने सायंकाळी सातच्या सुमारास त्यांना ताब्यात घेण्यात आले. सिन्नरच्या शिवसेनेच्या कार्यकर्त्यांनीही भूमाता ब्रिगेडच्या आंदोलनाला विरोध केला. महाशिवरात्रीपर्यंत महिलांना त्र्यंबकेश्वर मंदिराच्या गाभाऱ्यात प्रवेश देण्याचा अल्टिमेटम भूमाता ब्रिगेडने १८ फेब्रुवारीला दिला होता. त्यानंतर विविध संघटनांनी त्र्यंबकेश्वरमधील महिलांना परंपरा मोडणाऱ्या भूमाता ब्रिगेडविरोधात एकत्र येण्याचे आवाहन केले होते. या आवाहनाला त्र्यंबकेश्वरमध्ये चांगला प्रतिसाद मिळाला.
महिलांसह, साधूमहंत, नगरपरिषद सदस्य, जेष्ठ नागरिक, पुरोहित संघ, हिंदुत्ववादी सघंटना एकत्र आल्या. नगराध्यक्षा विजया लढ्ढा, महिला दक्षता समितीच्या अध्यक्षा प्रभावती तुंगार, बांधकाम सभापती तृप्ती धारणे आणि शहरातील शेकडो महिला सोमवारी सकाळीपासून मंदिरात ब्रिगेडला रोखण्यासाठी जमल्या होत्या. ब्रिगेडच्या महिला मंदिरात जाऊ नये म्हणून हिंदु संघटनांच्या महिला कार्यकर्त्यांनी गेल्या दोन-तीन दिवसांपासून तयारी केली होती.
हरसिद्धगिरींचा प्रयत्न फसला
दुपारी बाराच्या सुमारास साध्वी हरसिध्दगिरी या त्र्यंबकेश्वर मंदिरात दाखल झाल्या. आपणास अध्यक्षांना भेटावयाचे आहे तसेच आपणास थेट गाभाऱ्यात जायचे आहे, असा आग्रह त्यांनी मंदिर विश्वस्तांकडे धरला. त्यांना समजावण्याचा प्रयत्न सदस्यांनी करून पाहिला. मात्र, त्या ठाम राहिल्याने त्र्यंबकेश्वरच्या संतप्त झालेल्या महिलांनी साध्वीला मंदिराबाहेर काढले. साध्वींनी आपण आंदोलन करणार असल्याचे सांगून तेथेच बैठक मारली. मात्र, महिलांनी त्यांना तेथून जाण्यास भाग पाडले.
पोलिसांच्या केलेल्या कारवाईचा आम्ही निषेध करतो. हा सरकारचा आंदोलन चिरडण्याचा प्रयत्न आहे. गाभाऱ्यात प्रवेशापासून आम्हाला रोखण्याचा प्रयत्न निरर्थक आहे. याविरोधात तीव्र आंदोलन छेडणार आहोत.-तृप्ती देसाई, अध्यक्ष, भूमाता ब्रिग्रेड
महिलांना गाभाऱ्यात प्रवेश ही त्र्यंबकची परंपरा नाही. त्यामुळे प्रथा परंपरा मोडण्याचा प्रयत्न करणाऱ्यांना कधीही यशस्वी होऊ देणार नाही. त्र्यंबकच्या सर्वस्तरातील महिला एकत्र आल्या असून, भूमातेचा आम्ही विरोध करीत आहोत.-विजया लढ्ढा, नगराध्यक्षा, त्र्यंबकेश्वर
मोबाइल अॅप डाउनलोड करा आणि राहा अपडेट
