नाशिक : नाशकातील तरूण हे इंटरनेट वापरात मध्यम स्तरावर असल्याची बाब समोर आली आहे. एचपीटी कॉलेजमध्ये आयोजित अंकुर फेस्टिव्हल दरम्यान ही इंटरनेट चाचणी घेण्यात आली. त्याचे निष्कर्ष आले असून, चार तरूण इंटरनेटच्या पूर्णतः आहारी गेल्याचेही स्पष्ट झाले आहे.
एचपीटी कॉलेजच्या सायकॉलॉजी विभागातर्फे नुकतेच अंकुर फेस्टचे आयोजन करण्यात आले होते. या फेस्टमध्ये इंटरनेट अॅडिक्शन संदर्भात माहिती तसेच, टेस्ट देण्यासाठी एक विभाग ठेवण्यात आला होता. या दरम्यान कॉलेजियन्सचा इंटरनेट वापराबाबतचा सर्व्हे देखील करण्यात आला. इंटरनेट वापरामुळे होणारे मानसिक आणि शारीरिक परिणाम यावेळी तरुणांना सांगण्यात येत होते.
इंटरनेट अॅडिक्शन काय असते, हे समजावून सांगून त्याचे साइड इफेक्टची माहिती देण्यात आली. यावेळी नाशिकमधील अनेक कॉलेजियन्सनी इंटरनेट अॅडिक्शनची टेस्ट देत आपण अॅडिक्ट आहोत का याची तपासणी करवून घेतली. अंकुर फेस्टच्या अगोदर काही दिवस सायकॉलॉजी विभागातील कॉलेजियन्सनी यासंदर्भात अनेकांच्या चाचण्या घेत जनजागृती केली होती. यावेळी आणि फेस्ट दरम्यान झालेल्या सर्वेक्षणात सुमारे दोनशे यंगस्टर्सनी (तरुण आणि तरुणी) इंटरनेट अॅडिक्शनची टेस्ट दिली. यात सुमारे ११६ यंगस्टर्स अॅडिक्शनच्या पहिल्या लेव्हलला, सेकंड लेव्हलला ८० यंगस्टर्स निदर्शनास आले. अनेक यंगस्टर्स इंटरनेट वापरात माध्यम स्तरावर दिसत असली तरीही हायर लेव्हल म्हणजेच पूर्ण अॅडिक्टेड असे चार यंगस्टर्स निदर्शनास आले. या अॅडिक्टेड यंगस्टर्सला लवकरच एचपीटी कॉलेजचा मानसशास्त्र विभाग संपर्क साधणार असून, त्यांची इच्छा असल्यास त्यांचे कौन्सिलिंग करून देणार आहेत.
नाशिकच्या यूथ मध्येही इंटरनेटचं भूत चांगलंच सवार झालं असल्याचं या सर्वेक्षणातून दिसून येते. इंटरनेट ही काळाची गरज असली तरी त्याचा वापर हा काळजीपूर्वक तसेच गरजेपुरताच होणे फायदेशीर असल्याचे मानसशास्त्र सांगते. यासोबतच जे यंगस्टर्स पहिल्या आणि दुसऱ्या लेव्हल वर आहेत, त्यांनीही खबरदारी बाळगणे महत्त्वाचे आहे. इंटरनेटचा वापर तोलामोलात करण्यासाठी सेल्फ कंट्रोल ही सर्वोत्तम थेरी असल्याचे एचपीटी कॉलेजच्या सायकॉलॉजी विभागातर्फे सांगण्यात आले. इंटरनेट वापराचे आणखी धोके जसे, पाठ दुखणे, झोप न लागणे, डोळ्यांच्या बाजूस काळवणने, हाताची बोटे दुःखू लागणे अशी लक्षणे जाणवत असल्याचे डॉ. चुडामण बडगुजर यांनी सांगितले.
अनेक यंगस्टर्स सध्या इंटरनेटच्या आहारी गेले आहेत. इंटरनेरमुळे होणारे सायकॉलॉजिकल आणि बायॉलॉजिकल इफेक्टस् या सर्वेक्षणा दरम्यान अनेकांना समजावून सांगण्यात आले. जे यंगस्टर्स संपूर्ण अॅडिक्टेड निदर्शनास आले आहेत, अशा तरुणांशी एचपीटी सायकॉलॉजी विभाग लवकरच संपर्क साधणार असून, त्यांना समुपदेशन हवे असल्यास ते देणार आहे. त्याचसोबत इतर यंगस्टर्सला याबाबत आपली टेस्ट वा माहिती हवी असल्यास एचपीटी सायकॉलॉजी विभागात संपर्क साधावा. - डॉ. चुडामण बडगुजर, विभागप्रमुख, एचपीटी सायकॉलॉजी विभाग
मोबाइल अॅप डाउनलोड करा आणि राहा अपडेट
